ഗുവാഹത്തി: തേയിലത്തോട്ടങ്ങള്‍ കൊണ്ട് പ്രശസ്തമായ ആസാമില്‍ തൊഴിലാളികള്‍ക്കൊപ്പം തേയില നുള്ളിയും കുശലങ്ങള്‍ പങ്കുവെച്ചും പ്രധാനമന്ത്രി നരേന്ദ്ര മോദി. നിയമസഭാ തെരഞ്ഞെടുപ്പിന്റെ ഭാഗമായുള്ള ആസാം സന്ദര്‍ശനത്തിലാണ് പ്രധാനമന്ത്രി തേയിലത്തോട്ടം തൊഴിലാളികള്‍ക്കൊപ്പം മണിക്കൂറുകളോളം സമയം ചിലവഴിച്ചത്. ഇന്നലെ രാവിലെ ദിബ്രുഗഡിലെ ഒരു തേയിലത്തോട്ടത്തില്‍ എത്തിയ പ്രധാനമന്ത്രി അവിടെ ജോലി ചെയ്യുന്ന സ്ത്രീകളുമായി സംവദിക്കുകയും അവരോടൊപ്പം തേയില നുള്ളുകയും സെല്‍ഫിയെടുക്കുകയും ചെയ്തു.
‘ചായ ആസാമിന്റെ ആത്മാവാണ്! ഇവിടെ നിന്നുള്ള ചായ ലോകമെമ്പാടും എത്തിയിരിക്കുന്നു. ഇന്ന് രാവിലെ ദിബ്രുഗഡില്‍, ഞാന്‍ ഒരു തേയിലത്തോട്ടം സന്ദര്‍ശിക്കുകയും ഇവിടെ ജോലി ചെയ്യുന്ന സ്ത്രീകളുമായി സംവദിക്കുകയും ചെയ്തു. അത് വളരെ അവിസ്മരണീയമായ ഒരനുഭവമായിരുന്നു, സന്ദര്‍ശനത്തിന്റെ ഫോട്ടോകള്‍ പങ്കുവെച്ച് പ്രധാനമന്ത്രി മോദി എക്സില്‍ എഴുതി.
ഓരോ തേയിലത്തോട്ട കുടുംബത്തിന്റെയും പരിശ്രമത്തില്‍ ഞങ്ങള്‍ വളരെ അഭിമാനിക്കുന്നു. അവരുടെ കഠിനാധ്വാനവും സ്ഥിരോത്സാഹവും അസമിന്റെ അഭിമാനം വര്‍ദ്ധിപ്പിച്ചുവെന്നും അദ്ദേഹം കുറിച്ചു.
