മുംബൈ: ആർഎസ്എസ് ശതാബ്ദിയുടെ ഭാഗമായി മുംബൈയിൽ സംഘടിപ്പിച്ച പരിപാടിയിൽ ബോളിവുഡ് താരം സൽമാൻ ഖാൻ. ‘സംഘയാത്രയുടെ നൂറ് വർഷം – പുതിയ ചക്രവാളങ്ങൾ’ എന്ന വിഷയത്തിൽ വർളി നെഹ്‌റു സെന്റർ ഓഡിറ്റോറിയത്തിൽ സംഘടിപ്പിച്ച പ്രഭാഷണ പരമ്പരയിൽ പങ്കെടുക്കാനാണ് നടൻ എത്തിയത്.
സൽമാൻ ഖാന് പുറമേ ബോളിവുഡ് താരം രൺബീർ കപൂറും പരിപാടിയിൽ സന്നിഹിതനായിരുന്നു. ചലച്ചിത്ര പ്രവർത്തകരായ മോഹിത് സൂരി, സുഭാഷ് ഘായി, നിതേഷ് തിവാരി, ഓം റാവത്ത്, നിർമ്മാതാക്കളായ മഹാവീർ ജെയിന് , വിക്രം മൽഹോത്ര എന്നിവരും ചടങ്ങിൽ പങ്കെടുത്തു. മുതിർന്ന ആർഎസ്എസ് കാര്യക‍‍ർത്താക്കളും പ്രഭാഷകരും അടക്കം സമൂഹത്തിന്റെ വിവിധ തുറകളിൽപ്പെട്ട വ്യക്തികൾ പരിപാടിയുടെ ഭാഗമാകുന്നുണ്ട്.
‘മുംബൈ വ്യാഖ്യാൻ മാല’ എന്ന നാമകരണം ചെയ്ത പരിപാടി സംഘടിപ്പിക്കുന്നത്. സമ്മേളനം ആർഎസ്എസ് സർസംഘചാലക് ഡോ. മോഹൻ ഭാഗവത് ഉദ്ഘാടനം ചെയ്തു. ഒരു സമൂഹമെന്ന നിലയിൽ, നമ്മൾ ഇപ്പോഴും പൂർണരല്ല. വിവേചനങ്ങളും യാഥാസ്ഥിതികതയും അന്ധവിശ്വാസങ്ങളും തിന്മകളും നിരക്ഷരതയുമൊക്കെ കുറവുകളാണ്. ഇവയിൽനിന്നെല്ലാം മോചിതമായ, ആരോഗ്യമുള്ള സമൂഹത്തെ സൃഷ്ടിക്കുംവരെ നമ്മുടെ ശ്രമങ്ങൾ പൂർത്തിയാകില്ലെന്ന് അദ്ദേഹം പറഞ്ഞു.
ഹിന്ദു കേവലം പേരല്ലെന്നും ഭാരതത്തിൽ താമസിക്കുന്നവരെല്ലാം ഹിന്ദുക്കളാണെന്നും സർസംഘചാലക് വ്യക്തമാക്കി. സംഘം ഒരു സംഘടനയോടും മത്സരിക്കുകയോ എതിർക്കുകയോ ചെയ്യുന്നില്ല. ആരെയും എതിർക്കാതെയാണ് പ്രവർത്തനം. സമൂഹത്തെ മുഴുവൻ സംഘടിപ്പിക്കുക എന്നതല്ലാതെ മറ്റൊരു ദൗത്യവും ഇല്ലെന്നും അദ്ദേഹം കൂട്ടിച്ചേർത്തു.
“മത വീക്ഷണങ്ങൾ വ്യത്യസ്തമായിരിക്കാമെന്ന് ഞങ്ങൾ വിശ്വസിക്കുന്നു. നാരായൺ വാമൻറാവു ക്രിസ്തുമതത്തിലേക്ക് പരിവർത്തനം ചെയ്തു. അദ്ദേഹം ഒരു നല്ല കവിയായിരുന്നു. ഞങ്ങൾ അദ്ദേഹത്തെ ബഹുമാനിക്കുന്നു. എന്നാൽ നിർബന്ധിതമായി മതപരിവർത്തനം ചെയ്യപ്പെട്ടവരെ പൂർണ്ണമായ ഘർ വാപസിയിലൂടെ തിരികെ കൊണ്ടുവരണം.”-അദ്ദേഹം പറഞ്ഞു.
അനധികൃത കുടിയേറ്റക്കാരെ തിരിച്ചറിഞ്ഞ് നാടുകടത്തണമെന്ന് അദ്ദേഹം സർക്കാരിനോട് ആവശ്യപ്പെട്ടു. മതം പരിഗണിക്കാതെ ഇന്ത്യക്കാർക്ക് ബിസിനസുകൾ നൽകണമെന്നും അദ്ദേഹം പറഞ്ഞു.
