കോട്ടയം: തിരുനക്കര ബസ് സ്റ്റാന്ഡിന്റെ തെക്കു കിഴക്കേ മൂലയിലാണ് ടൂറിസ്റ്റ് ടാക്സി ഡ്രൈവര്മാരുടെ വിശ്രമകേന്ദ്രം. ഓട്ടം പോയി തിരിച്ചു വരുമ്പോള് ഇരുന്നു വിശ്രമിക്കുവാനുള്ള ഇടമാണിത്. ഈ വിശ്രമകേന്ദ്രത്തിനു മുകളില് ടിന് ഷീറ്റുകളാണ് ഇട്ടിരിക്കുന്നത്. രാവിലെ ഒന്പതു മണി മുതല് വൈകിട്ട് 5 മണി വരെ സൂര്യപ്രകാശം നേരിട്ട് പതിക്കുന്നത് ഈ ഷീറ്റിലാണ്. അപ്പോള് വിശ്രമകേന്ദ്രത്തിനുള്ളിലും കനത്ത ചൂടു തന്നെയാണ്. അകത്തും പുറത്തും ഇരിക്കാന് പറ്റാത്ത അവസ്ഥ. സമീപത്തൊന്നും തണല്മരങ്ങളോ സൂര്യപ്രകാശം മറയ്കാനുള്ളതോ ആയ ഒരു വസ്തുക്കളുമില്ല.
ഇവിടെ ബിഎംഎസുകാരുണ്ട്, സി ഐ ടി യുക്കാറുണ്ട്, ഐഎന്ടിയുസിക്കാരുമുണ്ട്. തങ്ങളുടെ ജീവിത മാര്ഗ്ഗമാണ് ടാക്സി ഓടിക്കുക എന്നുള്ളത്. ഓട്ടം കഴിഞ്ഞു വന്നാല് അല്പം വിശ്രമിക്കാമെന്നു വെച്ചാല് ചുട്ടുപൊള്ളുന്ന ചൂടാണ്. ഈ പൊള്ളുന്ന ചൂടില് നിന്നു രക്ഷപ്പെടുവാനുള്ള മാര്ഗ്ഗം എന്തെന്ന് അവര് ആലോചിച്ചു. അങ്ങനെ അവര് കണ്ടുപിടിച്ച മാര്ഗ്ഗമാണ് ഷെഡിനു മുകളില് പനയോല വിരിക്കുക എന്നുള്ളത്.
പഴയ കാലത്ത് ഓല മേഞ്ഞ വീടുകളില് തണുപ്പു ലഭിച്ചിരുന്ന കാര്യം ഓര്ത്തതോടെയാണ് ഈ ആശയം പൊന്തിവന്നത്. തുടര്ന്ന് മണര്കാടുഭാഗത്തു നിന്ന് പനയോല വെട്ടിക്കൊണ്ടു വന്നതും ഷെഡിനു മുകളില് ഓല വിരിച്ചതുമെല്ലാം ഇവര് തന്നെ. ഇവര്ക്ക് എല്ലാവിധ പ്രോത്സാഹനങ്ങളും നല്കി ഇവരുടെ കണ്വീനര് ഷണ്മുഖനും ഒപ്പമുണ്ട്. പനയോല വിരിച്ചു കഴിഞ്ഞപ്പോള് അവര് തന്നെ പറഞ്ഞു ഇപ്പോള് കൂളായി… എ സി ഇട്ടതു പോലെ.
