ടെഹ്‌റാന്‍: യുഎസ് നാവികസേന ഇറാന്റെ കപ്പലുകള്‍ക്ക് നേരെ നടത്തുന്ന നീക്കങ്ങളെ കടക്കൊള്ളയോട് ഉപമിച്ച് യുഎസ് പ്രസിഡന്റ ഡൊണാള്‍ഡ് ട്രംപ് നടത്തിയ പരാമര്‍ശം കുറ്റസമ്മതമെന്ന് ഇറാന്‍. ഈ വിഷയത്തില്‍ ഐക്യരാഷ്‌ട്ര സഭ ഇടപെടണമെന്നും ഇറാന്‍ ആവശ്യപ്പെട്ടു.
ട്രംപിന്റെ പ്രസ്താവന കടല്‍ കേന്ദ്രീകരിച്ച് നടത്തുന്ന നിയമലംഘനങ്ങള്‍ പരസ്യമായി അംഗീകരിക്കുന്നതാണെന്ന് ഇറാന്‍ വിദേശകാര്യ മന്ത്രാലയ വക്താവ് ഇസ്മയില്‍ ബഖായ് പറഞ്ഞു. ‘ഇറാനിയന്‍ കപ്പലുകള്‍ നിയമവിരുദ്ധമായി പിടിച്ചെടുത്തതിനെ കടല്‍ക്കൊള്ള എന്ന് യുഎസ് പ്രസിഡന്റ് പരസ്യമായി വിശേഷിപ്പിച്ചു, ഞങ്ങള്‍ കടല്‍ക്കൊള്ളക്കാരെ പോലെ പ്രവര്‍ത്തിക്കുന്നുവെന്നാണ് ധിക്കാരപൂര്‍വം അദ്ദേഹം വീമ്പിളക്കിയത്,’ ബഖായ് പ്രസ്താവനയില്‍ പറഞ്ഞു.
ഇത് വാക്കാലുള്ള വീഴ്ചയല്ലെന്നും അന്താരാഷ്‌ട്ര സമുദ്ര ഗതാഗതത്തിനെതിരായ അവരുടെ ക്രിമിനല്‍ നടപടികളുടെ നേരിട്ടുള്ള സമ്മതമാണെന്നും അദ്ദേഹം കുറ്റപ്പെടുത്തി. അന്താരാഷ്‌ട്ര നിയമങ്ങള്‍ ലംഘിക്കുന്നതിനെ സാധാരണവത്കരിക്കാനുള്ള യുഎസിന്റ ശ്രമങ്ങളെ തടയണമെന്ന് അദ്ദേഹം ഐക്യരാഷ്‌ട്രസഭ സെക്രട്ടറി ജനറലിനോടും അംഗരാജ്യങ്ങളോടും അഭ്യര്‍ത്ഥിച്ചു.
യുഎസ് കടല്‍ക്കൊള്ളക്കാരെ പോലെയാണ് പെരുമാറുന്നത് എന്ന ഇറാന്റെ ആരോപണം അംഗീകരിക്കുന്നതായിരുന്നു ഡൊണാള്‍ഡ് ട്രംപ് നടത്തിയ പരാമര്‍ശം. മാത്രമല്ല ഇത് വലിയ ലാഭമുണ്ടാക്കുന്ന ബിസിനസാണെന്നും ട്രംപ് പറഞ്ഞു.
