ന്യൂദൽഹി: ചൈനയിലെ ഇന്ത്യയുടെ അടുത്ത അംബാസഡറായി സീനിയർ ഇന്ത്യൻ ഫോറിൻ സർവീസ് (ഐഎഫ്എസ്) വിക്രം കെ ദൊരസ്വാമിയെ നിയമിച്ചതായി വിദേശകാര്യ മന്ത്രാലയം (എംഇഎ) വ്യാഴാഴ്ച പ്രഖ്യാപിച്ചു. 2020 ലെ ഗാൽവാൻ താഴ്വരയിലെ സംഘർഷത്തെത്തുടർന്ന് ന്യൂദൽഹിയും ബീജിംഗും അകൽച്ച വന്നെങ്കിലും ഇപ്പോൾ ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്താൻ ശ്രമിക്കുന്ന സമയത്താണ് പുതിയ നിയമനം.
“നിലവിൽ യുണൈറ്റഡ് കിംഗ്ഡത്തിലെ ഇന്ത്യൻ ഹൈക്കമ്മീഷണറായ വിക്രം കെ ദൊരസ്വാമിയെ പീപ്പിൾസ് റിപ്പബ്ലിക് ഓഫ് ചൈനയിലെ അടുത്ത ഇന്ത്യൻ അംബാസഡറായി നിയമിച്ചു. അദ്ദേഹം ഉടൻ തന്നെ ഈ നിയമനം ഏറ്റെടുക്കുമെന്ന് പ്രതീക്ഷിക്കുന്നു,” – വിദേശകാര്യ മന്ത്രാലയം ഒരു പ്രസ്താവനയിൽ പറഞ്ഞു.
ആരാണ് വിക്രം കെ ദൊരസ്വാമി ?
1992 ലെ ഐ.എഫ്.എസ്. ഉദ്യോഗസ്ഥനായ ദൊരസ്വാമി ദൽഹി യൂണിവേഴ്സിറ്റിയിൽ നിന്ന് ചരിത്രത്തിൽ ബിരുദാനന്തര ബിരുദം നേടി. ഐ.എഫ്.എസിൽ ചേരുന്നതിന് മുമ്പ് ദൊരസ്വാമി ഒരു വർഷം പത്രപ്രവർത്തകനായി ജോലി ചെയ്തിരുന്നു. 1994 മെയ് മാസത്തിൽ ഹോങ്കോങ്ങിലേക്കുള്ള തേർഡ് സെക്രട്ടറിയായി നിയമിതനായപ്പോഴാണ് അദ്ദേഹത്തിന്റെ ആദ്യ നിയമനം. അവിടെ, ന്യൂ ഏഷ്യ യേൽ-ഇൻ-ഏഷ്യ ലാംഗ്വേജ് സ്കൂളിൽ നിന്ന് ചൈനീസ് ഭാഷയിൽ എലക്ടീവ് ഡിപ്ലോമ നേടി.
1996 സെപ്റ്റംബറിൽ അദ്ദേഹം നാല് വർഷത്തെ സേവനത്തിനായി ബീജിംഗിലേക്ക് മാറി. തുടർന്ന് വിദേശകാര്യ മന്ത്രാലയത്തിലെ ഡെപ്യൂട്ടി ചീഫ് ഓഫ് പ്രോട്ടോക്കോൾ (സെറിമോണിയൽസ്) ആയി നിയമിതനായി. മാഡ്രിൻ, ഫ്രഞ്ച്, കൊറിയൻ എന്നിവയുൾപ്പെടെ ഒന്നിലധികം ഭാഷകൾ സംസാരിക്കാൻ കഴിയുന്ന വിക്രം കെ ദൊരസ്വാമി പ്രധാനമന്ത്രിയുടെ ഓഫീസിലും (പിഎംഒ) സേവനമനുഷ്ഠിച്ചിട്ടുണ്ട്. കൂടാതെ പ്രധാനമന്ത്രിയുടെ പ്രൈവറ്റ് സെക്രട്ടറിയായും പ്രവർത്തിച്ചിട്ടുണ്ട്.
2011 ജൂലൈയിൽ സൗത്ത് ഏഷ്യൻ അസോസിയേഷൻ ഫോർ റീജിയണൽ കോ-ഓപ്പറേഷന്റെ ഡിവിഷന്റെ തലവനായി സേവനമനുഷ്ഠിക്കാൻ അദ്ദേഹം ദൽഹിയിലേക്ക് മടങ്ങി. 2012 ഒക്ടോബർ മുതൽ 2014 ഒക്ടോബർ വരെ രണ്ട് വർഷക്കാലം, ദോരസ്വാമി വിദേശകാര്യ മന്ത്രാലയത്തിന്റെ അമേരിക്കാസ് ഡിവിഷന്റെ ജോയിന്റ് സെക്രട്ടറിയായി സേവനമനുഷ്ഠിച്ചു.
2014 ഒക്ടോബറിൽ അദ്ദേഹത്തെ ഉസ്ബെക്കിസ്ഥാനിലെ ഇന്ത്യൻ അംബാസഡറായി നിയമിച്ചു. 2015 ഏപ്രിലിൽ, 2015 ഏപ്രിലിൽ ദോറസ്വാമിയെ റിപ്പബ്ലിക് ഓഫ് കൊറിയയിലേക്കുള്ള ഇന്ത്യയുടെ സ്ഥാനപതിയായി നിയമിച്ചു. 2018 ജൂലൈയിൽ, അദ്ദേഹത്തെ ന്യൂഡൽഹിയിലേക്ക് നിയമിച്ചു, അവിടെ അദ്ദേഹം ബംഗ്ലാദേശ്, മ്യാൻമർ ഡിവിഷന്റെ തലവനായി സേവനമനുഷ്ഠിച്ചു.
2020 ഒക്ടോബർ മുതൽ 2022 സെപ്റ്റംബർ വരെ ദൊരസ്വാമി ബംഗ്ലാദേശിലെ ഇന്ത്യൻ ഹൈക്കമ്മീഷണറായി സേവനമനുഷ്ഠിച്ചു. 2022 സെപ്റ്റംബർ 23 ന് യുണൈറ്റഡ് കിംഗ്ഡത്തിലെ ഇന്ത്യൻ ഹൈക്കമ്മീഷണറായി അദ്ദേഹം ചുമതലയേറ്റു.
