കൊല്ക്കൊത്ത: ബിജെപിയ്ക്കെതിരെ യുദ്ധം ചെയ്യാന് മാവോയിസ്റ്റുകളോടും കൂടി അണിചേരാന് മമതയുടെ ആഹ്വാനം. മമതയുടെ ഈ പ്രസ്താവന വിവാദമായിരിക്കുകയാണ്.
കഴിഞ്ഞ ദിവസം നടത്തിയ പ്രസംഗത്തിലാണ് ബദ്ധശത്രുക്കളായ കമ്മ്യൂണിസ്റ്റുകളേയും അള്ട്ര കമ്മ്യൂണിസ്റ്റുകളേയും ബിജെപിയ്ക്കെതിരായ യുദ്ധത്തില് തനിക്കൊപ്പം അണിനിരക്കാന് മമത ആഹ്വാനം ചെയ്തിരിക്കുന്നത്. അള്ട്ര കമ്മ്യൂണിസ്റ്റ് എന്നാല് മാവോയിസ്റ്റുകളെയാണ് ഉദ്ദേശിച്ചതെന്ന വിമര്ശനമാണ് മമതയ്ക്കെതിരെ ബിജെപി ഉയര്ത്തുന്നത്. മാവോയിസ്റ്റ് പ്രസ്ഥാനത്തിന് വേരുകളുള്ള സ്ഥലമാണ് ബംഗാള്. ഇവിടുത്തെ ജംഗള് മഹല് പ്രദേശം, പൂര്വ്വ മേദിനിപൂരിലെ കാടുകള്, പുരുലിയ, ബങ്കുര എന്നീ പ്രദേശങ്ങളും മാവോയിസ്റ്റ് കേന്ദ്രങ്ങളാണ്.
നിയമം മൂലം കേന്ദ്രസര്ക്കാര് നിരോധിച്ച സംഘടനയാണ് മാവോയിസ്റ്റ് ഗ്രൂപ്പുകള്. മാത്രമല്ല 2026 മാര്ച്ചോടെ ഇന്ത്യയെ മാവോയിസ്റ്റ് മുക്തമാക്കിയെന്നാണ് കേന്ദ്രമന്ത്രി അമിത് ഷാ ഈയിടെ പ്രഖ്യാപിച്ചത്.അതിനിടെയാണ് ഇപ്പോള് മമത വീണ്ടും തീവ്ര ഇടതുപക്ഷത്തെ ബിജെപിയ്ക്കെതിരായ കലാപത്തില് പങ്കുചേരാന് ക്ഷണിച്ചിരിക്കുന്നത്. ഇവര് വിദ്യാര്ത്ഥികളേയും ഈ കലാപത്തില് അണിചേരാന് ആഹ്വാനം ചെയ്തിട്ടുണ്ട്. ബംഗ്ലാദേശിലും നേപ്പാളിലും നടന്നതുപോലെ ഒരു ജെന്സീ കലാപത്തിനാണോ മമത ആഹ്വാനം ചെയ്യുന്നത് എന്നും ആശങ്ക ഉയരുന്നു.
ഭവാനിപൂരില് മാത്രമാണ് മമത ഈ നിയമസഭാ തെരഞ്ഞെടുപ്പില് മത്സരിച്ചത് ഇവിടെ സുവേന്ദു അധികാരിയോട് തോറ്റതോടെ മമത എംഎല്എ പോലുമല്ല. മാധ്യമങ്ങളുടെ വെള്ളിവെളിച്ചങ്ങളില് നിന്നും പുറത്തായ മമതയ്ക്ക് നിയമസഭയിലേക്ക് പോലും പോകാനാകില്ല. നഷ്ടപ്പെട്ട ശ്രദ്ധ തന്നിലേക്ക് തിരിച്ചുപിടിക്കാനാണോ ഈ കലാപാഹ്വാനം എന്നും സംശയിക്കുന്നു.
