പാലക്കാട്: പ്രചാരണത്തിരക്കിനിടയില്‍ പ്രവര്‍ത്തകര്‍ക്കൊപ്പം പിറന്നാളാഘോഷിച്ച് പാലക്കാട് മണ്ഡലം എന്‍ഡിഎ സ്ഥാനാര്‍ഥി ശോഭാസുരേന്ദ്രന്‍. സാധാരണ പിറന്നാള്‍ ആഘോഷിക്കാറില്ലെങ്കിലും തെരഞ്ഞെടുപ്പ് ചൂടിനിടയില്‍ പ്രവര്‍ത്തകര്‍ സര്‍പ്രൈസ് ആഘോഷമൊരുക്കുകയായിരുന്നു. ഇന്നലെ ഉച്ചയോടെ നഗരത്തിലെ സ്വകാര്യ ഓഡിറ്റോറിയത്തിലാണ് ശോഭാസുരേന്ദ്രന്റെ 52-ാം പിറന്നാള്‍ ആഘോഷം നടന്നത്.
പ്രചാരണത്തിനിടെയെത്തിയ ശോഭാ സുരേന്ദ്രനെ നേതാക്കളും പ്രവര്‍ത്തകരും പൊന്നാടയണിയിച്ചും, പൂക്കള്‍ നല്‍കിയും ആശംസകളറിയിച്ചു. തുടര്‍ന്ന് കേക്ക് മുറിക്കുകയും ചെയ്തു. ആദ്യം മുന്‍ നഗരസഭ ചെയര്‍പേഴ്സണ്‍ പ്രമീള ശശിധരന് കേക്ക് നല്കി. മീനമാസത്തിലെ ഉത്രട്ടാതി നാളില്‍ ജനിച്ച താനിതുവരെ പിറന്നാളാഘോഷിച്ചിട്ടില്ലെന്ന് ശോഭാസുരേന്ദ്രന്‍ പറഞ്ഞു. താന്‍ മൂലം മറ്റുള്ളവര്‍ക്ക് സന്തോഷമുണ്ടാവുമെങ്കില്‍ അതാണ് തന്റെയും സന്തോഷമെന്ന് ശോഭാസുരേന്ദ്രന്‍ പറഞ്ഞു.
പ്രചാരണത്തിനിടെ ഒരു അമ്മ തനിക്ക് സാരിയും ബ്ലൗസും തന്ന് അനുഗ്രഹിച്ചു. ഒട്ടും പ്രതീക്ഷിക്കാതെ ലഭിച്ച സമ്മാനമാണെന്നും അവര്‍ കൂട്ടിച്ചേര്‍ത്തു. എല്ലാസമയവും ജനങ്ങള്‍ക്കൊപ്പം പ്രവര്‍ത്തിക്കുയാണ് ലക്ഷ്യം. എല്ലാ പാര്‍ട്ടിക്കാര്‍ക്കും അമ്മമാര്‍ക്കും ജനങ്ങള്‍ക്കും വേണ്ടിയാണ് വിജയിച്ച് നിയമസഭയില്‍ പോവുക. തന്റെ പത്താമത്തെ തെരഞ്ഞെടുപ്പാണിതെന്നും വലിയ ഭൂരിപക്ഷത്തില്‍ വിജയിക്കുമെന്നും അവര്‍ വ്യക്തമാക്കി.തുടര്‍ന്ന് പ്രവര്‍ത്തകര്‍ക്കൊപ്പമിരുന്ന് സദ്യ കഴിച്ച ശേഷമാണ് മടങ്ങിയത്.
ഉച്ചയ്‌ക്ക് ശേഷം വെണ്ണക്കരയില്‍ നടന്ന കുടുംബസംഗമത്തിനിടെ പ്രവര്‍ത്തകര്‍ കേക്ക് മുറിച്ച് പിറന്നാള്‍ ആഘോഷമാക്കി. നഗരസഭ ചെയര്‍മാന്‍ പി.സ്മിതേഷ്, വൈസ് ചെയര്‍പേഴ്സണ്‍ ടി.ബേബി, മഹിളാമോര്‍ച്ച സംസ്ഥാന വൈസ് പ്രസിഡന്റ് സിന്ധുരാജന്‍, പാലക്കാട് മണ്ഡലം പ്രസിഡന്റ് എം.ശശികുമാര്‍,ജന.സെക്രട്ടറിമാരായ ആര്‍.ജി.മിലന്‍, ആര്‍.അശോക്, ബിജെപി ദേശീയ കൗണ്‍സില്‍ അംഗം എന്‍.ശിവരാജന്‍, മഹിളാമോര്‍ച്ച ജില്ലാ അധ്യക്ഷ കവിത മേനോന്‍, നേതാക്കളായ എം.സുനില്‍,എ.ജെ.ശ്രീനി,അഡ്വ.എസ്. ശാന്താദേവി തുടങ്ങിയവര്‍ പങ്കെടുത്തു.
