ചെന്നൈ: തമിഴ്നാട്ടിൽ സർക്കാർ രൂപീകരണവുമായി ബന്ധപ്പെട്ട് അനിശ്ചിതത്വം നിലനിൽക്കെ, ഭൂരിപക്ഷം നേടിയാൽ മാത്രമേ മുഖ്യമന്ത്രിയായി സത്യപ്രതിജ്ഞ ചെയ്യാൻ അനുവാദമുള്ളൂ എന്ന് ഗവർണർ രാജേന്ദ്ര വിശ്വനാഥ് അർലേക്കർ. ഇക്കാര്യം തമിഴക വെട്രി കഴകം (ടിവികെ) മേധാവി വിജയ് യോട് ഗവർണർ വ്യക്തമാക്കി. സംസ്ഥാനത്ത് സ്ഥിരതയുള്ള ഒരു സർക്കാർ വേണമെന്നും എണ്ണം തെളിയിക്കുന്നതുവരെ കാത്തിരിക്കുമെന്നും അർലേക്കർ പറഞ്ഞതായി എഎൻഐ റിപ്പോർട്ട് ചെയ്തു.
തമിഴ്നാട്ടിൽ സർക്കാർ രൂപീകരിക്കാനുള്ള ശ്രമത്തിന്റെ ഭാഗമായി ഇന്നും വിജയ് ഗവർണറെ കണ്ടു. രണ്ട് ദിവസത്തിനുള്ളിൽ വിജയ് അർലേക്കറുമായി നടത്തുന്ന രണ്ടാമത്തെ കൂടിക്കാഴ്ചയാണിത്. ബുധനാഴ്ച, സർക്കാർ രൂപീകരിക്കാൻ അവകാശവാദം ഉന്നയിച്ച് ഗവർണറെ കണ്ടിരുന്നു. കൂടിക്കാഴ്ചയിൽ ടിവികെ മേധാവി 112 പിന്തുണയ്ക്കുന്ന എംഎൽഎമാരുടെ പട്ടിക സമർപ്പിച്ചിരുന്നു. എന്നിരുന്നാലും, ഭൂരിപക്ഷം സ്ഥാപിക്കാൻ ആവശ്യമായ സംഖ്യയുടെ അഭാവം ചൂണ്ടിക്കാട്ടി ഗവർണർ ആവശ്യം നിരസിക്കുകയായിരുന്നു.
നിയമസഭയിലെ ഏറ്റവും വലിയ ഒറ്റകക്ഷിയുടെ നേതാവെന്ന നിലയിൽ മുഖ്യമന്ത്രിയായി സത്യപ്രതിജ്ഞ ചെയ്യാൻ അനുവദിക്കണമെന്നാണ് വിജയ് യുടെ ഇപ്പോഴത്തെ ആവശ്യം. സഭയിൽ തന്റെ പാർട്ടി ഭൂരിപക്ഷം തെളിയിക്കുമെന്ന് വിജയ് ആത്മവിശ്വാസം പ്രകടിപ്പിച്ചു.
വിജയ് നയിക്കുന്ന തമിഴഗ വെട്രി കഴകത്തെ (ടിവികെ) സർക്കാർ രൂപീകരിക്കാൻ ക്ഷണിക്കണമെന്നും പാർട്ടിക്ക് നിയമസഭയിൽ ഭൂരിപക്ഷം സ്ഥാപിക്കാൻ അനുവദിക്കണമെന്നും സിപിഐ തമിഴ്നാട് സംസ്ഥാന സെക്രട്ടറി എം വീരപാണ്ഡ്യനും ഗവർണറോട് ആവശ്യപ്പെട്ടു. സത്യപ്രതിജ്ഞ ചെയ്യുന്നതിന് മുമ്പ് ഗവർണർ ഭൂരിപക്ഷ പിന്തുണ തെളിയിക്കണമെന്ന് ആവശ്യപ്പെടുന്നത് അനുചിതമാണെന്ന് വീരപാണ്ഡ്യൻ വാദിച്ചു.
