തിരുവനന്തപുരം: ബെന്നി ബെഹന്നാൻ കെപിസിസി അധ്യക്ഷനാകുമെന്ന് സൂചന. നിലവിലെ കെപിസിസി അധ്യക്ഷൻ സണ്ണി ജോസഫ് മന്ത്രി ആകുന്ന പശ്ചാത്തലത്തിൽ അദ്ദേഹം സ്ഥാനം ഒഴിയും. ഇക്കാര്യങ്ങൾ സംബന്ധിച്ച എഐസിസി തീരുമാനം ഉടൻ ഉണ്ടാകുമെന്നാണ് അറിയുന്നത്.
മുമ്പും ബെന്നി ബെഹന്നാനെ കെപിസിസി അധ്യക്ഷ സ്ഥാനത്തേക്ക് പരിഗണിച്ചതായി സൂചനകളുണ്ടായിരുന്നു.ഇപ്പോൾ നടക്കുന്ന മുഖ്യമന്ത്രി ചർച്ചകളുമായും ഈ നീക്കത്തിന് ബന്ധമുണ്ടാകാനുള്ള സാധ്യതയും തള്ളിക്കളയാനാകില്ല.ബെന്നി ബെഹന്നാൻ ഉൾപ്പെടെയുള്ള എ ഗ്രൂപ്പിലെ പ്രമുഖ നേതാക്കൾ മുഖ്യമന്ത്രിയാകാൻ പിന്തുണയ്ക്കുന്നത് കെ സി വേണുഗോപാലിനെയാണ്.കെ സിയെ പിന്തുണച്ചാൽ എ ഗ്രൂപ്പിന് കെപിസിസി അധ്യക്ഷ സ്ഥാനം നൽകാമെന്ന വാക്ക് ലഭിച്ചിട്ടുണ്ടാകാമെന്നും അഭ്യൂഹങ്ങളുണ്ട്.
കെ സുധാകരൻ എം പി, ബെന്നി ബഹന്നാൻ എംഎൽഎ, കൊടിക്കുന്നിൽ സുരേഷ്, എം പി, എം കെ രാഘവൻ എം പി തുടങ്ങിയ നേതാക്കളുടെ പിന്തുണ കെ സി വേണുഗോപാലിനാണ്. എന്നാൽ ഹൈബി ഈഡൻ എം പി അടക്കമുളളവർ വി ഡി സതീശനെ പിന്തുണയ്ക്കുന്നു. മുസ്ലീം ലീഗ് ഉൾപ്പെടെയുള്ള ഘടകക്ഷികളുടെ പിന്തുണയും വി ഡി സതീശനുണ്ട്. കെപിസിസി ആസ്ഥാനമായ ഇന്ദിരാഭവനിൽ, ഹൈക്കമാൻഡ് നിയോഗിച്ച എഐസിസി നിരീക്ഷകരുടെ സാന്നിധ്യത്തിൽ കോൺഗ്രസിന്റെ നിർണായക മുഖ്യമന്ത്രി ചർച്ചകൾ നടക്കുകയാണ്.
