സര്ക്കുലര് വിവാദത്തിന് പിന്നില് സിപിഎം അനുകൂല ജീവനക്കാര്, ഉദ്ഘാടനം ചെയ്യുന്നത് ഗവര്ണര്
കാലടി: ശ്രീശങ്കരാചാര്യ സംസ്കൃത സര്വകലാശാലയിലെ ശ്രീശങ്കര ജയന്തി ആഘോഷം അട്ടിമറിക്കാന് സിപിഎം ജീവനക്കാരുടെ നീക്കം. വര്ഷങ്ങള്ക്ക് ശേഷമാണ് ശ്രീശങ്കര ജയന്തി ആഘോഷം ആചാര്യ സ്വാമികളുടെ ജയന്തി ദിനത്തില് ത്തന്നെ നടക്കുന്നത്. സാധാരണ ജയന്തി ദിനത്തെ അവഗണിച്ച് പിന്നീട് ശ്രീശങ്കര ജയന്തിയുടെ പേരില് ഇടതു പ്രചരണ സെമിനാര് സംഘടിപ്പിക്കുകയാണ് പതിവ്. നാളെ സര്വകലാശാലയില് നടക്കുന്ന ശ്രീശങ്കര ജയന്തി ആഘോഷം ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്യാന് എത്തുന്നതാണ് സിപിഎം ജീവനക്കാരെ വിറളിപിടിപ്പിച്ചിരിക്കുന്നത്. സന്ദര്ശനം വിവാദമാക്കാനാണ് ഇടതു ജീവനക്കാര് വൈസ് ചാന്സലര് പ്രൊഫ. സിസ തോമസ് അറിയാതെ വിവാദ സര്ക്കുലര് ഇറക്കിയത്.
ഗവര്ണര് എത്തുമ്പോള് പാലിക്കേണ്ട പ്രോട്ടോകോളുകളെക്കുറിച്ച് അനാവശ്യ സര്ക്കുലര് ഇറക്കിയാണ് ശ്രീശങ്കര ജയന്തി ആഘോഷം അട്ടറ്റിക്കാന് നീക്കം നടത്തിയത്. സര്വകലാശാലയിലെ സിപിഎം അനുകൂല അദ്ധ്യാപകരും അനദ്ധ്യാപകരുമാണ് വിവാദങ്ങള്ക്ക് പിന്നിലെന്ന് ഇന്റലിജന്സ് ഏജന്സികളുടെ അന്വേഷണത്തില് വ്യക്തമായി. ഗവര്ണറുടെ സന്ദര്ശനം റദ്ദാക്കിക്കുകയെന്നതായിരുന്നു ഈ നീക്കത്തിന് പിന്നില്. സര്ക്കുലര് ഇറക്കിയതും എസ്എഫ്ഐയെക്കൊണ്ട് സര്ക്കുലര് കത്തിച്ചതിനും പിന്നിലും ഇവരായിരുന്നു
.
സര്വകലാശാലയിലെ അഡ്മിനിസ്ട്രേഷന്- സി വിഭാഗമാണ് സര്ക്കുലര് തയാറാക്കിയത്. ഈ വിഭാഗത്തിലെ അസിസ്റ്റന്റായ സി.കെ. ആലിഡയാണ് ഫയല് എഴുതിയത്. ഏത് ഉത്തരവിന്റെ, രേഖയുടെ അടിസ്ഥാനത്തിലാണ് നോട്ട് ഫയലിലും സര്ക്കുലറിന്റെ ഡ്രാഫ്റ്റിലും ഇത്തരം വാചകങ്ങള് വന്നതെന്നത് വിശദമായ അന്വേഷണത്തിലേ മാത്രമേ മനസിലാകൂ. സെക്ഷന് ഓഫീസര് പി.എം. ജ്യോതിഷ് ലീവിലായിരുന്നു. ഭരണ വിഭാഗം അസിസ്റ്റന്റ് രജിസ്ട്രാര് ഷീന എം.ആര് വേണ്ടവിധം സൂക്ഷ്മമായി പഠിക്കാതെയാണ് ഫയല് സമര്പ്പിച്ചതെന്നാണ് സര്വകലാശാല വൃത്തങ്ങള് പറയുന്നത്.
ഗവര്ണറെ സര്വകലാശാലയില് പ്രവേശിപ്പിക്കില്ലെന്ന തീരുമാനത്തിലായിരുന്നു മുന് സിപിഎം വിസിമാരും സിപിഎം അനുകൂല സംഘടനയുടെ നേതാക്കന്മാരും. 2014ന് ശേഷം ആദ്യമായാണ് സര്വകലാശാലയില് ഗവര്ണര് എത്തുന്നത്. വിവാദ സര്ക്കുലര് ആദ്യം എത്തിയത് സിപിഎം അനുകൂല പത്രസ്ഥാപനങ്ങളിലും ചാനലുകളിലും ആയിരുന്നു. സര്വകലാശാലയിലെ എസ്എഫ്ഐ നേതാക്കന്മാരുടെ വാട്സ്ആപ്പിലേക്കും എത്തിയിരുന്നു. സര്ക്കുലര് തയാറാക്കിയതിന് പിന്നില് സിപിഎം അനുകൂല സംഘടനയിലെ ജീവനക്കാരുടെ പങ്കും അന്വേഷണ വിധേയമാക്കണമെന്ന് എബിവിപി ആവശ്യപ്പെട്ടു.
