തിരുവനന്തപുരം:തനിക്കെതിരെ സിപിഎം അപരനെ നിര്‍ത്തിയത് വോട്ടര്‍മാരെ വിഡ്ഢിയാക്കാനാണ്എന്ന് ബി ജെ പി സംസ്ഥാന അധ്യക്ഷനപം നേമം മണ്ഡലത്തിലെ സ്ഥാനാര്‍ത്ഥിയുമായ രാജീവ് ചന്ദ്രശേഖര്‍. ശിവന്‍കുട്ടിയെക്കുറിച്ചൊന്നും പറയുന്നില്ല. ജനങ്ങള്‍ക്കെല്ലാം അറിയാം . അദ്ദേഹം പേടിച്ചിരിക്കുകയാണ്.
ശിവന്‍കുട്ടിക്ക് തന്നോടൊപ്പം മത്സരിക്കാന്‍ ഭയമാണ്. രാജീവ്കുമാര്‍ വന്നാല്‍ തനിക്കുള്ള വോട്ട് വിഘടിച്ച് പോകുമെന്നാണ് സി പി എം കരുതുന്നത്. ഈ തെരഞ്ഞെടുപ്പില്‍ 100 ശതമാനവും ശിവന്‍കുട്ടി തോല്‍ക്കും. താനല്ല തോല്‍പ്പിക്കുന്നത്, മറിച്ച് തങ്ങളെ വഞ്ചിച്ച ജനങ്ങളാണ്. പത്ത് കൊല്ലം എംഎല്‍എയും മന്ത്രിയും മേയറും ആയിരുന്നിട്ട് നേമത്തിനായി ഒന്നും ചെയ്യാത്ത ആളാണ് ശിവന്‍കുട്ടി എന്നും രാജീവ് ചന്ദ്രശേഖര്‍ കുറ്റപ്പെടുത്തി.
നേമം മണ്ഡലത്തില്‍ സ്വതന്ത്രനായി മത്സരിക്കുന്ന സ്ഥാനാര്‍ത്ഥി സിപിഎമ്മിന്റെ ബ്രാഞ്ച് സെക്രട്ടറി ആണ്. അദ്ദേഹത്തിന്റെ പേര് രാജീവെന്ന് ആയത് കൊണ്ടാണ് മത്സരിക്കുന്നത്. ജനങ്ങളുടെ ശ്രദ്ധ തിരിക്കാനാണ് ഡീല്‍ എന്ന ആരോപണം കോണ്‍ഗ്രസും സിപിഎമ്മും ഉയര്‍ത്തുന്നത്. ഈ തെരഞ്ഞെടുപ്പില്‍ അവരുടെ തന്ത്രങ്ങള്‍ നടക്കില്ല. ജനങ്ങള്‍ക്ക് വികസനമാണ് വേണ്ടത്.
കഴിഞ്ഞ 10 കൊല്ലം അവസരം കിട്ടിയപ്പോള്‍ സിപിഎം എന്താണ് ചെയ്തത്? കോണ്‍ഗ്രസ് ഇന്ത്യ ഭരിച്ചപ്പോള്‍ കേരളത്തില്‍ നിന്നും എട്ട് മന്ത്രിമാര്‍ ഉണ്ടായിരുന്നു. അവര്‍ എന്ത് ചെയ്തു?. ഇതൊക്കെ സംസാരിക്കാന്‍ ഈ പാര്‍ട്ടികള്‍ക്ക് ധൈര്യം ഉണ്ടാവണം.പേടിച്ചാണ് പുതിയ ഓരോ ആരോപണങ്ങള്‍ സൃഷ്ടിച്ച് ജനങ്ങളുടെ കണ്ണ് വെട്ടിക്കുന്നത്. യുവ തലമുറയാണ് മാറ്റത്തിന്റെ കാറ്റലിസ്റ്റ് ആയി മാറുന്നത്. പഴയ കാലത്തെ വിവാദ രാഷ്‌ട്രീയം മാറ്റണമെങ്കില്‍ ഈ പുതു തലമുറ ആണ് മുന്നോട്ട് വരേണ്ടത്. അവര്‍ മുന്നോട്ട് വരുമെന്നാണ് പ്രതീക്ഷയെന്നും രാജീവ് ചന്ദ്രശേഖര്‍ പറഞ്ഞു.
