പത്തനംതിട്ട: പവര്‍ എക്‌സ്‌ചേഞ്ചുമായുള്ള 600 മെഗാവാട്ട് വൈദ്യുതിയുടെ മൂന്ന് കരാറുകള്‍ ഈ മാസം അവസാനിക്കുമെന്നിരിക്കേ പുതിയ കരാര്‍ ഉണ്ടാക്കാന്‍ സര്‍ക്കാര്‍ മടിച്ചത് തുടര്‍ഭരണം ലഭിക്കുമെന്ന് ഉറപ്പില്ലാത്തതിനാല്‍. തങ്ങള്‍ ഭരിച്ച 10 വര്‍ഷം പവര്‍കട്ട് ഇല്ലായിരുന്നെന്നും പുതിയ സര്‍ക്കാര്‍ അധികാരമേറ്റതോടെ കേരളം ഇരുളിലായെന്നും വരുത്തിത്തീര്‍ക്കാനായിരുന്നു ഇത്. എന്നാല്‍ വേനല്‍ ശക്തമായതോടെ കാര്യങ്ങള്‍ തകിടം മറിഞ്ഞതിനാല്‍ കള്ളിവെളിച്ചത്തായി.
സംസ്ഥാനത്തിന് ആവശ്യമായ 67% വൈദ്യുതിയും പുറത്തുനിന്ന് വാങ്ങേണ്ട സാഹചര്യത്തില്‍ പുതിയ കരാറിനുള്ള അപേക്ഷ കുറഞ്ഞത് മൂന്നുമാസം മുമ്പെങ്കിലും വൈദ്യുതി റഗുലേറ്ററി കമ്മിഷന് മുന്നില്‍ സമര്‍പ്പിക്കേണ്ടതായിരുന്നു. പക്ഷേ അത് മനഃപൂര്‍വം വേണ്ടെന്നുവയ്‌ക്കുകയായിരുന്നുവെന്ന് കെഎസ്ഇബി ഉദ്യോഗസ്ഥര്‍ പറയുന്നു. നിലവിലുള്ള കരാര്‍ അവസാനിക്കുന്നതോടെ വൈദ്യുതി പ്രതിസന്ധി രൂക്ഷമാകുമെന്ന് വ്യക്തമായതിനാല്‍ കഴിഞ്ഞ എട്ടിനാണ് 250 മെഗാവാട്ട് വൈദ്യുതി ആവശ്യപ്പെട്ട് കെഎസ്ഇബി റഗുലേറ്ററി കമ്മിഷനെ സമീപിച്ചത്.
കമ്മിഷന് സാഹചര്യങ്ങള്‍ വിലയിരുത്തി യൂണിറ്റിന് 10 രൂപ നിരക്കില്‍ വൈദ്യുതി വാങ്ങാന്‍ അനുമതി നല്‍കിയെങ്കിലും പവ്വര്‍ എക്‌സ് ചേഞ്ചില്‍ കേരളത്തിന് ആവശ്യമായ വൈദ്യുതി നല്‍കാന്‍ കഴിയാത്ത സാഹചര്യമാണിപ്പോള്‍.
ഇതോടെ സംസ്ഥാനത്ത് വൈകിട്ട് 6 മുതല്‍ 11 വരെയുള്ള പീക്ക് ലോഡ് സമയത്ത് കുറഞ്ഞത് അരമണിക്കൂര്‍ വരെ വൈദ്യുതി നിയന്ത്രണം തുടരും.
കേരളത്തിന്റെ പ്രതിദിന ശരാശരി വൈദ്യുതി ഉത്പാദനം 1200 മെഗാവാട്ട് ആണ്. എന്നാല്‍ ഉപഭോഗം 6013 മെഗാവാട്ടിന് മുകളിലും. ഇന്ന് ആവശ്യപ്പെട്ടാല്‍ നാളെ വൈദ്യുതി ലഭിക്കുന്ന ‘ഡേ എഹെഡ് മാര്‍ക്കറ്റി’ല്‍ നിന്നാണ് അടിയന്തര സാഹചര്യത്തില്‍ കെഎസ്ഇബി വൈദ്യുതി വാങ്ങുന്നത്.
എന്നാല്‍ ഡേ എഹെഡ് മാര്‍ക്കറ്റിലും ഇപ്പോള്‍ വൈദ്യുതി ലഭിക്കാത്ത സാഹചര്യമാണ്. അതിനാല്‍ അടിയന്തര സാഹചര്യത്തില്‍ ആവശ്യപ്പെടുന്നതിന്റെ തൊട്ടടുത്ത ദിവസം മുതല്‍ 30 ദിവസത്തേക്ക് വൈദ്യുതി വാങ്ങാനാവുന്ന ടേം എഹെഡ് മാര്‍ക്കറ്റില്‍ നിന്ന് വൈദ്യുതി വാങ്ങാന്‍ അനുവദിക്കണമെന്നാണ് കെഎസ്ഇബി ഇപ്പോള്‍ ആവശ്യപ്പെട്ടിരിക്കുന്നത്.
ജന്മഭൂമി ഓണ്‍ലൈന്‍