തിരുവനന്തപുരം: നഗരൂരില് നടുറോഡില് കാര് റോഡിന് കുറുകെയിട്ട് പൊലീസ് ജീപ്പ് തടഞ്ഞ്
സിപിഎം-ഡിവൈഎഫ്ഐ പ്രവര്ത്തകരുടെ ഭീഷണി.ഫ്ലക്സ് ബോര്ഡ് നശിപ്പിച്ച കേസിലെ പ്രതികള്ക്ക് നോട്ടീസ് നല്കി മടങ്ങിയ പൊലീസ് ജീപ്പിനെയാണ് കാറിലെത്തിയ സംഘം തടഞ്ഞത്.
ജീപ്പിലുണ്ടായിരുന്ന എസ്എച്ച്ഒ ഉള്പ്പെടെയുള്ള ഉദ്യോഗസ്ഥരെ കാറിലെത്തിയ സിപിഎം-ഡിവൈഎഫ്ഐ പ്രവര്ത്തകര് അസഭ്യം പറയുകയും ഭീഷണിപ്പെടുത്തുകയും ആക്രോശിക്കുകയും ചെയ്യുന്ന ദൃശ്യങ്ങള് പുറത്തുവന്നു.
മന്ത്രി വീണ ജോര്ജിനെ കെ എസ് യു പ്രവര്ത്തകര് ആക്രമിച്ചെന്ന് ആരോപിച്ച് കഴിഞ്ഞ ദിവസം നടന്ന ഡി വൈ എഫ് ഐ പ്രകടനത്തിനിടെ കോണ്ഗ്രസിന്റെ ഫ്ലക്സ് നശിപ്പിച്ച സംഭവത്തില് പരാതിയെ തുടര്ന്ന് പൊലീസ് കേസെടുത്തിരുന്നു. പ്രതി പട്ടികയില് പേരുള്ളവര്ക്ക് സ്റ്റേഷനില് ഹാജരാകാന് നോട്ടീസ് നല്കി മടങ്ങുന്നതിനിടെയാണ് സംഭവമുണ്ടായത്.
എന്നാല് പൊലീസ്, പ്രവര്ത്തകരുടെ വീട്ടില് കയറി അതിക്രമം കാട്ടിയെന്നാണ് സിപിഎം ആരോപണം. പൊലീസുകാര് അപമര്യാദയായി പെരുമാറിയെന്നും ആരോപണമുണ്ട്.പൊലീസ് ജീപ്പ് തടഞ്ഞ് ഭീഷണിപ്പെടുത്തിയ ശേഷം നഗരൂര് പൊലീസ് സ്റ്റേഷനിലേക്കും ഡി വൈ എഫ് ഐ പ്രവര്ത്തകരെത്തി.പ്രദേശത്തെ സി പി എം പ്രവര്ത്തകരും സ്റ്റേഷനിലെത്തി. തുടര്ന്ന് ഡി വൈ എസ് പി എത്തിയാണ് രംഗം ശാന്തമാക്കിയത്.
