ന്യൂദല്ഹി: റിപ്പബ്ലിക് ദിനാഘോഷത്തിന്റെ ഭാഗമായി രാഷ്ട്രപതിയും പ്രധാനമന്ത്രിയും വിശിഷ്ടവ്യക്തികള്ക്കായി സംഘടിപ്പിച്ച സംഗമത്തിലും വിരുന്നിലും പ്രത്യേകക്ഷണിതാവായി ജന്മഭൂമി എഡിറ്റര് കെ.എന്.ആര്. നമ്പൂതിരി പങ്കെടുത്തു. രാജ്യത്തിന്റെ വിവിധ ഭാഗങ്ങളിലെ വിവിധ മേഖലയിലുള്ളവര്ക്കായിരുന്നു ക്ഷണം.
അഷ്ടലക്ഷ്മി എന്ന പേരില് രാഷ്ട്രപതിഭവനില് നടന്ന അറ്റ് ഹോം റിസപ്ഷനില് കേന്ദ്രമന്ത്രിമാര്, ഉന്നതഉദ്യോഗസ്ഥര്, വിവിധ എംബസികളിലെ നയതന്ത്ര ഉദ്യോഗസ്ഥര്, പ്രമുഖ പത്രാധിപന്മാര്, രാഷ്ട്രപതിയുടെ കുടുംബാംഗങ്ങള് തുടങ്ങിയവര് പങ്കെടുത്തു.
വടക്കുകിഴക്കന് മേഖലയിലെ എട്ടു സംസ്ഥാനങ്ങള്ക്ക് പ്രാധാന്യം നല്കിയ ചടങ്ങിന്, അവിടെ നിന്നുള്ള കലാ പരിപാടികള് മാറ്റുകൂട്ടി. അതിഥികളെ വരവേറ്റത് ആ സംസ്ഥാനങ്ങളിലെ പരമ്പരാഗത വേഷമണിഞ്ഞവരായിരുന്നു. വിരുന്നില് അവിടങ്ങളില് നിന്നുള്ള വിഭവങ്ങള്ക്കായിരുന്നു മുന്ഗണന. രാഷ്ട്രപതി ദ്രൗപദി മുര്മു, ഉപരാഷ്ട്രപതി സി.പി. രാധാകൃഷ്ണന്, പ്രധാനമന്ത്രി നരേന്ദ്ര മോദി എന്നിവര് അതിഥികളുടെ അടുത്തെത്തി തൊഴുകൈകളോടെ അഭിവാദ്യം ചെയ്തു. കേരളത്തില് നിന്ന് കേന്ദ്രമന്ത്രി ജോര്ജ് കുര്യനും നടന് ഉണ്ണിമുകുന്ദനും പങ്കെടുത്തു.
ഇന്നലെ ഹൈദരാബാദ് ഹൗസില് നടന്ന പ്രധാനമന്ത്രിയുടെ മധ്യാഹ്നവിരുന്നില് ക്ഷണിക്കപ്പെട്ടവര് നാലു പത്രാധിപന്മാരടക്കം 14 പേരായിരുന്നു. വിവിധ മേഖലയില് നിന്നുള്ള സംരംഭകരടക്കം പത്തുപേരും. വിദേശകാര്യമന്ത്രി ഡോ. എസ്. ജയശങ്കര്, ദേശീയ സുരക്ഷാ ഉപദേഷ്ടാവ് അജിത് ഡോവല് എന്നിവരും ചടങ്ങിനെത്തി.
ജന്മഭൂമിക്ക് പുറമെ ഹിന്ദുസ്ഥാന് ടൈംസ്, തമിഴ് പത്രമായ ദിനമലര്, ബംഗാളില് നിന്നുള്ള ഏയ് സമയ് എന്നിവയുടെ പത്രാധിപന്മാരാണ് പങ്കെടുത്തത്. പുറമേ, പ്രധാനമന്ത്രിയുടെ ഓഫീസിലെയും വിദേശകാര്യവകുപ്പിലെയും ഉദ്യോഗസ്ഥരും ഭാരതത്തില് സന്ദര്ശനം നടത്തുന്ന യൂറോപ്യന് കൗണ്സില്, യൂറോപ്യന് കമ്മിഷന് എന്നിവയുടെ പ്രസിഡന്റുമാരും ഉദ്ദ്യോഗസ്ഥരും പങ്കെടുത്തു. പ്രധാനമന്ത്രി നരേന്ദ്ര മോദി അതിഥികളെ പരിചയപ്പെടുകയും ഒപ്പം നിന്ന് ഫോട്ടോ എടുക്കുകയും ചെയ്തു.
