പട്ന ; ഗർഭിണിയായ യുവതിയെ സ്ത്രീധനത്തിന്റെ പേരിൽ ക്രൂരമായി പീഡിപ്പിച്ച് കൊലപ്പെടുത്തി ഭർതൃവീട്ടുകാർ . ബിഹാറിലെ ഗോപാൽഗഞ്ചിലാണ് സംഭവം. മൂന്ന് മാസം ഗർഭിണിയായ ഗുഡിയ ദേവിയാണ് കൊല്ലപ്പെട്ടത് . വിവാഹ വാർഷിക ദിനത്തിൽ തന്നെയാണ് 22 കാരിയായ ഗുഡിയയെ ഭർതൃവീട്ടുകാർ കെട്ടിത്തൂക്കി കൊലപ്പെടുത്തിയത്.
സംഭവത്തിനു പിന്നാലെ ഗുഡിയയുടെ ഭർത്താവ് മനീഷും, ഭർതൃവീട്ടുകാരും രക്ഷപെട്ടു. നാട്ടുകാർ അറിയിച്ചതനുസരിച്ച് പോലീസ് സ്ഥലത്തെത്തിയാണ് മൃതദേഹം പോസ്റ്റ്മോർട്ടത്തിനയച്ചത് . 2025 മെയ് 8 നായിരുന്നു മനീഷും, ഗുഡിയയും തമ്മിലുള്ള വിവാഹം . വിവാഹ സമയത്ത്, വധുവിന്റെ പിതാവ് തന്റെ സാമ്പത്തിക ശേഷിക്കനുസരിച്ച് സ്ത്രീധനവും സമ്മാനങ്ങളും നൽകിയിരുന്നു.
ഗുഡിയ ഗർഭിണിയായപ്പോൾ മുതൽ അവളുടെ ഭർതൃവീട്ടുകാർ സ്ത്രീധനമായി റോയൽ എൻഫീൽഡ് ‘ബുള്ളറ്റ്’ മോട്ടോർ സൈക്കിളും സ്വർണ്ണ മാലയും ആവശ്യപ്പെടാൻ തുടങ്ങി. ഇത് നൽകാൻ യുവതിയുടെ വീട്ടുകാർക്ക് കഴിഞ്ഞില്ല . തുടർന്ന് മനീഷ് ഗുഡിയയെ ക്രൂര പീഡനത്തിനു വിധേയയാക്കി. ക്രൂരപീഡനങ്ങൾക്കൊടുവിലാണ് ഗുഡിയ കൊല്ലപ്പെട്ടതെന്ന് പൊലീസ് പറഞ്ഞു. ശരീരത്തിൽ മുറിവുകളും , ചതവുകളുമേറ്റ പാടുകൾ ഉണ്ടെന്നും പൊലീസ് പറഞ്ഞു.
