ഇടുക്കി: കുമളിയിൽ ഭീഷണി പ്രസംഗവുമായി സിപിഎം പീരുമേട് ഏരിയാ സെക്രട്ടറി. ചെത്തിമിനുക്കിയ വാരികുന്തങ്ങൾ സിപിഎം ഓഫീസിൽ സൂക്ഷിച്ചിട്ടുണ്ട്. ഇടതുപക്ഷത്തിന് നേരെ പ്രതിഷേധിക്കാൻ ഇറങ്ങിയാൽ തിരികെ വീട്ടിലെത്തില്ലെന്ന് പറഞ്ഞിട്ട് പോരണമെന്നാണ് എസ്. സാബുവിന്റെ ഭീഷണി. ആരോഗ്യമന്ത്രി വീണാ ജോർജിനെ അനുകൂലിച്ച് കുമളിയിൽ നടത്തിയ പരിപാടിയിലാണ് ഈ ഭീഷണി.
ഇന്നലെ വൈകുന്നേരമായിരുന്നു പ്രസംഗം നടന്നത്. കഴിഞ്ഞ ദിവസങ്ങളിൽ കെ എസ് യു, യൂത്ത് കോൺഗ്രസ് പ്രവർത്തകർ വീണാജോർജിനെ ആക്രമിച്ചുവെന്ന് ആരോപിച്ചായിരുന്നു പ്രതിഷേധ പരിപാടി സിപിഎം സംഘടിപ്പിച്ചത്. ഇടതുപക്ഷത്തിന് നേരെ പ്രതിഷേധിക്കാനി റങ്ങിയാൽ നേരെ ചൊവ്വേ വീട്ടിൽ പോകില്ല. വായിൽ കോലിട്ട് കിള്ളാൻ നോക്കിയിട്ടുണ്ടെങ്കിൽ നെഞ്ചിൽ കയറിയിരുന്ന് പൊങ്കാലയിടാൻ ഞങ്ങൾക്ക് അ റിയാമെന്നും സാബു പറഞ്ഞു.
പ്രസംഗ കേട്ടുനിന്ന അണികൾ കൈയടിച്ച് സാബുവിനെ പ്രോത്സാഹിപ്പിക്കുന്നുമുണ്ടായിരുന്നു. പ്രസംഗ വീഡിയോ വ്യാപകമായി പ്രചരിക്കുന്നുണ്ട്. ഈ വിഷയിൽ പാർട്ടി നേതൃത്വം പ്രതികരിക്കാൻ തയാറായിട്ടില്ല. ഇടുക്കിയിൽ എം.എം മണിയുടെ ഭാഗത്ത് നിന്നുമാണ് ഇത്തരം ഭീഷണികൾ നേരത്തേ വന്നിരുന്നത്.
