തിരുവനന്തപുരം:വിളപ്പില്‍ശാലയിലെ സര്‍ക്കാര്‍ ആശുപത്രിയില്‍ ചികിത്സ കിട്ടാതെ യുവാവ് മരിച്ചെന്ന പരാതിയില്‍ റിപ്പോര്‍ട്ട് തേടി ആരോഗ്യവകുപ്പ്.ആരോഗ്യ വകുപ്പ് ഡയറക്ടറാണ് അന്വേഷിച്ച് റിപ്പോര്‍ട്ട് നല്‍കാന്‍ അഡീഷണല്‍ ജില്ലാ മെഡിക്കല്‍ ഓഫീസറോട് നിര്‍ദേശിച്ചത്.
കൊല്ലങ്കോണം സ്വദേശി ബിസ്മീര്‍ മരിച്ച സംഭവത്തിലാണ് അന്വേഷണം.കഴിഞ്ഞ 19ന് പുലര്‍ച്ചെയാണ് ശ്വാസ തടസം മൂലം ബിസ്മീറിനെ വിളപ്പില്‍ശാലയിലെ സാമൂഹിക ആരോഗ്യ കേന്ദ്രത്തിലെത്തിച്ചത്. ആശുപത്രിയില്‍ എത്തിച്ചപ്പോള്‍ ഗ്രില്ല് അകത്തുനിന്ന് പൂട്ടിയിരിക്കുകയായിരുന്നു.
പത്ത് മിനിറ്റിലധികമാണ് ആശുപത്രി വരാന്തയില്‍ ബിസ്മീറിനും ഭാര്യക്കും കാത്തുനില്‍ക്കേണ്ടി വന്നത്. നിലവിളിച്ചു കരഞ്ഞിട്ടും ആശുപത്രി അധികൃതര്‍ സഹായിച്ചില്ലെന്ന് ബിസ്മിറിന്റെ ഭാര്യ ജാസ്മിന്‍ പറഞ്ഞു.
നില വഷളായതോടെ യുവാവിനെ മെഡിക്കല്‍ കോളേജ് ആശുപത്രിയിലെത്തിച്ചെങ്കിലും മരിച്ചു. വിളപ്പില്‍ശാല കുടുംബാരോഗ്യ കേന്ദ്രത്തില്‍ കാത്തിരുന്ന ബിസ്മീര്‍ വെപ്രാളം കാട്ടുന്നതും ഭാര്യ സഹായത്തിനായി ഓടുന്നതും പുറത്തു വന്ന വീഡിയോ ദൃശ്യങ്ങളിലുണ്ട്.
