ന്യൂദല്‍ഹി: ഇന്ത്യയുടെ പ്രതിരോധമന്ത്രി രാജ് നാഥ് സിങ്ങും ഗ്രീക്ക് പ്രതിരോധമന്ത്രി നിക്കോളാസ് ഡന്‍ഡിയോസും തമ്മില്‍ ഒപ്പുവെച്ച കരാര്‍ തുര്ക്കിയ്ക്ക് ഭീഷണിയാകും. പാകിസ്ഥാനുമായി ചേര്‍ന്ന് ഇന്ത്യയ്‌ക്കെതിരെ നീങ്ങുന്ന തുര്‍ക്കിക്ക് ചെക്ക് വെയ്‌ക്കാന്‍ ഇന്ത്യ കണ്ടെത്തിയ ഏറ്റവും നല്ല യൂറോപ്യന്‍ പങ്കാളിയാണ് ഗ്രീസ്.
തുര്‍ക്കിയെ പൂട്ടാന്‍ ഇന്ത്യ-ഗ്രീസ് സാമുദ്രിക കരാര്‍
അടുത്ത അഞ്ച് വര്‍ഷത്തേക്ക് പ്രതിരോധവ്യവസായമേഖലയില്‍ സഹകരിക്കുന്നതിന് വേണ്ടിയുള്ള കരാറാണ് ഇന്ത്യയും ഗ്രീസും ഒപ്പുവെച്ചത്. ഇരുരാജ്യങ്ങളുടെയും സൈന്യങ്ങള്‍ തമ്മിലുള്ള സഹകരണവും കരാറിന്റെ ഭാഗമാണ്.. ഇതില്‍ സാമുദ്രികമേഖലയിലെ കരാര്‍ സുപ്രധാനമാണ്. ഇതനുസരിച്ച് ഒരു ഗ്രീക്ക് ഉദ്യോഗസ്ഥനെ ലെയ്സണ്‍ ഓഫീസറായി ഇന്ത്യയില്‍ നിയമിക്കും. ഗുരുഗ്രാമിലെ ഇന്‍ഫര്‍മേഷന്‍ ഫ്യൂഷന്‍ സെന്‍റര്‍- ഇന്ത്യന്‍ ഓഷ്യന്‍ റീജ്യണിലാണ് നിയമിക്കുക. അതുപോലെ ഒരു ഇന്ത്യന്‍ ഉദ്യോഗസ്ഥനെ ഗ്രീസിലും നിയമിക്കും. ഇന്ത്യന്‍ മഹാസുമുദ്രത്തിലെ വിവരങ്ങള്‍ ഇന്ത്യ ഗ്രീസൂമായും മെഡിറ്ററേനിയന്‍ കടലിലെ വിവരങ്ങള്‍ ഗ്രീസ് ഇന്ത്യയുമായും പങ്കുവെയ്‌ക്കും.അതായത് തുര്‍ക്കിയുടെ കടല്‍നീക്കങ്ങള്‍ മുഴുവന്‍ ഇന്ത്യയ്‌ക്കും ഗ്രീസിനും അപ്പപ്പോള്‍ അറിയാന്‍ സാധിക്കും. എണ്ണയുമായുള്ള തുര്‍ക്കിക്കപ്പലുകളുടെ നീക്കങ്ങളും മറ്റ് തുര്‍ക്കിയുടെ സന്നാഹങ്ങളും അപ്പപ്പോള്‍ ഇന്ത്യയ്‌ക്ക് അറിയാന്‍ സാധിക്കും. ഓപ്പറേഷന്‍ സിന്ദൂര്‍ കാലത്ത് ആയുധങ്ങള്‍ നിറച്ച തുര്‍ക്കികപ്പല്‍ പാകിസ്ഥാനില്‍ വന്നതായി വാര്‍ത്തകള്‍ ഉണ്ടായിരുന്നു. ഇനി ഇതെല്ലാം ഇന്ത്യയ്‌ക്ക് അപ്പപ്പോള്‍ അറിയാന്‍ സാധിക്കും.
തുര്‍ക്കിയെ സഹായിച്ച ഇന്ത്യയെ തുര്‍ക്കി മതത്തിന്റെ പേരില്‍ ചതിച്ചു
തുര്‍ക്കിയില്‍ ഭൂകമ്പമുണ്ടായപ്പോള്‍ കയ്യയച്ച് സഹായിച്ച രാജ്യമാണ് ഇന്ത്യ. എന്നിട്ടും ഓപ്പറേഷന്‍ സിന്ദൂര്‍ കാലത്ത് തുര്‍ക്കി പാകിസ്ഥാനെ സഹായിച്ചു. വിമാനത്തിലും കപ്പലിലും ആയുധങ്ങള്‍ നല്‍കി. പാകിസ്ഥാന്‍ ഇന്ത്യയ്‌ക്ക് നേരെ അയച്ച 400ല്‍ പരം ഡ്രോണുകള്‍ തുര്‍ക്കിയുടേതായിരുന്നു.ഈ തുര്‍ക്കി സോംഗാര്‍ ഡ്രോണുകളുടെ അവശിഷ്ടങ്ങള്‍ ഇന്ത്യ കണ്ടെടുത്തിരുന്നു. ഇതോടെയാണ് ഇന്ത്യ-തുര്‍ക്കി ബന്ധം ഉലഞ്ഞത്. മതമാണ് മതമാണ് മതമാണ് പ്രശ്നം എന്ന് പറഞ്ഞതുപോലെ ഇന്ത്യാ-പാക് സംഘര്‍ഷാവസ്ഥയുണ്ടായപ്പോള്‍ തുര്‍ക്കി മതം മാത്രമേ നോക്കിയുള്ളൂ.
ഇന്ത്യയുടെ ആയുധങ്ങള്‍ ഗ്രീസ് വാങ്ങും
ഗ്രീസിന് ആവശ്യമായ മിസൈലുകളും ഡ്രോണുകളും ഇന്ത്യയില്‍ നിന്നും വാങ്ങാന്‍ ധാരണയായിട്ടുണ്ട്. ഇന്ത്യയെ സംബന്ധിച്ചിടത്തോളം ശത്രുവിന്റെ ശത്രുവാണ് ഗ്രീസ് ഗ്രീസും തുര്‍ക്കിയും തമ്മില്‍ അതിര്‍ത്തി തര്‍ക്കം നിലനില്‍ക്കുന്നുണ്ട്. പല തവണ തുര്‍ക്കിയുടെ എര്‍ദോഗാന്‍ ഗ്രീസിനെ ആക്രമിച്ചിട്ടുണ്ട്.
ബെംഗളൂരുവിലെ ഇന്ത്യയുടെ സൈനിക സ്റ്റേഷനും ഗ്രീസിന്റെ പ്രതിരോധമന്ത്രി സന്ദര്‍ശിച്ചു. ഇന്ത്യ തദ്ദേശീയമായി നിര്‍മ്മിച്ച ഡ്രോണുകള്‍ അദ്ദേഹം നോക്കിക്കണ്ടു. ഇന്ത്യയുടെ എലീറ്റ് ഗ്രൂപ്പായ സ്പെഷ്യല്‍ ഫോഴ്സസിന്റെയും കോംബാറ്റ് എഞ്ചിനീയേഴ്സിന്റെയും സൈനികോപകരണങ്ങള്‍ അദ്ദേഹം കണ്ടു.
ഇന്ത്യയുടെ പ്രൊഫഷണലിസവും നവീകരണത്വരയും സൈനിക ഒരുക്കവും പ്രതിരോധ രംഗത്തെ സ്വയംപര്യാപ്തതയും അപാരമാണെന്നും നിക്കോളാസ് ഡന്‍ഡിയോസ് പറഞ്ഞു. മോദി 2023ല്‍ ഗ്രീസ് സന്ദര്‍ശിച്ചിരുന്നു. തിരിച്ച് ഗ്രീക്ക് പ്രധാനമന്ത്രി കിരിയാക്കോസ് മിറ്റ്സോറ്റാകിസ് 2024ല്‍ ഇന്ത്യയും സന്ദര്‍ശിച്ചിരുന്നു. അതിന്റെ തുടര്‍ച്ചയാണ് ബുധനാഴ്ച ഗ്രീസ് പ്രതിരോധമന്ത്രിയുടെ ഇന്ത്യാ സന്ദര്‍ശനം. പ്രതിരോധരംഗത്തെ ഇന്ത്യയുടെ ആത്മനിര്‍ഭര്‍ഭാരത് ദൗത്യങ്ങളെ ഗ്രീസ് പിന്തുണയ്‌ക്കുമെന്ന് അദ്ദേഹം വ്യക്തമാക്കി.
