ടെൽ അവീവ് : ഇറാനെതിരായ പോരാട്ടത്തിൽ ചരിത്രപരമായ നേട്ടങ്ങൾ അവകാശപ്പെടുന്ന ഒരു വീഡിയോ സന്ദേശം ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ശനിയാഴ്ച പുറത്തിറക്കി. നടപടി ഇതുവരെ അവസാനിച്ചിട്ടില്ല. ഇറാന്റെ ആണവ അഭിലാഷങ്ങളെ ഇസ്രായേൽ തകർത്തുവെന്നും സന്ദേശത്തിൽ നെതന്യാഹു പറഞ്ഞു.
ഇതിനു പുറമെ ഇറാനെതിരെയുള്ള പോരാട്ടം അവസാനിച്ചിട്ടില്ല, നമുക്ക് ഇനിയും ഒരുപാട് കാര്യങ്ങൾ ചെയ്യാനുണ്ട്. പക്ഷേ, ചരിത്രപരമായ നേട്ടങ്ങൾ നമ്മൾ നേടിയിട്ടുണ്ടെന്ന് ഇപ്പോഴും വ്യക്തമായി പറയാൻ കഴിയുമെന്നും ഹീബ്രുവിൽ പുറത്തിറക്കിയ വീഡിയോയിൽ നെതന്യാഹു പറഞ്ഞു.
ഇതിനു പുറമെ ഇറാൻ ഒരു ആണവായുധം വികസിപ്പിക്കുന്നതിന് വളരെ അടുത്തായിരുന്നതിനാലും പ്രതിദിനം നൂറുകണക്കിന് മിസൈലുകൾ നിർമ്മിക്കാനുള്ള ശേഷി ഉണ്ടായിരുന്നതിനാലുമാണ് തങ്ങൾ ഈ പ്രവർത്തനം ആരംഭിച്ചത്. നീക്കം ചെയ്യേണ്ട രണ്ട് പ്രധാന ഭീഷണികളായിരുന്നു ഇവയെന്നും അദ്ദേഹം പറഞ്ഞു.
കൂടാതെ മിസൈൽ നിർമ്മാണവും ആണവ പദ്ധതിയും ഭൂമിക്കടിയിൽ ഒളിപ്പിക്കാൻ ഖമേനി ആഗ്രഹിച്ചു, ബി-2 വിമാനങ്ങൾക്ക് പോലും അവിടെ എത്താൻ കഴിയില്ല. ഞങ്ങൾക്ക് അത് നോക്കി നിൽക്കാൻ കഴിഞ്ഞില്ല എന്നും നെതന്യാഹു അവകാശപ്പെട്ടു.
കൂടാതെ ഇറാന്റെ കൈവശം ഇപ്പോഴും 400 കിലോഗ്രാമിലധികം സമ്പുഷ്ട യുറേനിയം ഉണ്ടെന്ന് അദ്ദേഹം പറഞ്ഞു, നയതന്ത്ര നടപടികളിലൂടെയോ ബലപ്രയോഗത്തിലൂടെയോ ഇത് നീക്കം ചെയ്യുമെന്ന് അദ്ദേഹം കൂട്ടിച്ചേർത്തു.
