ന്യൂഡൽഹി ; കശ്മീരിലെ പഹൽഗാമിൽ, പാക്ക് ഭീകരരുടെ വെടിയുണ്ടകൾ 26 ജീവനുകൾ കവർന്നിട്ട് ഇന്ന് ഒരു വർഷം. പഹൽഹാമിൽ ജീവൻ പൊലിഞ്ഞവർക്ക് ആദരവ് അർപ്പിച്ചിരിക്കുകയാണ് മലയാളികളുടെ പ്രിയ താരം ഉണ്ണി മുകുന്ദൻ . ഇന്ത്യ ഒരിയ്ക്കലും ഈ മുറിവ് മറക്കില്ലെന്നും ഉണ്ണി മുകുന്ദൻ സോഷ്യൽ മീഡിയ പോസ്റ്റിൽ പറയുന്നു. ഒപ്പം രക്തസാക്ഷികളായവർക്ക് പ്രണാമവും അർപ്പിച്ചിട്ടുണ്ട്.
ബൈസരൺ താഴ്വരയിലുണ്ടായ ആക്രമണത്തിൽ അന്ന് കൊച്ചി സ്വദേശി രാമചന്ദ്രന്റെയും ജീവൻ നഷ്ടപ്പെട്ടു. ഓപ്പറേഷൻ സിന്ദൂറിലൂടെ പാക്കിസ്ഥാനിലെ ഭീകരകേന്ദ്രങ്ങൾ തകർത്താണ് ഇന്ത്യ അതിർത്തി കടന്നുള്ള ഭീകരതയ്ക്കു തിരിച്ചടി നൽകിയത്. ലഷ്കറെ തയിബയുടെ നിഴൽ സംഘടന ദ് റെസിസ്റ്റൻസ് ഫ്രണ്ടാണു ആക്രമണത്തിനു പിന്നിലെന്നു കണ്ടെത്തിയിരുന്നു. ആക്രമണം നടത്തിയ സുലൈമാൻ (ഹാഷിം മൂസ), അഫ്ഗാനി, ജിബ്രാൻ എന്നിവരെ കഴിഞ്ഞ ജൂലൈയിൽ സൈന്യം കൊലപ്പെടുത്തി.
