ബാഗ്ദാദ്: ഇറാനെതിരെ അമേരിക്കയും ഇസ്രയേലും നടത്തുന്ന യുദ്ധം മറ്റ് ഭാഗങ്ങളിലേക്ക് കൂടി പടരുകയാണ്. മാര്‍ച്ച് 12 വ്യാഴാഴ്ച ഇറാഖിലുള്ള ബ്രിട്ടന്റെ വ്യോമകേന്ദ്രത്തിന് നേരെ ഇറാന്റെ ചാവേര്‍ ഡ്രോണ്‍ ആക്രമണമുണ്ടായി. ഷാഹെദ് 136 ഡ്രോണ്‍ ആണ് ബ്രിട്ടന്റെ വ്യോമബേസ് തകര്‍ത്തത്.
ഒരു കൂട്ടം ചാവേര്‍ ഡ്രോണുകള്‍ കൂട്ടത്തോടെ ബ്രിട്ടന്റെ വ്യോമബേസിലേക്ക് നീങ്ങുകയായിരുന്നു. അതില്‍ രണ്ടെണ്ണത്തിനെ ബ്രിട്ടന്റെ വ്യോമപ്രതിരോധ സംവിധാനം വീഴ്‌ത്തിയെങ്കിലും മറ്റ് ഡ്രോണുകള്‍ വ്യോമബേസില്‍ പതിക്കുകയായിരുന്നു.
മധ്യേഷ്യയിലെ ഇറാന്റെ യുദ്ധതന്ത്രത്തിന് പിന്നില്‍ റഷ്യയുടെ കരങ്ങളുണ്ടെന്ന് ബ്രിട്ടീഷ് പ്രതിരോധസെക്രട്ടറി കുറ്റപ്പെടുത്തി. റഷ്യക്കാരില്‍ നിന്നാണ് ഇറാന്‍ ഡ്രോണ്‍ തന്ത്രം പഠിച്ചതെന്ന് ബ്രിട്ടന്റെ ലഫ്.ജനറല്‍ നിക് പെറി കറ്റപ്പെടുത്തി. നേരത്തെ സൈപ്രസിലും ബ്രിട്ടന്റെ വ്യോമബേസ് തകര്‍ക്കപ്പെട്ടിരുന്നു. എന്നാല്‍ ഈ ആക്രമണത്തിന് പിന്നില്‍ തങ്ങളല്ലെന്നാണ് ഇറാന്‍ അവകാശപ്പെടുന്നത്.
ഷാഹെദ് ഡ്രോണിന് മൂര്‍ച്ച കൂട്ടുന്നത് റഷ്യയുടെ ജിപിഎസ്
ഷാഹെദ് ഡ്രോണുകളെ ലക്ഷ്യസ്ഥാനത്തേക്ക് നയിക്കുന്നത് റഷ്യയുടെ ഗ്ലോനാസ് എന്ന ജിപിഎസ് സംവിധാനം കുടിയാണ്. ഇതിന് പുറമെ ഇറാന്റെ സിവിലിയന്‍ ഗ്രേഡ് ജിപിഎസും പ്രവര്‍ത്തിക്കുന്നു. ഇത് രണ്ടും ഒരേ സമയം പ്രവര്‍ത്തിക്കുന്നതിനാല്‍ ഷാഹെദ് ഡ്രോണിനെ വകവരുത്തുക ബുദ്ധിമുട്ടാണ്. 2500 കിലോമീറ്റര്‍ വരെ അകലെയുള്ള ലക്ഷ്യസ്ഥാനത്ത് കൃത്യമായി ഷാഹെദ് ഡ്രോണിന് പറന്ന് എത്തിച്ചേരാന്‍ കഴിയുന്നത് റഷ്യയുടെ ഈ ജിപിഎസ് സംവിധാനത്തിന്റെ സഹായം കാരണമാണെന്ന് ആരോപണമുണ്ട്.
