തിരുവനന്തപുരം : പൊലീസ് സ്റ്റേഷന് മുന്നില്‍ നിര്‍ത്തിയിട്ട വാഹനത്തില്‍ പൊലീസുകാരുടെ കൂട്ട മദ്യപാനം.കഴക്കൂട്ടം പൊലീസ് സ്റ്റേഷന് മുന്നിലെ റോഡരികില്‍ നിര്‍ത്തിയിട്ട വാഹനത്തിലായിരുന്നു പൊലീസുകാരുടെ മദ്യപാനം.
സംഭവത്തിന്റെ ദൃശ്യങ്ങള്‍ സഹിതം സാമൂഹിക മാധ്യമങ്ങളില്‍ വ്യാപകമായി പ്രചരിച്ചു. പൊലീസ് സ്റ്റേഷനിലെത്തിയ പരാതിക്കാരനാണ് ദൃശ്യങ്ങള്‍ പകര്‍ത്തിയത്. മദ്യപിച്ച് വാഹനം ഓടിക്കുക, പൊതുസ്ഥലത്ത് വാഹനത്തില്‍ വച്ച് മദ്യപിക്കുക എന്നിവ ക്രിമിനല്‍ കുറ്റമാണെന്നിരിക്കെയാണ് പൊലീസുകാരുടെ പ്രവൃത്തി. സംഭവം പുറത്തായതോടെ പൊലീസ് അന്വേഷണത്തിന് ഉത്തരവിട്ടു,
കഴക്കൂട്ടം പൊലീസ് സ്റ്റേഷനിലെ സിപിഒമാരാണ് മദ്യപാനം നടത്തിയ ആറുപേരും. വിവാഹ സല്‍ക്കാരത്തിന് പോകുന്നതിന് മുമ്പായിരുന്നു മദ്യപാനം. വാഹനമോടിക്കുന്ന സിപിഒ അടക്കമുള്ളവര്‍ മദ്യപിക്കുന്നത് ദൃശ്യത്തിലുണ്ട്. മദ്യപാനം നടത്താനുപയോഗിച്ച വാഹനത്തിലാണ് ഇവര്‍ വിവാഹ സല്‍ക്കാരത്തിനായി പോയത്.
