തൃശൂർ: രമേശ് ചെന്നിത്തലയെ മുഖ്യമന്ത്രിയാക്കാൻ ദിവസ പൂജയും ഗുരുതി പുഷ്‌പാഞ്ജലിയും ഒറ്റ ശർക്കര നിവേദ്യവുമായി കോൺഗ്രസ് പ്രവർത്തകൻ. തൃശൂർ നന്തിപുലം കിഴക്കേ കുമരഞ്ചിറ ഭഗവതി ക്ഷേത്രത്തിലാണ് പ്രത്യേക പുജകൾ നടത്തിയത്.
ഐഎൻടിയുസി തൃശൂർ ജില്ലാ വൈസ് പ്രസിഡന്റ് കെ എൻ നാരായണനാണ് ക്ഷേത്രത്തിൽ വഴിപാട് കഴിച്ചത്. നിലവിൽ മുഖ്യമന്ത്രി പദത്തിനായി വി ഡി സതീശന്റെയും രമേശ് ചെന്നിത്തലയുടെയും കെ സി വേണുഗോപാലിന്റെയും പക്ഷങ്ങൾ അവകാശവാദം ശക്തമാക്കിക്കൊണ്ടിരിക്കുകയാണ്. പലയിടങ്ങളിലും നേതാക്കൾക്കായി ഫ്ലക്സും ഉയർന്നിട്ടുണ്ട്. ഇതിനിടയിലാണ് പൂജകളും വഴിപാടുകളും നടക്കുന്നത്.
കെപിസിസി ഓഫീസിന് മുന്നിൽ കെ സി വേണുഗോപാലിനായി ഫ്ലക്‌സുകൾ നിരന്നിട്ടുണ്ട്. പലയിടത്തും വി ഡി സതീശനും രമേശ് ചെന്നിത്തലയ്‌ക്കും അനുകൂലമായ ഫ്ലക്‌സുകളും പ്രത്യക്ഷപ്പെടുന്നുണ്ട്. ഇതിലെല്ലാം കോൺഗ്രസ് ഉന്നത നേതൃത്വത്തിന് കടുത്ത അതൃപ്‌തിയുണ്ടെന്നാണ് റിപ്പോർട്ട്. അതേസമയം, മുഖ്യമന്ത്രിയെ തീരുമാനിക്കുന്നതിനായി കോൺഗ്രസിന്റെ നിർണായക നിയമസഭാ കക്ഷിയോഗം തുടങ്ങി. എഐസിസി നിരീക്ഷകരായ അജയ് മാക്കനും മുകുൾ വാസ്‌നിക്കും എംഎൽഎമാരെ കാണുകയാണ്.
ഘടകകക്ഷി നേതാക്കളുമായും ഇന്ന് വൈകിട്ട് കൂടിക്കാഴ്‌ച നടത്തും. ഞായറാഴ്‌ചയ്‌ക്കുള്ളിൽ ഹൈക്കമാൻഡ് തീരുമാനം വരുമെന്നാണ് വിവരം.
