ആലപ്പുഴ: കായംകുളത്ത് വാഹനാപകടത്തില്‍ പരിക്കേറ്റ യുവതിയെ ആശുപത്രിയിലേക്ക് മാറ്റുന്നതിനിടെ ശരീരത്തില്‍ ലൈംഗികോദ്ദേശ്യത്തോടെ സ്പര്‍ശിച്ചെന്ന പരാതിയില്‍ അന്വേഷണം ഊര്‍ജിതമാക്കാന്‍ സംസ്ഥാന പൊലീസ് മേധാവിയുടെ ഉത്തരവ്.കേസ് അന്വേഷിക്കാന്‍ ആലപ്പുഴ ജില്ലയില്‍ നിന്നുള്ള ഉന്നത വനിതാ പൊലീസ് ഉദ്യോഗസ്ഥയെ നിയോഗിക്കാനും ആലപ്പുഴ എസ്പിക്ക് ഡിജിപിയുടെ നിര്‍ദേശം.
സംഭവത്തില്‍ പൊലീസിനെതിരെ യുവതി ഡിജിപിക്ക് പരാതി നല്‍കിയതിന് പിന്നാലെയാണ് നടപടി. കേസ് ഉന്നത വനിതാ പൊലീസ് ഉദ്യോഗസ്ഥയെ കൊണ്ട് അന്വേഷിപ്പിക്കണമെന്നും ആവശ്യപ്പെട്ടിരുന്നു. തന്റെ മൊഴി കൃത്യമായി രേഖപ്പെടുത്തിയില്ലെന്ന് യുവതി നല്‍കിയ പരാതിയില്‍ പറയുന്നു.
നിലവില്‍ കായംകുളം ഡിവൈഎസ്പിക്കാണ് അന്വേഷണ ചുമതലയെങ്കിലും ആദ്യഘട്ടത്തില്‍ കായംകുളം പൊലീസ് സ്വീകരിച്ച നടപടികള്‍ തൃപ്തികരമല്ലെന്ന് യുവതി പറഞ്ഞു. താന്‍ പറഞ്ഞ പല കാര്യങ്ങളും ഒഴിവാക്കിയാണ് മൊഴി പൊലീസ് രേഖപ്പെടുത്തിയത്. പ്രതിയെ സഹായിക്കുന്ന തരത്തിലുള്ള വകുപ്പുകള്‍ ആണ് പൊലീസ് ചുമത്തിയതെന്നും യുവതി ആരോപിച്ചു. കായംകുളം പൊലീസ് സത്യസന്ധമായി കേസ് അന്വേഷിക്കില്ലെന്നും ഒന്നാം പ്രതിയെ സഹായിക്കുന്ന നടപടികള്‍ പൊലീസിന്റെ ഭാഗത്തുനിന്നും ഉണ്ടായെന്നും യുവതിയുടെ പരാതിയില്‍ പറയുന്നു.
കേസിലെ പ്രതി വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്റ് സിനില്‍ സവാദിനെ കൃത്യസമയത്ത് വൈദ്യപരിശോധന നടത്താനോ രഹസ്യമൊഴി രേഖപ്പെടുത്താനോ പൊലീസ് തയാറായില്ലെന്ന് ഡിജിപിക്ക് നല്‍കിയ പരാതിയില്‍ യുവതി പറയുന്നു. പരാതി പിന്‍വലിക്കാന്‍ പ്രതിയുടെ അടുപ്പക്കാര്‍ ലക്ഷങ്ങള്‍ വാഗ്ദാനം ചെയ്‌തെന്ന് നേരത്തേ യുവതി പറഞ്ഞിരുന്നു.
