തിരുവനന്തപുരം: കേരളത്തില്‍ ബിജെപിയുടെ ചുക്കാന്‍ പിടിച്ച ആര്‍സി എന്ന ചുരുക്കപ്പേരില്‍ വിളിക്കപ്പെടുന്ന രാജീവ് ചന്ദ്രശേഖര്‍ കിംഗ് മേക്കറാകുമെന്ന് രാഷ്‌ട്രീയ നിരീക്ഷകരില്‍ ചിലര്‍. ചില എക്സിറ്റ് പോളുകളിലെ സൂചനകള്‍ പ്രകാരം തൂക്കുമന്ത്രിസഭ വരികയും ബിജെപി നിര്‍ണായകശക്തിയായി മാറുകയും ചെയ്യുന്നതിന്റെ പേരില്‍ മാത്രമല്ല, കേരളത്തില്‍ ഒരു മൂന്നാം ശക്തിയെന്ന നിലയില്‍ വ്യാപകമായി വോട്ടിംഗ് ശതമാനം ഉയര്‍ത്തിയതിന്റെ പേരിലും രാജീവ് ചന്ദ്രശേഖര്‍ കിംഗ് മേക്കറാകുമെന്നാണ് ഈ രാഷ്‌ട്രീയനിരീക്ഷകര്‍ ചൂണ്ടിക്കാട്ടുന്നത്.
രണ്ട് എക്സിറ്റ് പോളുകളാണ് കേരളത്തില്‍ തൂക്കുമന്ത്രിസഭയ്‌ക്കുള്ള സാധ്യത പ്രചവിച്ചിരിക്കുന്നത്. അതില്‍ ഒരെണ്ണം പീപ്പിള്‍സ് ഇന്‍സൈറ്റും മറ്റൊന്നും ടുഡേയ്സ് ചാണക്യയുമാണ്. ഇതില്‍ പിപ്പീള്‍സ് ഇന്‍സൈറ്റ് ബിജെപി നേതൃത്വത്തിലുള്ള എന്‍ഡിഎയ്‌ക്ക് കേരളത്തില്‍ 14 സീറ്റുകള്‍ വരെ കിട്ടുമെന്നാണ് പ്രവചിക്കുന്നത്.
എന്‍ഡിഎയ്‌ക്ക് 14 സീറ്റു ലഭിച്ചാല്‍ നിര്‍ബന്ധമായും കേരളത്തില്‍ തൂക്കുമന്ത്രിസഭ വരുമെന്നുറപ്പ്. അപ്പോള്‍ രാജീവ് ചന്ദ്രശേഖര്‍ കിംഗ് മേക്കറാകും. പിന്നെ കേരളത്തില്‍ മന്ത്രിസഭ രൂപീകരിക്കാന്‍ അവസാനവാക്ക് രാജീവ് ചന്ദ്രശേഖറിന്‍റേതാകും. പീപ്പിള്‍സ് ഇന്‍സൈറ്റ് പ്രവചിക്കുന്ന 14 സാധ്യതാ മണ്ഡലങ്ങളില്‍ തിരുവനന്തപുരം സെന്‍ട്രല്‍, വട്ടിയൂര്‍ക്കാവ്, ചാത്തന്നൂര്‍, തിരുവല്ല, തൃശൂര്‍, കാട്ടാക്കട, മഞ്ചേശ്വരം, കാസര്‍ഗോഡ് , പാലക്കാട്, നേമം , കഴക്കൂട്ടം, കോഴിക്കോട് സൗത്ത്, ആറ്റിങ്ങല്‍ എന്നിവ ഉള്‍പ്പെടുന്നു. ഇഞ്ചോടിഞ്ച് പോരാട്ടം നടക്കുന്ന പൂഞ്ഞാറും നാട്ടികയും മലമ്പുഴയും ഇതുപോലെ സാധ്യതാ മണ്ഡലങ്ങളില്‍ ഉണ്ട്.
ഇതുപോലെ ടുഡേയ്സ് ചാണക്യ പ്രവചിക്കുന്നത് ബിജെപിയ്‌ക്ക് 3 മുതല്‍ 11 സീറ്റുകളാണ്. ഇവിടെയും തൂക്കുമന്ത്രിസഭ സാധ്യത തന്നെയാണ ്കേരളത്തിന്റെ കാര്യത്തില്‍പറയുന്നത്. ഇതില്‍ ഏഴ് സീറ്റുവരെ എന്‍ഡിഎയ്‌ക്ക് കിട്ടിയേക്കാമെന്നും ട്രെന്‍ഡുകള്‍ കൂടുതല്‍ അനുകൂലമായാല്‍ നാല് സീറ്റ് കൂടി കിട്ടുമെന്നാണ് പ്രവചനം. ഇവിടെയും തൂക്കുമന്ത്രിസഭയുടെ സാധ്യത പ്രവചിക്കുന്നുണ്ട്.
ടുഡെയ്സ് ചാണക്യ എന്‍ഡിഎയ്‌ക്ക് 20 മുതല്‍ 23 ശതമാനം വരെ വോട്ടുകള്‍ കിട്ടുമെന്ന് പ്രവചിക്കുമ്പോള്‍ പീപ്പിള്‍സ് ഇന്‍സൈറ്റ് പലയിടങ്ങളിലും 26 ശതമാനം വോട്ടുകള്‍ എന്‍ഡിഎയ്‌ക്ക് പ്രവചിക്കുന്നു. അങ്ങിനെയെങ്കില്‍ കേരളത്തിലെ മണ്ഡലങ്ങളില്‍ ഏതാനും പോക്കറ്റുകളിലല്ലാതെ വിപുലമായി വോട്ട് ശതമാനം ഉയര്‍ത്തിയതിന്റെ പേരിലും രാജീവ് ചന്ദ്രശേഖര്‍ കിംഗ് മേക്കറാകും.
