ആലുവ: കേരളത്തിന്റെ രാഷ്ട്രീയ ചരിത്രം നിര്‍ണായക വഴിത്തിരിവിലാണെന്നും തെരഞ്ഞെടുപ്പിന് ശേഷം വലിയ മാറ്റങ്ങളുണ്ടാകുമെന്നും ബിജെപി ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടി പറഞ്ഞു. ആലുവ നിയോജക മണ്ഡലം എന്‍ഡിഎ സ്ഥാനാര്‍ത്ഥി എം.എ ബ്രഹ്‌മരാജിന്റെ തെരഞ്ഞെടുപ്പ് കണ്‍വെന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മാറിമാറി ഭരണം നടത്തുന്ന ഇടത്-വലത് മുന്നണികള്‍ ജനങ്ങളുടെ പ്രതീക്ഷകള്‍ നിറവേറ്റുന്നതില്‍ പരാജയപ്പെട്ടു. വികസന കാര്യങ്ങളില്‍ വ്യക്തമായ ദിശാബോധം ഇല്ലാത്തതും അടിസ്ഥാന സൗകര്യ വികസനത്തിലെ മന്ദഗതിയും സംസ്ഥാനത്തെ പിന്നോട്ട് നയിച്ചു. രാജ്യത്ത് പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ നടപ്പാക്കുന്ന വികസന-ക്ഷേമ പദ്ധതികള്‍ കേരളത്തിലും ശക്തമായി എത്തിക്കേണ്ടത് കാലത്തിന്റെ ആവശ്യമാണെന്ന് അദ്ദേഹം പറഞ്ഞു.
എന്‍ഡിഎ മണ്ഡലം കണ്‍വീനര്‍ അഡ്വ. പി. ഹരിദാസ് അധ്യക്ഷനായി. ബിജെപി മേഖല വൈസ് പ്രസിഡന്റുമാരായ എന്‍.പി ശങ്കരന്‍കുട്ടി, എം.എന്‍. ഗോപി, ട്വന്റി 20 സംസ്ഥാന ഉപാദ്ധ്യക്ഷന്‍ ഗോപകുമാര്‍, ബിഡിജെഎസ് സംസ്ഥാന ജനറല്‍ സെക്രട്ടറി ഏ.ബി. ജയപ്രകാശ്, എന്‍കെസി സംസ്ഥാന ജനറല്‍ സെക്രട്ടറി എം.എന്‍. ഗിരി, ജെഎസ്എസ് ജില്ലാ പ്രസിഡന്റ് ഇബ്രാഹിം ആലുവ, ബിജെപി ജില്ലാ വൈസ് പ്രസിഡന്റ് എ. സെന്തില്‍ കുമാര്‍, ജില്ലാ ജനറല്‍ സെക്രട്ടറി ഷാജി മൂത്തേടന്‍, ആലുവ മണ്ഡലം പ്രസിഡന്റ് എം.യു. ഗോപു കൃഷ്ണന്‍, നെടുമ്പാശേരി മണ്ഡലം പ്രസിഡന്റ് മിഥുന്‍ ചെങ്ങമനാട്, സ്ഥാനാര്‍ത്ഥി എം.എ ബ്രഹ്‌മരാജ് എന്നിവര്‍ സംസാരിച്ചു.
