കാസര്‍കോട്: മഞ്ചേശ്വരം നിയമസഭാ മണ്ഡലത്തിലെ വോട്ടര്‍ പട്ടികയില്‍ വ്യാപക ക്രമക്കേട് നടന്നുവെന്ന ആരോപണം ഉന്നയിച്ച എംഎല്‍എ എ.കെ.എം.അഷറഫിനോട് സംയുക്ത വോട്ടര്‍ പട്ടിക പരിശോധനയ്ക്ക് ബിജെപി മുന്‍ സംസ്ഥാന പ്രസിഡന്റ് കെ.സുരേന്ദ്രന്‍ വെല്ലുവിളിച്ചു.
കര്‍ണാടക അതിര്‍ത്തി പ്രദേശങ്ങളില്‍ നിന്നും കള്ളവോട്ടുകള്‍ മുസ്ലീം ലീഗ് വോട്ടര്‍ പട്ടികയില്‍ ചേര്‍ത്തിട്ടുണ്ടെന്നും, ഇക്കാര്യം ബിജെപി സ്വതന്ത്രമായി പരിശോധിച്ചുവരികയാണ്. വോട്ടര്‍ പട്ടികയുമായി ബന്ധപ്പെട്ട എല്ലാ പരാതികളും തുറന്ന മനസ്സോടെ പരിശോധിക്കാന്‍ തയ്യാറാണെന്നും ആരോപണങ്ങളില്‍ വാസ്തവമുണ്ടെങ്കില്‍ സംയുക്ത പരിശോധനയ്ക്ക് എതിര്‍പ്പില്ലെന്നും അദ്ദേഹം വ്യക്തമാക്കി.
വോട്ടര്‍ പട്ടികയില്‍ നിന്നും മണ്ഡലത്തില്‍ താമസമില്ലാത്തവരെ തള്ളാനാണ് ബിജെപി അപേക്ഷ നല്‍കിയത്. മഞ്ചേശ്വരം മണ്ഡലത്തില്‍ വോട്ട് തള്ളാന്‍ ലഭിച്ച അപേക്ഷ 124മാത്രമാണ്. അതില്‍ 92 അപേക്ഷ നല്‍കിയത് യുഡിഎഫ് ആണ്. ചില ബിഎല്‍ഒമാരെ കൂട്ട് പിടിച്ച് യുഡിഎഫ് വ്യാപകമായി കള്ളവോട്ട് ചേര്‍ത്തിട്ടുണ്ടെന്ന് കെ. സുരേന്ദ്രന്‍ പറഞ്ഞു.
ഇതിനിടെ, കണ്ണൂരില്‍ ആരോഗ്യ മന്ത്രി വീണാ ജോര്‍ജിന് നേരെയുണ്ടായതായി പറയുന്ന സംഭവം ‘വ്യാജ ഏറ്റുമുട്ടല്‍’ ആണെന്നും, യഥാര്‍ത്ഥത്തില്‍ നടക്കുന്നത് ഒരു സമര നാടകമാണെന്നും കെ.സുരേന്ദ്രന്‍ ആരോപിച്ചു. സര്‍ക്കാരിനെതിരെ ഇത്രയും കാലം കോണ്‍ഗ്രസ് എന്ത് പ്രതിഷേധമാണ് നടത്തിയതെന്ന് അദ്ദേഹം ചോദിച്ചു. ഇപ്പോള്‍ നടക്കുന്ന സമരങ്ങളും പ്രതിഷേധങ്ങളും എല്ലാം തെരഞ്ഞെടുപ്പ് അടുത്തപ്പോഴുണ്ടാകുന്ന രാഷ്‌ട്രീയ ആവേശത്തിന്റെ ഭാഗം മാത്രമാണെന്നും വിമര്‍ശനം ഉന്നയിച്ചു.
അതോടൊപ്പം വി.ഡി.സതീശന്‍ പിണറായി സര്‍ക്കാരിലെ ക്യാബിനറ്റ് മന്ത്രിയെ പോലെയാണ് പ്രവര്‍ത്തിക്കുന്നത്. അന്നത്തെ സര്‍ക്കാരിന്റെ ഭാഗമായിരുന്ന നേതാക്കള്‍ ഇപ്പോള്‍ നാടകീയ സമരങ്ങളുമായി രംഗത്തെത്തുന്നത് രാഷ്‌ട്രീയ ഇരട്ടത്താപ്പാണെന്നും അദ്ദേഹം പറഞ്ഞു. മന്ത്രിക്ക് പരിക്ക് പറ്റിയിട്ടില്ലെന്ന് താന്‍ പറയുന്നില്ലെന്നും എന്നാല്‍ പരിക്ക് ഉണ്ടായിട്ടുണ്ടോ എന്നത് സ്ഥിരീകരിക്കാന്‍ ആവശ്യമായ മെഡിക്കല്‍ പരിശോധനകള്‍ നടത്തട്ടെയെന്നും പരിശോധനാഫലങ്ങളുടെ അടിസ്ഥാനത്തിലാണ് കാര്യങ്ങള്‍ വിലയിരുത്തേണ്ടതെന്നും അദ്ദേഹം കൂട്ടിച്ചേര്‍ത്തു.
