ചെന്നൈ: കൊൽക്കത്ത നൈറ്റ് റൈഡേഴ്സിനെതിരെ 32 റൺസിന്റെ മിന്നും ജയവുമായി ചെന്നൈ സൂപ്പർ കിങ്സ്. ചെന്നൈ മുന്നോട്ടുവെച്ച 193 റൺസ് വിജയലക്ഷ്യം പിന്തുടർന്ന കൊൽക്കത്തയ്ക്ക് ഏഴ് വിക്കറ്റിൽ 160 റൺസാണ് നേടാനായത്. സീസണിലെ ചെന്നൈയുടെ രണ്ടാമത്തെ വിജയമാണിത്.
നാലോവറിൽ 21 റൺസ് മാത്രം വിട്ടുകൊടുത്ത് മൂന്ന് വിക്കറ്റ് നേടിയ നൂർ അഹമ്മദാണ് മത്സരം ചെന്നൈയ്ക്ക് അനുകൂലമാക്കിയത്. ഫിന് അല്ലനെ വേഗത്തിൽ നഷ്ടമായ ശേഷം സുനിൽ നരൈന് 24 റൺസും അജിങ്ക്യ രഹാനെ 28 റൺസും നേടിയപ്പോള് അംഗ്കൃഷ് രഘുവംശി 27 റൺസും നേടി പുറത്തായപ്പോള് ഒരു ഘട്ടത്തിൽ കൊൽക്കത്ത 90/6 എന്ന നിലയിലേക്ക് വീണു.
റോവ്മന് പവലും രമൺദീപ് സിംഗും ഏഴാം വിക്കറ്റിൽ 63 റൺസ് നേടി കൊൽക്കത്തയുടെ തോൽവിഭാരം കുറയ്ക്കുകയായിരുന്നു. രമൺദീപ് സിംഗ് 35 റൺസും റോവ്മന് പവൽ 31 റൺസുമായി പുറത്താകാതെ നിന്നു. രമൺദീപ് സിംഗിനെ അന്ഷുൽ കാംബോജ് ആണ് പുറത്താക്കിയത്.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ചെന്നൈ അഞ്ച് വിക്കറ്റ് നഷ്ടത്തിലാണ് 192 റൺസ് നേടിയത്. 32 പന്തിൽ മൂന്ന് സിക്സറും നാല് ഫോറുകളും അടക്കം 48 റൺസ് നേടിയ സഞ്ജു സാംസൺ തന്നെയാണ് ടോപ് സ്കോറർ.
ആയുഷ് മാത്രെ(38), ഡെവാള്ഡ് ബ്രെവിസ്(41), സര്ഫറാസ് ഖാന്(23) എന്നിവരുടെ മികവിലാണ് ചെന്നൈ മികച്ച സ്കോര് കണ്ടെത്തിയത്. ശിവം ദുബെയും(13) ജാമീ ഓവര്ട്ടണും(ഏഴ്) പുറത്താകാതെ നിന്നു. കൊല്ക്കത്തയ്ക്ക് വേണ്ടി കാര്ത്തിക് ത്യാഗി രണ്ട് വിക്കറ്റും വൈഭവ് അറോറ, അനുകുള് റോയ്, സുനില് നരൈയ്ന് എന്നിവര് ഓരോ വിക്കറ്റുകളും നേടി.
