തിരുവനന്തപുരം: നിയമസഭാ തെരഞ്ഞെടുപ്പ് പ്രചാരണത്തിന് സര്ക്കാര് വാഹനം ദുരുപയോഗപ്പെടുത്തുന്നു. മന്ത്രി വി. ശിവന് കുട്ടിയുടെ പ്രൈവറ്റ് സെക്രട്ടറി പി. രാമചന്ദ്രന് നായരാണ് തെരഞ്ഞെടുപ്പ് ചട്ടം ലംഘിച്ച് സര്ക്കാര് വാഹനമുപയോഗിക്കുന്നത്.
തെരഞ്ഞെടുപ്പ് പ്രഖ്യാപിച്ചാല് ഔദ്യോഗിക വാഹനങ്ങളുപയോഗിക്കുന്നത് പെരുമാറ്റച്ചട്ടങ്ങള്ക്കനുസരിച്ചാകണമെന്ന് മുഖ്യ തെരഞ്ഞെടുപ്പ് ഓഫീസറുടെ ഉത്തരവുള്ളപ്പോഴാണ് രാമചന്ദ്രന് നായരുടെ ചട്ട ലംഘനം. കേന്ദ്ര, സംസ്ഥാന സര്ക്കാര്, പൊതുമേഖലാ സ്ഥാപനങ്ങള്, തദ്ദേശ സ്ഥാപനങ്ങള്, ബോര്ഡുകള്, സഹകരണ സൊസൈറ്റികള് തുടങ്ങിയവയുടെ വാഹനങ്ങള് ഔദ്യോഗിക വാഹനങ്ങളുടെ ഗണത്തിലാണ്. കേന്ദ്ര, സംസ്ഥാന മന്ത്രിമാരുടെ തെരഞ്ഞെടുപ്പ് പരിപാടികള്ക്ക് ഔദ്യോഗിക വാഹനങ്ങള് പാടില്ലെന്നാണ് ചട്ടം.
എന്നാല് മന്ത്രിയുടെ പിഎസ് രാമചന്ദ്രന് നായര് തന്റെ ഔദ്യോഗിക വാഹനം കെഎല് 01 ഡിഇ 1580 ഇന്നോവ ക്രിസ്റ്റയിലാണ് പാര്ട്ടി പരിപാടികള്ക്കുള്പ്പെടെ സഞ്ചരിക്കുന്നത്. പാര്ട്ടി യോഗങ്ങളിലും പരിപാടികളിലും പങ്കെടുക്കുന്നത് ഔദ്യോഗിക കാറിലാണെന്ന് അറിയുന്നു.
സിപിഐ ജില്ലാ സെക്രട്ടറിയായിരുന്ന രാമചന്ദ്രന് നായര് കോഴ ആരോപണത്തെത്തുടര്ന്നാണ് സിപിഎമ്മില് ചേക്കേറിയത്. ബെനറ്റ് എബ്രഹാമില് നിന്ന് കോടിക്കണക്കിനു രൂപ കോഴ വാങ്ങി തിരുവനന്തപുരം സീറ്റ് വിറ്റതില് സിപിഐ ജില്ലാ സെക്രട്ടറിയേറ്റ് അംഗമായിരുന്ന രാമചന്ദ്രന് നായര് വലിയ പങ്കുവഹിച്ചെന്ന് ആരോപണമുയര്ന്നിരുന്നു. അതിന്റെ ഭാഗമായി അന്നത്തെ ജില്ലാ സെക്രട്ടറി വെഞ്ഞാറമ്മൂട് ശശി, സി. ദിവാകരന്, പി. രാമചന്ദ്രന് നായര് എന്നിവര്ക്കെതിരേ സിപിഐ നടപടിയെടുത്തിരുന്നു.
സി. ദിവാകരന് നടപടി സ്വീകരിച്ച് പാര്ട്ടിക്കു വിധേയനായപ്പോള് വെഞ്ഞാറമ്മൂട് ശശിയും രാമചന്ദ്രന് നായരും പാര്ട്ടിക്കു പുറത്തുപോയി. ശശി ജനതാദളിലും രാമചന്ദ്രന് നായര് സിപിഎമ്മിലും ചേര്ന്നു. രാമചന്ദ്രന് നായരെ സിപിഎം ജില്ലാ കമ്മിറ്റിയിലുള്പ്പെടുത്തി.
