കൊല്ലം: കരുനാഗപ്പള്ളി അമൃതപുരി കാമ്പസില്‍ 14, 15 തീയതികളില്‍ നടക്കുന്ന ‘രാമക്ഷേത്രം രാഷ്‌ട്രക്ഷേത്രം’ ജന്മഭൂമി അന്താരാഷ്ട്ര സെമിനാര്‍ ലക്ഷ്യമിടുന്നത് വിപുലമായ സാംസ്‌കാരിക തീര്‍ത്ഥാടനം. രാജ്യത്ത് തെക്ക്, വടക്ക് ഭേദങ്ങള്‍ പ്രചരിപ്പിച്ച് വിഘടനവാദം വളര്‍ത്താനുള്ള ആസൂത്രിത നീക്കങ്ങള്‍ക്കുള്ള ഭാവാത്മക മറുപടിയാണ് ശ്രീരാമന്‍-രാഷ്‌ട്രഏകതയുടെ ആധാരം എന്ന വിഷയത്തെ മുന്‍നിര്‍ത്തി നടക്കുന്ന സെമിനാര്‍ സെഷനുകള്‍.
ശ്രീരാമകഥയുമായി ബന്ധമുള്ള എല്ലാ കേന്ദ്രങ്ങളെയും അയോദ്ധ്യയുമായി കൂട്ടിയിണക്കുന്ന ശ്രീരാമജന്മഭൂമി തീര്‍ത്ഥക്ഷേത്ര ട്രസ്റ്റിന്റെയും കേന്ദ്രസാംസ്‌കാരിക വകുപ്പിന്റെയും പദ്ധതിയുടെ ഭാഗമായാണ് അന്താരാഷ്ട്ര സെമിനാര്‍ ഒരുങ്ങുന്നത്. ജടായു സ്മൃതികളുണരുന്ന ചടയമംഗലവും പ്രശസ്തമായ ശ്രീരാമക്ഷേത്രം സ്ഥിതി ചെയ്യുന്ന തൃപ്രയാറുമാണ് കേരളത്തില്‍ ഈ തീര്‍ത്ഥാടന പദ്ധതിയുടെ ഭാഗമാകുന്നത്. ചടയമംഗലത്തെ ജടായുപ്പാറയില്‍ തല ഉയര്‍ത്തിനില്‍ക്കുന്ന കോദണ്ഡസ്വാമി ക്ഷേത്രത്തെയും ജടായുശില്പത്തെയും ലോകമാസകലമുള്ള ഭാരതീയരുടെ ശ്രദ്ധയിലേക്ക് എത്തിക്കുക എന്ന ലക്ഷ്യവും ഇതിന്റെ പിന്നിലുണ്ട്.
കാശി-തമിഴ് സംഗമത്തിന് സമാനമായി ഭാവിയില്‍ അയോദ്ധ്യ-കേരള സംഗമം സംഘടിപ്പിക്കുന്നതിനും പദ്ധതിയുണ്ട്. ചടയമംഗലം കോദണ്ഡസ്വാമി ക്ഷേത്രത്തെയും ശ്രീരാമജന്മഭൂമി തീര്‍ത്ഥക്ഷേത്രത്തെയും ബന്ധപ്പെടുത്തി കേന്ദ്ര സാംസ്‌കാരികവകുപ്പിന്റെ സഹകരണത്തോടെ നടത്തുന്ന സെമിനാറിന് 14ന് വൈകിട്ട് 4.30ന് മാതാ അമൃതാനന്ദമയി മഠത്തിലെ ബ്രഹ്മചാരി സൂക്ഷ്മാമൃത ചൈതന്യ ദീപം തെളിയിക്കും. ഉദ്ഘാടന സഭയില്‍ ജന്മഭൂമി മാനേജിങ് ഡയറക്ടറും ആര്‍എസ്എസ് ദക്ഷിണക്ഷേത്ര കാര്യവാഹുമായ എം. രാധാകൃഷ്ണന്‍, ദക്ഷിണകേരള പ്രാന്ത പ്രചാരക് എസ്. സുദര്‍ശനന്‍, എ. ജയകുമാര്‍, അംബാശങ്കര്‍ വാജ്‌പേയ്, കെ.എസ്. രമേശ്, എ. രതീഷ് എന്നിവര്‍ പങ്കെടുക്കും.
കേന്ദ്രസാംസ്‌കാരിക വകുപ്പിന് കീഴിലുള്ള കൊല്‍ക്കത്തയിലെ മൗലാന അബുല്‍കലാം ആസാദ് ഇന്‍സ്റ്റിറ്റിയൂട്ട് ഓഫ് ഏഷ്യന്‍ സ്റ്റഡീസിന്റെ സഹകരണത്തോടെ സംഘടിപ്പിക്കുന്ന ദ്വിദിന സെമിനാറില്‍ നാല് സെഷനുകളിലായി അക്കാദമിക രംഗത്തെ പന്ത്രണ്ട് പ്രമുഖര്‍ പ്രബന്ധങ്ങള്‍ അവതരിപ്പിക്കും. ശ്രീരാമതീര്‍ത്ഥക്ഷേത്ര ട്രസ്റ്റുമായി ബന്ധപ്പെട്ട് ഡോ. രാം അവതാര്‍ ശര്‍മ്മ, ഡോ. വിവേകാനന്ദ ഉപാധ്യായ, ഡോ. വൈഭവ് ഭൂഷണ്‍ ത്രിപാഠി എന്നിവര്‍ പേപ്പറുകള്‍ അവതരിപ്പിക്കും. രാജീവ് അഞ്ചല്‍, ബ്രഹ്മചാരി അച്യുതാമൃത ചൈതന്യ, ഡോ. ഹരികൃഷ്ണന്‍. വി.പി, ബ്രഹ്മചാരി ശിവാനന്ദന്‍, ഡോ. ലക്ഷ്മിദാസ്, ശങ്കരാമൃത സ്വാമികള്‍, കെ.കെ. വാമനന്‍, ധ്യാനാമൃത സ്വാമികള്‍, ഡോ. ശ്രീജിത് കര്‍ത്ത എന്നിവരാണ് മറ്റ് വിഷയാവതാരകര്‍.
ജടായു സ്ത്രീസുരക്ഷയുടെ കാവലാള്‍, രാമോ വിഗ്രഹവാന്‍ ധര്‍മ്മഃ, ശ്രീരാമന്‍-സാംസ്‌കാരിക ഏകതയുടെ ആധാരം, കേരളത്തിന്റെ രാമന്‍, എല്ലാവരുടെയും രാമന്‍, ഹനുമായനം, മലയാള സാഹിത്യത്തില്‍ രാമന്റെ പ്രഭാവം, രാമന്റെ കല്യാണഗുണങ്ങള്‍, രാമരാജ്യം മുന്നോട്ടു വയ്‌ക്കുന്ന പൗരധര്‍മ്മം, രാമായണം: ഭാരതത്തിന്റെ ഭൂമിശാസ്ത്രത്തില്‍, അഗസ്ത്യന്‍: ഏകാത്മകതയുടെ പ്രഥമചാലകന്‍, രാമായണവും ആയുര്‍വേദവും എന്നീ വിഷയങ്ങളാണ് സെമിനാറില്‍ ചര്‍ച്ച ചെയ്യുക.
15ന് ഉച്ചയ്‌ക്ക് 2.30ന് ചേരുന്ന സമാപന സഭയില്‍ ജന്മഭൂമി എഡിറ്റര്‍ കെ.എന്‍.ആര്‍. നമ്പൂതിരി, ബ്രഹ്മചാരി ദേവിദാസ് ചൈതന്യ, കെ.ബി. ശ്രീകുമാര്‍, ഡോ. എന്‍.വി. രമേശ്, എസ്. അശോകന്‍, വി. രവികുമാര്‍ എന്നിവര്‍ സംസാരിക്കും. ഡോ. ശ്യാം വിനയന്‍, ഡോ. ഹരിത ചന്ദ്രന്‍, ഡോ. കാദംബരി, ഡോ. ഡെല്‍വിന്‍ ടി. റോബിന്‍, ഡോ. വിഷ്ണു. യു എന്നിവര്‍ വിവിധ സെഷനുകളില്‍ മോഡറേറ്റര്‍മാരാകും.
