മലപ്പുറം: മുസ്ലിം ലീഗിന്റെ അഖിലേന്ത്യ ജനറൽ സെക്രട്ടറി പി.കെ. കുഞ്ഞാലിക്കുട്ടി അടുത്ത കേരള മുഖ്യമന്ത്രിയായി വരണമെന്ന ആഗ്രഹം പരസ്യമായി പ്രകടിപ്പിച്ച് സുന്നി മഹല്ല് ഫെഡറേഷൻ (SMF). മലപ്പുറം ചെമ്മാട് ദാറുൽ ഹുദയിൽ നടന്ന എസ്.എം.എഫ് ഗോൾഡൻ ജൂബിലി പ്രഖ്യാപന വേദിയിലായിരുന്നു പി.കെ കുഞ്ഞാലിക്കുട്ടിയെ വേദിയിലിരുത്തി പരാമർശം നടത്തിയത്.
പ്രസംഗം കേട്ട് വേദിയിലുണ്ടായിരുന്ന പി.കെ. കുഞ്ഞാലിക്കുട്ടി അടക്കമുള്ള നേതാക്കൾ പുഞ്ചിരിയോടെയാണ് ഇതിനോട് പ്രതികരിച്ചത്. മെയ് നാലാം തിയ്യതി വോട്ടെണ്ണൽ കഴിയുമ്പോൾ കുഞ്ഞാലിക്കുട്ടി മുഖ്യമന്ത്രിയാവുമെന്നാണ് എസ്.എം.എഫ് നേതാവ് അസ്ലം മഷ്ഹൂർ തങ്ങൾ പൊതുവേദിയിൽ പ്രസംഗിച്ചത് . മുസ്ലിം ലീഗ് പ്രസിഡന്റ് പാണക്കാട് സ്വാദിഖലി തങ്ങൾ അടക്കം മുതിർന്ന മുസ്ലിം ലീഗ് നേതാക്കൾ വേദിയിൽ ഉണ്ടായിരുന്നു.
യുഡിഎഫ് അധികാരത്തിൽ വന്നാൽ കുഞ്ഞാലിക്കുട്ടി വഹിക്കേണ്ട സ്ഥാനത്തെക്കുറിച്ച് രാഷ്ട്രീയ വൃത്തങ്ങളിൽ ചർച്ചകൾ സജീവമാകുന്നതിനിടെയാണ് സുന്നി മഹല്ല് ഫെഡറേഷന്റെ വേദിയിൽ നിന്നും ഇത്തരമൊരു പ്രഖ്യാപനം വരുന്നത് എന്നത് ശ്രദ്ധേയമാണ്.
