കട്ടപ്പന: മൂന്നാറിലെത്തുന്ന സഞ്ചാരികളുടെ ഇഷ്ടകേന്ദ്രമാണ് രാജമല. മൂന്നാറിന് അന്താരാഷ്ട്ര ടൂറിസം ഭൂപടത്തില് സ്ഥാനമുറപ്പിക്കാന് സഹായിച്ച ഇടമാണ് ഇത്. ലോകത്ത് വംശനാശം നേരിടുന്ന അപൂര്വ വന്യജീവിയായ വരയാടുകള് ഏറ്റവും കൂടുതല് സൈ്വര്യവിഹാരം നടത്തുന്നത് രാജമലയിലാണ്. വരയാടുകളുടെ പ്രജനന കാലമായ ഫെബ്രുവരി, മാര്ച്ച് മാസങ്ങളില് പ്രവേശനം നിരോധിച്ചിരുന്ന രാജമല തുറന്നു കൊടുത്തത് ഏപ്രില് ഒന്നിനാണ്.
ഇത്തവണ നൂറിലേറെ കുട്ടികള് പിറന്നിട്ടുണ്ടെന്നാണ് ഏകദേശ കണക്ക്. പുതുതായി പിറന്ന കുട്ടികള്ക്കൊപ്പം കൂട്ടമായി വരയാടുകള് മേഞ്ഞു നടക്കുന്ന കാഴ്ചകള് തൊട്ടടുത്ത് കാണാനാകുമെന്നതാണ് രാജമലയുടെ ഏറ്റവും വലിയ ആകര്ഷണം. ഇതിനാലാണ് സഞ്ചാരികളുടെ ഒഴുക്കിന് കാരണം. ഏപ്രില് ഒന്നു മുതല് ഇതുവരെ ഒരു ലക്ഷത്തി പതിനയ്യായിരത്തില്പ്പരം സഞ്ചാരികള് രാജമലയിലെത്തി മടങ്ങിയെന്നാണ് വനം വകുപ്പിന്റെ കണക്ക്.
വശ്യമനോഹരമായ പ്രകൃതി ഭംഗി പ്രദാനം ചെയ്യുന്ന രാജമലയുടെ സ്ഥാനം തെക്കേ ഇന്ത്യയിലെ ഉയരം കൂടിയ കൊടുമുടി ആയ ആനമുടിയുടെ താഴ് വാരത്താണ്. കുറ്റിച്ചെടികളും പുല്മേടുകളും പാറക്കൂട്ടങ്ങളും നിറഞ്ഞ രാജമല ഇരവികുളം ദേശീയോദ്യാനത്തിന്റെ ഭാഗവും കൂടിയാണ്. മൂന്നാറില് നിന്നും 13 കിലോമീറ്റര് സഞ്ചരിച്ചാല് ഇവിടെ എത്തിച്ചേരാനാകും. വരയാടുകളുടെ കൃത്യതയാര്ന്ന സംരക്ഷണത്തോടൊപ്പം സഞ്ചാരികള്ക്ക് മികച്ച അടിസ്ഥാന സൗകര്യങ്ങളും വനം വകുപ്പ് ഒരുക്കിയിട്ടുണ്ട്. സഞ്ചാരികളുടെ എണ്ണത്തിലെ വര്ധനവ് വനം വകുപ്പിന് മികച്ച വരുമാനമാണ് നേടിക്കൊടുക്കുന്നത്. രാജമലയിലെ ജൈവവൈധ്യങ്ങളെക്കുറിച്ച് മനസ്സിലാക്കാന് ഒരുക്കിയിരിക്കുന്ന വെര്ച്വല് റിയാലിറ്റി സംവിധാനം ഏറെ ആകര്ഷകമാണ്.
വരയാടുകളെ അടുത്ത് നിന്ന് കാണാവുന്ന രീതിയില് പ്രകൃതിയുടെ തനിമ നിലനിര്ത്തിക്കൊണ്ട് ക്രമീകരിച്ചിരിക്കുന്ന ഫോട്ടോ പോയിന്റുകളും സഞ്ചാരികള്ക്ക് പ്രിയങ്കരമായി മാറിയിട്ടുണ്ട്. നടക്കാന് പ്രയാസമുള്ളവര്ക്കായി ഏര്പ്പെടുത്തിയിരിക്കുന്ന ബഗ്ഗി കാറുകള് വയോജനങ്ങള്ക്ക് ഏറെ ഉപകാരപ്രദമാണ്. പ്രകൃതി പഠിതാക്കള്ക്കും സഞ്ചാരികള്ക്കും പ്രിയപ്പെട്ട ഇടമായി രാജമല മാറിയിരിക്കുകയാണ്.
