തിരുവനന്തപുരം: തെരഞ്ഞെടുപ്പ് പരാജയത്തിന് പിന്നാലെ മുഖ്യമന്ത്രിയുടെ ഒഫിഷ്യല് മാധ്യമ വാട്സാപ്പ് ഗ്രൂപ്പ് ‘സിഎംഒ മീഡിയ’യുടെ പേര് മാറ്റി. ഓപ്പോസിഷന് മീഡിയ എന്നാണ് ഗ്രൂപ്പിന്റെ പുതിയ പേര്. പിണറായി വിജയന്റെ മുഖചിത്രം പ്രൊഫൈലില് നിന്നും നീക്കിയിട്ടില്ല.
മുഖ്യമന്ത്രിയുടെ പ്രസ് സെക്രട്ടറി പി.എം. മനോജാണ് ഇന്നലെ ഉച്ചയോടെ ഗ്രൂപ്പിന്റെ പേര് മാറ്റിയത്. മാധ്യമ പ്രവര്ത്തകര്ക്ക് വിവരങ്ങള് കൈമാറുന്നതിനായി ആണ് സിഎംഒ മീഡിയ വാട്സാപ്പ് ഗ്രൂപ്പ് തുടങ്ങിയത്. പി.എം. മനോജാണ് ഗ്രൂപ്പിന്റെ അഡ്മിന്. വോട്ടെണ്ണലിന്റെ തലേദിവസം വൈകിട്ട് നാലിന് ഗ്യാസ് വില വര്ധന സംബന്ധിച്ച വാര്ത്താക്കുറിപ്പായിരുന്നു മുഖ്യമന്ത്രി എന്ന നിലയില് പിണറായി വിജയന്റെ ഗ്രൂപ്പിലെ അവസാനത്തെ സന്ദേശം. അതിനുശേഷം സന്ദേശങ്ങളില്ലാതെ നിശ്ചലമായിരുന്നു ഗ്രൂപ്പ്.
പിണറായി വിജയന് ഇന്നലെ കണ്ണൂരില് നിന്ന് തലസ്ഥാനത്ത് എത്തിയതിന് പിന്നാലെയാണ് ഗ്രൂപ്പിന്റെ പേരും ഓപ്പോസിഷന് മീഡിയ എന്ന് മാറ്റിയത്. അതേസമയം പ്രതിപക്ഷ നേതാവായിരുന്ന വി.ഡി.സതീശന്റെ വാര്ത്താ ഗ്രൂപ്പ് ‘ലീഡര് ഓഫ് ഓപ്പോസിഷന്’ എന്ന പേര് മാറ്റിയിട്ടില്ല. ഇതോടെ രണ്ട് ഓപ്പോസിഷന് ഗ്രൂപ്പുകളുണ്ട്. വിദ്യാഭ്യാസ മന്ത്രിയായിരുന്ന വി.ശിവന്കുട്ടിയുടെ ഇഡിയു മീഡിയയുടെ പേര് മാറ്റിയില്ലെങ്കിലും വാര്ത്താ കാര്യങ്ങള് നോക്കിയിരുന്നവരുടെ നന്ദി അറിയിച്ചുള്ള മെസേജ് വന്നിരുന്നു. മറ്റ് മന്ത്രിമാരുടെ ഗ്രൂപ്പുകളെല്ലാം പേര് മാറ്റിയിട്ടില്ലെങ്കിലും നിശ്ചലമാണ്.
