തിരുവനന്തപുരം: തെരഞ്ഞെടുപ്പ് പ്രഖ്യാപനം അടുക്കുന്നതോടെ കോണ്‍ഗ്രസില്‍ ഗ്രൂപ്പ് യുദ്ധവും മുറുകുന്നു. സ്ഥാനാര്‍ത്ഥികളെ ഉടന്‍ പ്രഖ്യാപിക്കുമെന്ന് പറഞ്ഞ കെപിസിസി പ്രസിഡന്റ് സണ്ണി ജോസഫ് ഇപ്പോള്‍ പറയുന്നത് തെരഞ്ഞെടുപ്പ് തീയതി പ്രഖ്യാപിക്കട്ടെയെന്ന ഒഴുക്കന്‍ മട്ടിലുള്ള പ്രതികരണവും. പാര്‍ട്ടിയില്‍ തന്നെ വിമര്‍ശനം ഉയര്‍ന്നതോടെ അടുത്ത ദിവസങ്ങളില്‍ കുറച്ച് സീറ്റുകള്‍ പ്രഖ്യാപിക്കാനുള്ള തത്രപ്പാടിലാണ് കെപിസിസി. ഇതിനകം പാര്‍ട്ടി പ്രഖ്യാപിക്കാതെ തന്നെ ചിലര്‍ സ്ഥാനാര്‍ത്ഥികള്‍ ആയി ഫ്‌ലക്‌സും ചുമരെഴുത്തും തുടങ്ങി.
വി.ഡി. സതീശന്റെ പുതുയുഗ യാത്രയുടെ സമാപനം തിരുവനന്തപുരത്ത് എത്തുമ്പോള്‍ ആദ്യ ഘട്ട സ്ഥാനാര്‍ത്ഥികളെ പ്രഖ്യാപിക്കാനായിരുന്നു നീക്കം. എന്നാല്‍ കെ.സി. വേണുഗോപാലും, രമേശ് ചെന്നിത്തലയും സണ്ണി ജോസഫും വി.ഡി. സതീശനുമൊന്നും സമവായത്തില്‍ എത്താന്‍ സാധിച്ചില്ല. ആലപ്പുഴ ജില്ലയില്‍ കെ.സി. വേണുഗോപാലും രമേശ് ചെന്നിത്തലയും തമ്മിലുള്ള ഏറ്റുമുട്ടല്‍ നേതൃത്വം പലവട്ടം ഇടപെട്ടിട്ടും പരിഹരിക്കാന്‍ സാധിച്ചില്ല. ജില്ലയിലെ നേതാക്കളെ തങ്ങളുടെ കൈപ്പടിയില്‍ ഒതുക്കാനുള്ള ഗ്രൂപ്പ് യുദ്ധമാണ് അവിടെ നടക്കുന്നത്. മറ്റൊന്നും നോക്കാതെ ജയമാണ് ഇക്കുറി വേണ്ടതെന്ന് കേന്ദ്ര നേതൃത്വം ആവര്‍ത്തിച്ച് പറഞ്ഞിട്ടും ആലപ്പുഴയില്‍ രക്ഷയില്ല.
സ്ഥാനാര്‍ത്ഥി നിര്‍ണയത്തില്‍ പതിവുപോലെ പോസ്റ്റര്‍ യുദ്ധവും തുടങ്ങി. ആറന്മുളയില്‍ അബിന്‍ വര്‍ക്കിയെ വേണ്ടെന്നാണ് കോണ്‍ഗ്രസില്‍ ആദ്യം പ്രത്യക്ഷപ്പെട്ട പോസ്റ്റര്‍. തൃത്താലയില്‍ വി.ടി. ബലറാമിന്റെ പ്രമാണിത്തം മുതിര്‍ന്ന നേതാക്കളെ അസ്വസ്ഥരാക്കുന്നു. കുന്നത്തൂരില്‍ സ്ഥാനാര്‍ത്ഥി നിര്‍ണയത്തില്‍ പ്രതിഷേധിച്ച് കോണ്‍ഗ്രസ് മണ്ഡലം പ്രസിഡന്റ് സത്യാഗ്രഹം നടത്തുമെന്ന് പ്രഖ്യാപിച്ചിട്ടുണ്ട്.
പാലക്കാട് ഷാഫി പറമ്പിലിന്റെ ആധിപത്യം അവസാനിപ്പിക്കണമെന്ന് ഗ്രൂപ്പ് മറന്ന് എല്ലാവരും പറയുന്നു. ഷാഫിയുടെ ഇടപെടലിലൂടെയാണ് മാങ്കൂട്ടത്തിലിന് സീറ്റ് നല്‍കിയതും പാര്‍ട്ടിക്ക് നാണക്കേട് ഉണ്ടാക്കി വച്ചതും. തെരഞ്ഞെടുപ്പില്‍ രാഹുല്‍ മാങ്കൂട്ടത്തിലിന്റെ ലൈംഗിക അതിക്രമ കേസ് മറ്റ് പാര്‍ട്ടികള്‍ മുഖ്യ വിഷയമാക്കും. ഇതിന് ഉത്തരവാദി ഷാഫി പറമ്പിലാണെന്ന് പാലക്കാട്ടെ മുതിര്‍ന്ന നേതാക്കള്‍ പറയുന്നു. കൊച്ചി കോര്‍പറേഷനിലെ മേയര്‍ തെരഞ്ഞെടുപ്പില്‍ കെപിസിസി ജനറല്‍ സെക്രട്ടറി ദീപ്തി മേരി വര്‍ഗീസിനെ തഴഞ്ഞതില്‍ ഒരു വിഭാഗം പ്രതിഷേധത്തിലാണ്.
തിരുവനന്തപുരം മണ്ഡലത്തില്‍ ടി.പി. ജോണിനെ സ്ഥാനാര്‍ത്ഥിയാക്കിയാല്‍ ഒരുകൂട്ടം കോണ്‍ഗ്രസുകാര്‍ രാജിവെക്കുമെന്ന് നേതൃത്വത്തെ അറിയിച്ചിട്ടുണ്ട്. സീറ്റിന് വേണ്ടി സമ്മര്‍ദം ചെലുത്തുന്ന വി.എസ്. ശിവകുമാറാണ് ഇതിന് പിന്നിലെന്ന് സിഎംപി ആക്ഷേപം ഉന്നയിക്കുന്നു. മുതിര്‍ന്നവരും യുവാക്കളും തമ്മിലുള്ള പോരും ഒരു ഭാഗത്ത് മുറുകുന്നു. സീറ്റ് വീതം വയ്‌പ്പില്‍ യുവാക്കളെ പരിഗണിക്കണമെന്ന ആവശ്യത്തോട് കെപിസിസി മുഖം തിരിച്ച് നില്‍ക്കുന്നുവെന്നാണ് പരിഭവം.
ജന്മഭൂമി ഓണ്‍ലൈന്‍