തിരുവനന്തപുരം: അടുത്ത് വരുന്ന നിയമസഭാ തെരഞ്ഞെടുപ്പിനോടനുബന്ധിച്ച് ചീഫ് ഇലക്ടറല്‍ ഓഫീസറുടെ കാര്യാലയത്തില്‍ രണ്ട് ഐ എ എസ് ഉദ്യാഗസ്ഥരെ അഡീഷണല്‍ സിഇഒമാരായി നിയമിച്ചു. പി.ബി.നൂഹ്, ജെറോമിക് ജോര്‍ജ് എന്നിവരെയാണ് താത്കാലികമായി നിയമിച്ചത്.
തെരഞ്ഞെടുപ്പ് (പെരുമാറ്റച്ചട്ടം, മീഡിയ) വിഭാഗത്തിലാണ് പി.ബി. നൂഹിനെ നിയമിച്ചത്.തെരഞ്ഞെടുപ്പ് (ധനവിനിയോഗം, ഐടി) വിഭാഗത്തിലാണ് ജെറോമിക് ജോര്‍ജ്്. ഇത് കൂടാതെ ഹര്‍ഷില്‍ ആര്‍. മീണ, മിഷല്‍ സാഗര്‍ ഭരത് എന്നിവരെ ഡെപ്യൂട്ടി സിഇഒമാരായും നിയമിച്ചിട്ടുണ്ട്.
തെരഞ്ഞെടുപ്പ് പ്രക്രിയ പൂര്‍ത്തിയാക്കുന്നതുവരെയാണ് ഈ ക്രമീകരണം.പെരുമാറ്റച്ചട്ടവുമായി ബന്ധപ്പെട്ട അനുമതി നല്‍കലും ലംഘനങ്ങള്‍ പരിശോധിക്കലുമാണ് പി.ബി.നൂഹിന്റെ വിഭാഗത്തിന്റെ പ്രധാന ചുമതല.
തെരഞ്ഞെടുപ്പ് കാലയളവിലെ ധനവിനിയോഗ നിരീക്ഷണവും എന്‍ഫോഴ്‌സ്‌മെന്റ് ഏജന്‍സികളെ സംബന്ധിച്ച കാര്യങ്ങളും തപാല്‍ വോട്ടുകള്‍, ഇലക്ഷന്‍ കമ്മീഷനുമായി ബന്ധപ്പെട്ട വെബ്‌സൈറ്റ്, ആപ്പുകളുടെ വിനിയോഗം എന്നിവയാണ് ജെറോമിക് ജോര്‍ജിന്റെ ചുമതലകള്‍.
