കൊല്ലം:പ്രധാനമന്ത്രി കഴിഞ്ഞ ദിവസം രാജ്യത്തെ അഭിസംബോധന ചെയ്ത് പ്രസംഗിച്ചതിനെതിരെ തെരഞ്ഞെടുപ്പ് കമ്മീഷനില്‍ സിപിഎം പരാതി നല്‍കിയെന്ന് ജനറല്‍ സെക്രട്ടറി എംഎ ബേബി. പ്രധാനമന്ത്രി ദൂരദര്‍ശന്‍ ഉള്‍പ്പടെ ഔദ്യോഗിക മാധ്യമങ്ങളെ ഉപയോഗിച്ച് നടത്തിയത് രാഷ്‌ട്രീയ പ്രചരണമാണെന്നാണ് എംഎ ബേബി പറയുന്നത്. തമിഴ്‌നാട്,പശ്ചിമ ബംഗാള്‍ തെരഞ്ഞെടുപ്പുകള്‍ നടക്കാനിരിക്കുകയാണ്. നഗ്‌നമായ പെരുമാറ്റച്ചട്ട ലംഘനമാണ് പ്രധാനമന്ത്രി നടത്തിയതെന്നാണ് എംഎ ബേബിയുടെ ആക്ഷേപം. വനിതാ സംവരണ ബില്‍ പരാജയപ്പെട്ട സാഹചര്യത്തിലായിരുന്നു നരേന്ദ്രമോദി രാജ്യത്തെ അഭിസംബോധന ചെയ്തത്.
അധികാരത്തില്‍ ഇരിക്കുന്ന പാര്‍ട്ടി ഔദ്യോഗിക മാധ്യമങ്ങളെ ഉപയോഗിച്ച് രാഷ്‌ട്രീയ പ്രചരണം നടത്താന്‍ പാടില്ല. തെരഞ്ഞെടുപ്പ് കമ്മീഷന് നരേന്ദ്രമോദിക്കും ബിജെപിക്കും അനുകൂലമായി പ്രവര്‍ത്തിക്കുന്നുവെന്നും എം എ ബേബി ആരോപിച്ചു. ന്യൂനപക്ഷ മതത്തിനെ ലക്ഷ്യംവെച്ചുള്ള സത്യവിരുദ്ധ പ്രചരണം ബംഗാളില്‍ അമിത്ഷാ നടത്തിയെന്ന ആരോപണവുമുണ്ട്. സിപിഎം ജനറല്‍ സെക്രട്ടറി എന്ന നിലയില്‍ തെരഞ്ഞെടുപ്പ് കമ്മീഷന് പരാതി നല്‍കി. ഇതിന് മുന്‍പ് നല്‍കിയ പരാതികള്‍ തെരഞ്ഞെടുപ്പ് കമ്മീഷന് അവഗണിച്ചു. ഈ ബില്‍ ഇപ്പോള്‍ അവതരിപ്പിച്ചത് തന്നെ മാതൃകാ പെരുമാറ്റച്ചട്ടങ്ങളുടെ ലംഘനമാണെന്നും ആഭാസകരമായാണ് പാര്‍ലമെന്റിലെ കാര്യങ്ങളെ ഇപ്പോള്‍ കൈകാര്യം ചെയ്യുന്നതെന്നും എം എ ബേബി കുറ്റപ്പെടുത്തി.
വനിതാ സംവരണ ബില്‍ പ്രതിപക്ഷ കക്ഷികള്‍ ചേര്‍ന്ന് ലോക്‌സഭയില്‍ പരാജയപ്പെടുത്തി. ഇതിനെ ഭ്രൂണഹത്യ എന്നാണ് പ്രധാനമന്ത്രി രാജ്യത്തെ അഭിസംബോധന ചെയ്തപ്പോള്‍ വിശേഷിപ്പിച്ചത്.രാജ്യത്തെ അമ്മമാരും സഹോദരിമാരും പ്രതിപക്ഷ കക്ഷികള്‍ക്ക് മാപ്പ് നല്‍കില്ലെന്നും അദ്ദേഹം പറഞ്ഞു.ബില്‍ പരാജയപ്പെട്ടതില്‍ പ്രധാനമന്ത്രി മാപ്പ് ചോദിക്കുകയും ചെയ്തു. എന്നാല്‍ വനിതാ സംവരണം നടപ്പാക്കാന്‍ ശ്രമം തുടരുമെന്നും പറഞ്ഞു.
