അഗര്ത്തല(ത്രിപുര): ആദിശങ്കരജയന്തിയില് ത്രിപുരേശ്വരീ ദേവിക്ക് ക്ഷേത്ര സമര്പ്പണം. ത്രിപുരയിലെ ഫക്കിര്മുറ ഗ്രാമത്തില് ചിന്മയ ഹരിഹര വിദ്യാലയത്തോട് ചേര്ന്ന് നിര്മ്മിച്ച മാ ചിന്മയി മന്ദിറാണ് ഭക്തിസാന്ദ്രമായ അന്തരീക്ഷത്തില് ആര്എസ്എസ് സര്സംഘചാലക് ഡോ. മോഹന് ഭാഗവത് സമര്പ്പിച്ചത്.
ലോകത്തിന് സത്യം പ്രദാനം ചെയ്യുകയാണ് ഭാരതത്തിന്റെ ദൗത്യമെന്ന് സര്സംഘചാലക് പറഞ്ഞു. എന്നാല് ആ സത്യം ലോകത്തിന് മനസിനാവണമെങ്കില് അതിന് ശക്തിയുടെ പിന്തുണ ആവശ്യമാണ്. ശക്തി സാര്ത്ഥകമാകണമെങ്കില് അതിന് സമര്പ്പണഭാവവും ഭക്തിയും ആവശ്യമാണ്, അദ്ദേഹം ചൂണ്ടിക്കാട്ടി.
അറിവ് എന്നത് മനസ്സിലാക്കലാണ്. രണ്ടായിരം വര്ഷങ്ങളായി ലോകം ശാസ്ത്രം മുതല് സോഷ്യലിസം വരെയുള്ള നിരവധി തത്ത്വചിന്തകളുടെ പരീക്ഷണത്തിലൂടെ കടന്നുപോയിട്ടുണ്ട്. എന്നാല് വര്ത്തമാനകാലത്ത്, ഭാരതത്തിന്റെ ജീവിത വീക്ഷണമാണ് വേണ്ടതെന്ന് ലോകം മനസിലാക്കുന്നുണ്ട്. സനാതന ധര്മ്മം പ്രപഞ്ചത്തിനാകെ ശരിയായ ദിശ കാണിക്കുകയാണെന്ന് അദ്ദേഹം അഭിപ്രായപ്പെട്ടു.
ക്ഷേത്രങ്ങള് ഭാരതീയ സാമൂഹിക ജീവിതത്തിന്റെ കേന്ദ്രമാണ്. ശക്തിയോടൊപ്പം, ഭക്തിയും ആവശ്യമാണ്. എല്ലാവരുമായും ഇടകലര്ന്ന് എല്ലാവരെയും സേവിക്കുന്ന മനോഭാവമുള്ളവരെയാണ് ഭാരതീയ സമൂഹം ഓര്മ്മിക്കുന്നത്. യുഗങ്ങളായി വൈവിധ്യങ്ങള് നമ്മുടെ ജീവിതത്തിന്റെ ഭാഗമാണ്. എന്നാലും നമ്മള് ഒന്നാണ്.
ഈ ഏകത്വമാണ് നമ്മുടെ ശക്തി. എന്നാല് ഭാരതത്തിന്റെ ഉയര്ച്ച തടയാന്, ബാഹ്യശക്തികള് നമുക്കിടയില് ഭിന്നത സൃഷ്ടിക്കാന് ശ്രമിക്കുന്നുണ്ട്. അതില് എല്ലാവരും ജാഗ്രത പാലിക്കണമെന്ന് അദ്ദേഹം അഭ്യര്ത്ഥിച്ചു.
ഭാരതത്തിന്റെ ശക്തി അതിന്റെ സംസ്കാരത്തില് ഉള്ച്ചേര്ന്നിരിക്കുന്നു. ഭാരതം ഒരിക്കലും ആക്രമണാത്മക മനോഭാവം പുലര്ത്തിയിട്ടില്ല. സമാധാനത്തിനും സാഹോദര്യത്തിനും വേണ്ടിയാണ് നിരന്തരം വാദിച്ചത്. യുദ്ധത്താല് തകര്ന്ന ലോകത്ത് അടിയന്തിരമായി ആവശ്യമുള്ളത് സമാധാനമാണ്. നദികള്, മലകള് ഉള്പ്പെടെ പ്രകൃതിയോടുള്ള ആഴമായ ആദരവ് കൊണ്ട് സവിശേഷതയുള്ളതാണ് നമ്മുടെ ആരാധന. ഈ മനോഭാവം സാമൂഹിക ഘടനയുടെ എല്ലാ കോണുകളിലും വ്യാപിപ്പിക്കുക എന്ന ദൗത്യം ആചാര്യന്മാര് ഏറ്റെടുത്തതാണ്. ആ മഹത്തായ ദൗത്യം നിരന്തരമായ ഒരു പ്രക്രിയയായിരുന്നുവെന്ന് അദ്ദേഹം പറഞ്ഞു.
ത്രിപുരയിലെ രാജമാതാ ബിഭുകുമാരി ദേവി പരിപാടിയില് ഏകാത്മകതയുടെ സന്ദേശം നല്കി. ത്രിപുര മുഖ്യമന്ത്രി ഡോ. മണിക് സാഹ, ഗവര്ണര് ഇന്ദസേന റെഡ്ഡി തുടങ്ങിയവരും പങ്കെടുത്തു.
