ന്യൂദല്‍ഹി: ഗ്രാമീണ ഭാരതത്തിന്റെ വികസന യാത്രയിലെ നിര്‍ണായക നാഴികക്കല്ലാകുന്ന വികസിതഭാരതം- ജി റാം ജി ആക്ട് ജൂലൈ ഒന്ന് മുതല്‍ രാജ്യവ്യാപകമായി പ്രാബല്യത്തില്‍ വരും. ഇതിനായി വിജ്ഞാപനം പുറപ്പെടുവിച്ചു. വിബി ജി റാം ജി ആക്ട് (വികസിത ഭാരതം- ഗ്യാരണ്ടി ഫോര്‍ റോസ്ഗാര്‍ ആന്‍ഡ് അജീവിക മിഷന്‍ (ഗ്രാമീണ്‍) നിലവില്‍ വരുന്നതോടെ, 2005ലെ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് നിയമം റദ്ദാവും. ഭാരതത്തിന്റെ ഗ്രാമീണ വികസന ചട്ടക്കൂടിലെ ചരിത്രപരമായ മാറ്റത്തെയാണിത് സൂചിപ്പിക്കുന്നത്. 2047ല്‍ വികസിതഭാരതം എന്ന ദേശീയ കാഴ്ചപ്പാടിന് അനുസൃതമായി, സംയോജിതവും ഭാവി ലക്ഷ്യമാക്കിയുള്ളതും ഉല്‍പ്പാദനക്ഷമതയുള്ളതുമായ ഗ്രാമീണ പരിവര്‍ത്തനത്തിന്റെ പുതിയ യുഗത്തിന് ഇത് തുടക്കം കുറിക്കും.
നിയമപ്രകാരം, അവിദഗ്ധ തൊഴില്‍ ചെയ്യാന്‍ സന്നദ്ധരായ മുതിര്‍ന്ന (18 വയസ്സിനു മുകളില്‍ പ്രായമുള്ളവര്‍) അംഗങ്ങളുള്ള ഓരോ ഗ്രാമീണ കുടുംബത്തിനും ഓരോ സാമ്പത്തിക വര്‍ഷവും 125 ദിവസത്തെ വേതനത്തോടു കൂടിയ തൊഴില്‍ നിയമപരമായ ഗ്യാരണ്ടിയായി ലഭിക്കാന്‍ അര്‍ഹതയുണ്ട്. ഉപജീവന സുരക്ഷ ശക്തിപ്പെടുത്തുന്നതിനും ഗ്രാമീണ വരുമാനം വര്‍ദ്ധിപ്പിക്കുന്നതിനും ഗ്രാമതലത്തിലുള്ള സുസ്ഥിര വികസനത്തെ പിന്തുണയ്‌ക്കുന്നതിനുമാണ് ഈ മെച്ചപ്പെടുത്തിയ തൊഴിലുറപ്പ് ലക്ഷ്യമിടുന്നത്.
തൊഴിലാളികള്‍ ആവശ്യപ്പെടുന്ന മുറയ്‌ക്ക് നിശ്ചിത സമയപരിധിക്കുള്ളില്‍ അവര്‍ക്ക് തൊഴില്‍ നല്‍കും. ഇതില്‍ വീഴ്ച വരുത്തിയാല്‍, നിയമത്തിലെ വ്യവസ്ഥകള്‍ പ്രകാരം തൊഴിലില്ലായ്‌മ വേതനം ലഭിക്കാന്‍ തൊഴിലാളികള്‍ക്ക് അര്‍ഹതയുണ്ടായിരിക്കും. സമയബന്ധിതവും സുതാര്യവുമായി വേതനം നല്‍കുന്നതിന് ഈ നിയമം പ്രാധാന്യം നല്‍കുന്നു. നേരിട്ടുള്ള ആനുകൂല്യക്കൈമാറ്റം വഴി തൊഴിലാളികളുടെ ബാങ്ക് അല്ലെങ്കില്‍ പോസ്റ്റ് ഓഫീസ് അക്കൗണ്ടുകളിലേക്ക് നേരിട്ട് വേതനം കൈമാറും. ആഴ്ചതോറും അല്ലെങ്കില്‍ മസ്റ്റര്‍ റോള്‍ അവസാനിപ്പിച്ച് പതിനഞ്ച് ദിവസത്തിനുള്ളില്‍ വേതനം നല്‍കണം. ഇതില്‍ കാലതാമസമുണ്ടായാല്‍ നിയമത്തിലെ വ്യവസ്ഥകള്‍ പ്രകാരം തൊഴിലാളികള്‍ക്ക് നഷ്ടപരിഹാരത്തിന് അര്‍ഹതയുണ്ട്.
2026-27 സാമ്പത്തിക വര്‍ഷത്തേക്ക് കേന്ദ്രസര്‍ക്കാര്‍ 95,692.31 കോടി രൂപയാണ് പദ്ധതിക്കായി ബജറ്റില്‍ വകയിരുത്തിയത്. ഇത് ഗ്രാമീണ തൊഴില്‍ പദ്ധതിക്കുള്ള ബജറ്റ് എസ്റ്റിമേറ്റ് ഘട്ടത്തില്‍ ഇതുവരെയുള്ളതില്‍ വച്ച് ഏറ്റവും ഉയര്‍ന്ന വിഹിതമാണ്. സംസ്ഥാനങ്ങളുടെ വിഹിതം കൂടി ഉള്‍പ്പെടുത്തിയാല്‍, പദ്ധതിയുടെ ആകെ ചെലവ് 1.51 ലക്ഷം കോടി രൂപയിലധികം വരും. ഈ വിഹിതം ഗ്രാമീണ അടിസ്ഥാന സൗകര്യ വികസനം, വന്‍തോതിലുള്ള തൊഴിലവസരങ്ങള്‍ സൃഷ്ടിക്കല്‍, ഗ്രാമീണവരുമാനം വര്‍ധിപ്പിക്കല്‍ എന്നിവയ്‌ക്ക് പുതിയ കരുത്ത് പകരും.
ജന്മഭൂമി ഓണ്‍ലൈന്‍