മമതയുടെ കോട്ടയായ ഭവാനിപൂരില്‍ കടന്നുചെന്ന് മമതയെ 15000 വോട്ടുകള്‍ക്ക് തോല‍്പിച്ച് ഇറങ്ങി വന്ന സുവേന്ദു അധികാരി എന്ന ബിജെപിയുടെ ഭാവി ബംഗാള്‍ മുഖ്യമന്ത്രി ഓരോ ബംഗാളിയ്‌ക്കും ഹരമായിരിക്കുന്നു.
തന്റെ കോട്ടയായ നന്ദിഗ്രാമില്‍ 9000 വോട്ടുകളുടെ ഭൂരിപക്ഷത്തിനും കൂടി ജയിച്ചതോടെ ഇക്കുറി സുവേന്ദു അധികാരി മത്സരിച്ച രണ്ട് മണ്ഡലങ്ങളിലും വിജയിച്ചു. ധൈര്യമുണ്ടെങ്കില്‍ ഭാവനിപ്പൂരില്‍ വന്ന് മത്സരിച്ച് എന്നെ തോല്‍പിക്ക് എന്ന് വെല്ലുവിളിച്ചത് മമതയാണ്. പക്ഷെ ആ വെല്ലുവിളി സ്വീകരിച്ച് സുവേന്ദു അധികാരി ഭവാനിപൂരില്‍ മത്സരിക്കാന്‍ എത്തുമെന്ന് മമത കരുതിയില്ല. ഇത് പിണറായി വിജയനോട് ധൈര്യമുണ്ടെങ്കില്‍ മലപ്പുറത്ത് വന്ന് മത്സരിക്കൂ എന്ന് ചോദിക്കുന്നതിന് തുല്ല്യമാണ്. പക്ഷെ ആ വെല്ലുവിളി ഏറ്റെടുത്തു എന്ന് മാത്രമല്ല, ഭവാനിപൂരില്‍ വിജയം കൊയ്യുകയും ചെയ്തു സുവേന്ദു അധികാരി.
ഭവാനിപ്പൂരിലെ വോട്ടെണ്ണല്‍ നിറയെ നാടകീയതകള്‍ നിറഞ്ഞതായിരുന്നു. പോസ്റ്റല്‍ ബാലറ്റ് എണ്ണിയപ്പോള്‍ സുവേന്ദു അധികാരി മുന്നിലായിരുന്നു. പിന്നീട് ആദ്യറൗണ്ടുകള്‍ എണ്ണിത്തീര്‍ന്നപ്പോള്‍ മമത മുന്നിലായി. 18ാം റൗണ്ട് എണ്ണാനെടുത്തപ്പോഴാണ് വീണ്ടും സുവേന്ദു അധികാരി മുന്നിലായി. 20 റൗണ്ടുകളും വോട്ടെണ്ണി അന്തിമതീര്‍പ്പ് കല്‍പിക്കുമ്പോഴേക്കും മണി രാത്രി ഒമ്പത് മണിയായി.
2021ല്‍ തന്റെ കോട്ടയായ നന്ദിഗ്രാമില്‍ വന്ന് ധൈര്യമുണ്ടെങ്കില്‍ മത്സരിക്കൂ എന്ന് സുവേന്ദു അധികാരി മമതയെ വെല്ലുവിളിച്ചിരുന്നു. അന്ന് വെല്ലുവിളി ഏറ്റെടുത്ത് മമത നന്ദിഗ്രാമില്‍ മത്സരിച്ചു. പക്ഷെ അന്ന് വിജയം സുവേന്ദുവിന്റെ പക്ഷത്തായിരുന്നു.
ഇതോടെ ഇങ്ങിനെ ധൈര്യമുള്ള ഒരു നേതാവ് വേറെയുണ്ടോ എന്ന ചോദ്യം വ്യാപകമായി ഉയരുകയാണ്. വോട്ടെടുപ്പിന്‍ മുന്‍പ് സുവേന്ദു അധികാരി ബംഗാളില്‍ നടത്തിയ പരിബര്‍ത്തന്‍ യാത്ര കുറച്ചൊന്നുമല്ല ബംഗാളിലെ സാധാരണക്കാരെ മമതയ്‌ക്കെതിരെ ഇളക്കിമറിച്ചത്.
