മുംബൈ:തന്റെ സ്വതസിദ്ധമായ ലാളിത്യം നിറഞ്ഞ നര്‍മ്മത്തിലൂടെ സദസ്സിനെ ചിരിപ്പിച്ച് ബേസില്‍ ജോസഫ്. മികച്ച നടനുള്ള അവാര്‍ഡ് വാങ്ങിയ ശേഷമുള്ള പ്രസംഗത്തിലൂടെയാണ് ബേസില്‍ ജോസഫ് ബോളിവുഡ് സൂപ്പര്‍ താരങ്ങള്‍ ഉള്‍പ്പെട്ട സദസ്സിനെ ചിരിപ്പിച്ചത്.
ഇതുപോലുള്ള ഫാന്‍സി കോസ്റ്റ്യൂം അണിഞ്ഞ് പരിചയമില്ലെന്ന് (ഒരു വെളുത്ത കോട്ടായിരുന്നു വേഷം) ബേസില്‍ പറഞ്ഞപ്പോള്‍ എല്ലാവരും ചിരി തുടങ്ങി. “കോട്ടിട്ട് ഇങ്ങോട്ട് പുറപ്പെടുമ്പോള്‍ വലിയ അസ്വസ്ഥത ഉണ്ടായിരുന്നു. പക്ഷെ പലരും യു ലുക് ഗുഡ് (കാണാന്‍ നന്നായിരിക്കുന്നു) എന്ന് പറഞ്ഞപ്പോള്‍ സമാധാനമായി എന്ന് ബേസില്‍ പറഞ്ഞു. ഇങ്ങിനെയുള്ള കമന്‍റുകള്‍ക്ക് പറയാനുള്ള മറുപടിയായി യൂ ലുക് ഗുഡ് ടൂ (നിങ്ങളും കാഴ്ചയ്‌ക്ക് നന്നായിരിക്കുന്നു) എന്ന വരി മനസ്സില്‍ കാണാപ്പാഠം പഠിച്ചിരുന്നു. പക്ഷെ അവാര്‍ഡ് ദാനച്ചടങ്ങ് നടക്കുന്ന ഇടത്ത് എത്തിയപ്പോള്‍ ഏതോ ഒരു നടി ‘ഐ ലവ് യു’ (ഞാന്‍ നിന്നെ സ്നേഹിക്കുന്നു) എന്ന് ബേസിലിനോട് പറഞ്ഞത്രെ. ഉടനെ താന്‍ നേരത്തെ മനപാഠമായി പഠിച്ച ശൈലിയില്‍ ‘ഐ ലവ് യു ടൂ’ (ഞാന്‍ നിന്നെയും സ്നേഹിക്കുന്നു) എന്ന് അറിയാതെ ഒരു ഒഴുക്കിന് പറഞ്ഞുപോയെന്നും ബേസില്‍ പറഞ്ഞത് സദസ്സില്‍ വലിയ പൊട്ടിച്ചിരി ഉയര്‍ത്തി. സൂപ്പര്‍ താരമായ വിക്കി കൗശല്‍ ഉള്‍പ്പെടെ ഉള്ളവര്‍ പൊട്ടിപ്പൊട്ടിച്ചിരിക്കുന്നത് കാണാമായിരുന്നു. ഒരു കാര്യം പറയാന്‍ മറന്നുപോയി…ഈ മുറിയില്‍ ഇരിക്കുന്ന എല്ലാവരും കാണാന്‍ ഭംഗിയുള്ളവരാണെന്ന് ബേസില്‍ പറഞ്ഞപ്പോഴും സദസ്സില്‍ നിന്നും പൊട്ടിച്ചിരി ഉയര്‍ന്നു.
Basil Joseph❤️
— Christopher Kanagaraj (@Chrissuccess) February 24, 2026
ഒരു സംവിധായകന്‍ എന്ന നിലയ്‌ക്ക് ഞാന്‍ നര്‍മ്മ സിനിമകളാണ് എടുക്കാറുള്ളതെന്ന് പറഞ്ഞ ബേസില്‍, വിധു വിനോദ് ചോപ്രയുടെ ഓഫീസ് സന്ദര്‍ശനത്തിന്റെ ഒരു വീഡിയോ യൂട്യൂബ് ചാനലില്‍ കണ്ട ഓര്‍മ്മയും പങ്കുവെച്ചു. “അദ്ദേഹത്തിന്റെ ഓഫീസിന്റെ ചുമരുകളില്‍ പല കാര്യങ്ങളും എഴുതി ഫ്രെയിം ചെയ്തുവെച്ചിരുന്നെന്നും അതില്‍ ഒരു ഫ്രെയിമില്‍ ഒരു സിനിമയിലെ ഓരോ സീനും ഉണ്ടാക്കുന്നതിന് അത്യാവശ്യമായ മൂന്ന് കാര്യങ്ങള്‍ ചുരുക്കി എഴുതിയിരുന്നു. എല്‍എസ് ഡി എന്നാണെന്ന് തോന്നുന്നു.”. – ഇത് പറഞ്ഞുതീര്‍ത്തയുടന്‍ വലിയ അബദ്ധമാണ് താന്‍ പറഞ്ഞതെന്ന് ബേസിലിന് മനസ്സിലായി. കാരണം എല്‍എസ് ഡി(LSD) എന്നത് ഒരു മയക്കമരുന്നിന്റെ ചുരുക്കപ്പേരാണ്. ഉടനെത്തന്നെ ബേസില്‍ അത് തിരുത്തുകയും ചെയ്തു. “അയ്യോ…എല്‍എസ് ഡി(LSD) അല്ല, എല്‍സിഡി(LCD) എന്നായിരുന്നു”.- ഇതാണ് സദസ്സില്‍ ഏറ്റവും വലിയ കൂട്ടച്ചിരി ഉണര്‍ത്തിയത്. സൂപ്പര്‍ സ്റ്റാര്‍ വിക്കി കൗശലെല്ലാം മുന്നിലെ ടേബിളില്‍ തലയിടിച്ച് ചിരിയ്‌ക്കുകയായിരുന്നു. കാരണം എല്‍എസ് ഡി എന്നത് ഒരു പ്രത്യേക തരം മയക്കമരുന്നിന്റെ ചുരുക്കപ്പേരാണല്ലോ. “എല്‍സിഡി…ഇതില്‍ ‘എല്‍’ എന്നത് ലോഫും ‘ഡി’ എന്നത് ഡ്രാമ എന്നും ആയിരുന്നു. അതില്‍ ‘സി’ എന്താണെന്നത് ഞാന്‍ മറന്നുപോയി”- ഇതും കൂട്ടച്ചിരി ഉണര്‍ത്തി. എന്തായാലും ഞാന്‍ തിരിച്ചുപോയി ആ വീഡിയോ വീണ്ടും കണ്ട് എന്തൊക്കെയാണ് എല്‍സിഡി എന്നത് പഠിക്കുമെന്ന് ഉറപ്പുതരുന്നുവെന്നും ബേസില്‍ പറഞ്ഞു.
ഈ അവാര്‍ഡ് കിട്ടുമ്പോള്‍ പ്രസംഗിക്കാന്‍ ഒരു പാട് തയ്യാറെടുപ്പുകള്‍ നടത്തിയിരുന്നെന്നും പക്ഷെ അവാര്‍ഡ് തരുന്ന രണ്ടു പേരെ (രാജ് കുമാര്‍ ഹിറാനിയെയും വിധു വിനോദ് ചോപ്രയെയും) കണ്ടപ്പോള്‍ പഠിച്ചതെല്ലാം മറന്നുപോയെന്നും ശുദ്ധമായി പറഞ്ഞപ്പോഴും സദസ്സ് ചിരിച്ചു.
ഒരു സംവിധായകനായാണ് സിനിമയില്‍ ചുവടുവെച്ചതെങ്കിലും പിന്നീട് ഒരു നടനായി മാറുകയായിരുന്നെന്നും ബേസില്‍ ജോസഫ് പറഞ്ഞു. ഒരു പാട് മികച്ച പ്രതിഭകള്‍ ഒത്തുകൂടിയ ചടങ്ങില്‍, ഈ സ്റ്റേജില്‍ ഒരു നടന്‍ എന്ന നിലയ്‌ക്ക് അവാര്‍ഡ് വാങ്ങുമ്പോള്‍ ഒരു സ്വപ്നം പോലെയാണ് തോന്നുന്നതെന്നും എത്ര അപ്രതീക്ഷിതമായ രീതിയിലാണ് കാര്യങ്ങള്‍ തിരിയുന്നതെന്നും ഇതിന് ആദ്യം ഈ പ്രപഞ്ചത്തിനും (ദൈവത്തിനും) പിന്നെ സംവിധായകര്‍ക്കും നന്ദി പറയുന്നതായി ബേസില്‍ ജോസഫ് പറഞ്ഞു. പൊന്മാന്‍ എന്ന സിനിമയിലെ പ്രകടനത്തിനാണ് ബേസില്‍ ജോസഫിന് അവാര്‍ഡ് കിട്ടിയത്. പൊന്മാന്റെ സംവിധായകന്‍ ജ്യോതി ശങ്കര്‍ സാറിനും ഒപ്പം പ്രവര്‍ത്തിച്ച മറ്റ് കലാകാരന്മാര്‍ക്കും നന്ദി പറയുന്നതായി ബേസില്‍ ജോസഫ് പറഞ്ഞു.
നേഹ ദൂപിയ ആയിരുന്നു പരിപാടിയുടെ ആങ്കര്‍. അവാര്‍ഡ് വാങ്ങിയതിന് ശേഷം അവാര്‍ഡ് നല്‍കിയ രാജ് കുമാര്‍ ഹിറാനിയുടെയും വിധു വിനോദ് ചോപ്രയുടെയും കൂടെ സെല്‍ഫി എടുക്കണമെന്നായി ബേസില്‍ ജോസഫ്. കാരണം ഇവരെ രണ്ടുപേരെയും അത്ര കണ്ട് ബേസില്‍ ജോസഫ് ആരാധിക്കുന്നുണ്ടത്രെ. സെല്‍ഫിക്ക് വേണ്ടി അവര്‍ പോസ് ചെയ്തപ്പോള്‍ താന്‍ ക്യാമറയില്‍ പകര്‍ത്തണോ എന്ന് ചോദിച്ച് നേഹ ദൂപിയ അടുത്തു വന്നെങ്കിലും അത് വേണ്ട എന്ന് ബേസില്‍ പറഞ്ഞതും പലരെയും ചിരിപ്പിച്ചു. ഒടുവില്‍ ബേസില്‍ ജോസഫ് രാജ് കുമാര്‍ ഹിറാനിയുടെയും വിധു വിനോദ് ചോപ്രയുടെയും കൂടെ തന്റെ മൊബൈല്‍ ഫോണില്‍ സ്വയം സെല്‍ഫി എടുക്കുകയായിരുന്നു. ബേസില്‍ വേദിയില്‍ നിന്നും ഇറങ്ങുമ്പോള്‍ നേഹ ദൂപിയ ഒരുപാട് അഭിനന്ദനവാക്കുകള്‍ ബേസില്‍ ജോസഫിന് മേല്‍ ചൊരിയുന്നുണ്ടായിരുന്നു. താങ്കള്‍ ശരിയ്‌ക്കും ഈ വേദിയെ ധന്യമാക്കിയെന്ന് നേഹി ദൂപിയ പറഞ്ഞപ്പോള്‍ വലിയ കയ്യടി ഉയര്‍ന്നു.
