തൃശൂര്‍: തൃശൂര്‍ നഗരത്തില്‍ ബിജെപി സ്ഥാനാര്‍ത്ഥി പത്മജ ജയിക്കുമെന്ന ആത്മവിശ്വാസത്തോടെ പ്രവര്‍ത്തകര്‍. ജില്ലയിലെ 12 മണ്ഡലങ്ങളിലും വിജയിക്കുമെന്ന് സിപിഎം തൃശൂര്‍ ജില്ലാ സെക്രട്ടറി കെ.വി. അബ്ദുള്‍ ഖാദര്‍ അവകാശപ്പെടുമ്പോഴും 13ാമത്തെ മണ്ഡലമായ തൃശൂര്‍ നഗരത്തിലെ മത്സരത്തെക്കുറിച്ച് വ്യക്തമായ ഒരു അഭിപ്രായം പറയാന്‍ അദ്ദേഹം തയ്യാറാകുന്നില്ല. ഇതിനര്‍ത്ഥം സിപിഎം കണക്കുകൂട്ടലുകളില്‍ തൃശൂര്‍ കിട്ടുമെന്ന് ഉറപ്പില്ല എന്ന് തന്നെയാണ് അര്‍ത്ഥം. ഇത് തൃശൂരിലെ ബിജെപി സ്ഥാനാര്‍ത്ഥി പത്മജയുടെ വിജയസാധ്യത വര്‍ധിപ്പിക്കുന്നു. തികഞ്ഞ വിജയപ്രതീക്ഷയിലാണ് ബിജെപി. ബിജെപിയെ സംബന്ധിച്ചിടത്തോളം തൃശൂര്‍ മാത്രമല്ല, മണലൂര്‍, നാട്ടിക എന്നീ മണ്ഡലങ്ങളിലും വിജയപ്രതീക്ഷയുണ്ട്.
എല്‍ഡിഎഫിന് വേണ്ടി ദുര്‍ബലനായ, ജില്ലയ്‌ക്ക് പുറത്തുനിന്നുള്ള ആലങ്കോട് ലീലാകൃഷ്ണനെയാണ് സിപിഐ മത്സരിപ്പിച്ചത്. ഇവിടെ തുടക്കം മുതലേ പ്രധാന പോര് യുഡിഎഫ് സ്ഥാനാര്‍ത്ഥി രാജന്‍ പല്ലനും പത്മജയും തമ്മിലാണ്. ക്രിസ്തീയ സഭയ്‌ക്ക് വലിയ ശക്തിയുള്ള മണ്ഡലമാണ് തൃശൂര്‍ നഗരം. എഫ് സിആര്‍എ പ്രശ്നത്തിന്റെ പേരില്‍ ക്രിസ്ത്യന്‍ വോട്ടുകള്‍ യുഡിഎഫിന് അനുകൂലമായി കേന്ദ്രീകരിക്കപ്പെട്ടതായി യുഡിഎഫ് അവകാശപ്പെടുമ്പോഴും തൃശൂരിന്റെ കാര്യത്തില്‍ ഈ വോട്ടുകള്‍ ഭിന്നിക്കുമെന്ന് ബിജെപി കരുതുന്നു.
തൃശൂരിലെ നാട്ടിക, ഒല്ലൂര്‍, ചാലക്കുടി, ഇരിങ്ങാലക്കുട, കൊടുങ്ങല്ലൂര്‍, ഗുരുവായൂര്‍, പുതുക്കാട്, കയ്‌പമംഗലം, മണലൂര്‍, വടക്കാഞ്ചേരി, ചേലക്കര എന്നീ മണ്ഡലങ്ങളില്‍ സിപിഎം ജയിക്കുമെന്ന് സിപിഎം തൃശൂര്‍ ജില്ലാ സെക്രട്ടറി കെ.വി. അബ്ദുള്‍ ഖാദര്‍ അവകാശപ്പെടുമ്പോഴും തൃശൂര്‍ നഗരത്തെക്കുറിച്ച് കൃത്യമായി ഒരു പ്രവചനം നടത്താന്‍ അബ്ദുള്‍ ഖാദര്‍ ഭയപ്പെടുന്നു.
“ശക്തമായ ത്രികോണമത്സരമാണ് തൃശൂര്‍ നഗരത്തില്‍ നടന്നത്. അതിനാല്‍ തൃശൂരിലെ ഫലത്തെക്കുറിച്ച് ശക്തമായ അവകാശവാദം നടത്താന്‍ ഞങ്ങള്‍ക്കാവില്ല.” – ഇതായിരുന്നു കെ.വി. അബ്ദുള്‍ ഖാദറിന്റെ പ്രതികരണം.
