നോയിഡ: 2026 മാര്‍ച്ചോടെ നക്സല്‍ മുക്ത ഭാരതം സ്ഥാപിച്ചതായി കേന്ദ്ര ആഭ്യന്തരമന്ത്രി അമിത് ഷാ പ്രഖ്യാപിച്ചതിന് പിന്നാലെ വീണ്ടും ഭാരതത്തില്‍ നക്സലിസത്തെ തിരിച്ചുകൊണ്ടുവരാന്‍ ശ്രമം നടക്കുന്നോ? നോയിഡയില്‍ ശമ്പള വര്‍ധനയ്‌ക്ക് വേണ്ടിയുള്ള തൊഴിലാളികളുടെ സമരം എന്ന പേരില്‍ അരങ്ങേറിയ അക്രമം നക്സലിസത്തെ പുനരുദ്ധരിക്കാനുള്ള ശ്രമത്തിന്റെ ഭാഗമാണെന്ന് കരുതുന്നു.
കഴിഞ്ഞ ദിവസം അറസ്റ്റിലായ രൂപേഷ് റായി മസ്ദൂര്‍ ബിഗുല്‍ ദസ്ത (തൊഴിലാളികളുടെ ബ്യൂഗിള്‍ സ്ക്വാഡ് എന്നാണ് ഇതിനര്‍ത്ഥം) എന്ന സംഘടനയുടെ നേതാവ് അര്‍ബന്‍ നക്സലാണെന്നാണ് അന്വേഷണത്തില്‍ കണ്ടെത്തിയിരിക്കുന്നത്. നോയിഡ സെക്ടര്‍ 39 പൊലീസിനാണ് ഇയാളെ അറസ്റ്റ് ചെയ്തത്. സമരദിവസവും അതിനു മുന്‍പും മസ്ദൂര്‍ ബിഗുല്‍ ദസ്തയുടെ പ്രവര്‍ത്തകര്‍ തൊഴിലാളികളെയും ജീവനക്കാരെയും നിരന്തരം പ്രകോപിപ്പിച്ചുകൊണ്ടിരുന്നതായി പൊലീസ് അന്വേഷണത്തില്‍ കണ്ടെത്തിയിട്ടുണ്ട്.
പ്രകോപനപരമായ പോസ്റ്റുകള്‍ പങ്കുവെയ്‌ക്കാന്‍ ഏകദേശം 17ഓളം വാട്സാപ് ഗ്രൂപ്പുകള്‍ രൂപേഷ് റായി രൂപീകരിച്ചിരുന്നു. ഈ വാട്സാപ് ഗ്രൂപ്പുകളിലെ വിവരങ്ങള്‍ ഫോറന്‍സിക് ടീം പരിശോധിച്ചുവരികയാണ്. അറസ്റ്റിലായ മസ്ദൂര്‍ ബിഗുല്‍ ദസ്ത പാര്‍ട്ടിയിലെ യുവാക്കളെല്ലാം 25നും 30നും ഇടയില്‍ പ്രായമുള്ളവരാണ്.
ചില യുവതികളും ഈ നക്സല്‍ ശൃംഖലയില്‍ ഉള്‍പ്പെട്ടിട്ടുണ്ട്. കാര്‍ കത്തിക്കുമ്പോഴും പ്രകോപന മുദ്രാവാക്യങ്ങള്‍ മുഴക്കാനും കലാപത്തിന് പ്രേരിപ്പിക്കാനും ഷാള്‍ കൊണ്ട് മുഖം മറച്ച ചില സ്ത്രീകളെ പൊലീസ് കണ്ടെത്തിയിട്ടുണ്ട്. മറ്റ് രണ്ട് നക്സല്‍ സ്വഭാവമുള്ള സംഘടനകള്‍ കൂടി ഈ അക്രമത്തില്‍ പങ്കാളികളാണ്. ഇവയുടെ വിവരം ശേഖരിച്ചുവരുന്നു.
എന്തായാലും രാജ്യത്ത് നക്സലിസത്തെ അഥവാ മാവോയിസത്തെ കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തില്‍ വേരോടെ പിഴുതെറിഞ്ഞതിന്റെ പേരില്‍ ശത്രുക്കളായ നിരവധി ഗ്രൂപ്പുകള്‍ ഇന്ത്യയില്‍ ഉണ്ട്.ഒന്ന് മതപരിവര്‍ത്തന ലോബികളാണ്. നക്സലിസത്തിന്റെ പേരില്‍ ഏറ്റവുമധികം നേട്ടം കൊയ്തത് കൊടുംവനങ്ങള്‍ക്കുള്ളില്‍ മാവോയിസ്റ്റുകളുടെ സംരക്ഷണത്തില്‍ പ്രവര്‍ത്തിക്കാന്‍ സാധിച്ച മതപരിവര്‍ത്തനലോബികളാണ്. അതുപോലെ പ്രതിപക്ഷപാര്‍ട്ടികളും മാവോയിസത്തെ അവരുടെ പല ഗൂഢതാല‍്പര്യങ്ങള്‍ക്കും ഉപയോഗിച്ചിരുന്നവരാണ്. എന്നാല്‍ മോദി സര്‍ക്കാര്‍ ഗോത്രമേഖലയില്‍ വികസനമെത്തിക്കുന്നതിന് നക്സലിസം അഥവാ മാവോയിസം തടസ്സമാണെന്ന് കണ്ടെത്തിയതിനെ തുടര്‍ന്നാണ് ഇതിനെ ഉന്മൂലം ചെയ്യുന്നത് പ്രധാനദൗത്യമായി ഏറ്റെടുത്തത്.
നക്സലിസം അരങ്ങ് വാണ പലയിടത്തും റോഡുകളും വൈദ്യുതിയും എത്തി. നക്സലിസവുമായി ജീവിച്ച പല നേതാക്കള്‍ക്കും തൊഴില്‍ നല്‍കി, അവരെ പുനരധിവസിപ്പിച്ചു. പക്ഷെ ചില ഗ്രൂപ്പുകള്‍ വീണ്ടും നക്സലിസത്തെ മടക്കിക്കൊണ്ടുവരാനുള്ള ശ്രമത്തിലാണെന്ന് കരുതുന്നു. ഇതിനെതിരെ ശക്തമായ നടപടിയെടുക്കുമെന്ന് യോഗി ആദിത്യനാഥ് താക്കീത് ചെയ്തിട്ടുണ്ട്.
