സൈപ്രസ് : വീണ്ടും തന്റെ മികച്ച ചെസ്സ് പുറത്തെടുത്തിരിക്കുകയാണ് ഇന്ത്യയുടെ പ്രജ്ഞാനന്ദ. ലോക രണ്ടാം നമ്പര് താരമായ യുഎസിന്റെ ഹികാരു നകാമുറയെ സമനിലയില് തളച്ചുവെന്ന മികച്ച നേട്ടമാണ് പ്രജ്ഞാനന്ദ കൊയ്തത്. ഇതോടെ ഇതുവരെ കളിച്ചല് ഏഴ് കളികളില് ഒരു ജയവും ഒരു തോല്വിയും അഞ്ച് സമനിലയും ഉള്പ്പെടെ പ്രജ്ഞാനന്ദയുടെ പോയിന്റ് 3.5 ആയി.
പ്രജ്ഞാനന്ദ ഇപ്പോള് മൂന്നാമതാണെങ്കിലും ഇനി അവശേഷിക്കുന്ന് ഏഴ് റൗണ്ടുകളില് മികച്ച പ്രകടനം പുറത്തെടുക്കാനായാല് കാന്ഡിഡേറ്റ് കിരീട സാധ്യത തള്ളിക്കളയാനാകില്ല. ഇപ്പോള് തോല്വി അറിയാതെ ഏഴ് കളികളില് നിന്നും ആറ് പോയിന്റോടെ ഉസ്ബെകിസ്ഥാന് താരം ജവോഖിര് സിന്ഡറൊവ് ആണ് ഏറെ മുന്നില്. വെറും 20 വയസ്സ് മാത്രം പ്രായമുള്ള ജവോഖിര് സിന്ഡൊറോവ് അത്ഭുതകരമായ പ്രകടനമാണ് പുറത്തെടുത്തത്. പ്രജ്ഞാനന്ദ, ഹികാരു നകാമുറ, ഫാബിയോനോ കരുവാന തുടങ്ങിയവരെ ആദ്യ റൗണ്ടുകളില് തോല്പിച്ചു. ഇപ്പോള് രണ്ടാം സ്ഥാനത്ത് യുഎസിന്റെ മറ്റൊരു താരമായ ഫാബിയാനോ കരുവാന നാലരപോയിന്റോടെ നിലകൊള്ളുന്നു.
വനിതാ ചെസ്സില് ഇന്ത്യയുടെ വൈശാലിയും ദിവ്യ ദേശ്മുഖും അപാരപ്രകടനം പുറത്തെടുത്തത് കഴിഞ്ഞ റൗണ്ടുകളിലാണ്. അതുവരെ സമനിലകളില് കുരുങ്ങിക്കിടന്ന ഇവര് മികച്ച താരങ്ങള്ക്കെതിരെ വിജയം കൊയ്തതോടെ ആത്മവിശ്വാസത്തിലാണ്. പ്രജ്ഞാനന്ദയുടെ സഹോദരിയായ വൈശാലി കഴിഞ്ഞ രണ്ട് കളികളില് വിജയിക്കുകയുണ്ടായി. ഉക്രൈന്റെ അന്ന മ്യൂസിചുക് ആണ് മുന്നില്. തൊട്ടുപിന്നില് അര പോയിന്റ് വ്യത്യാസത്തില് വൈശാലി നില്ക്കുന്നു. മൂന്നരപോയിന്റ് നേടിയ ഇന്ത്യയുടെ ദിവ്യ ദേശ്മുഖ് ആണ് മൂന്നാം സ്ഥാനത്ത്.
