പത്തനംതിട്ട: മുന്‍ ദേവസ്വം മന്ത്രി കടകംപള്ളി സുരേന്ദ്രനെപ്പോലെ ആറ്റിങ്ങല്‍ എംപി അടൂര്‍ പ്രകാശിനും ഉണ്ണികൃഷ്ണന്‍ പോറ്റിയുമായി ഉറ്റ ബന്ധമുണ്ടെന്ന് തെളിയിക്കുന്ന ഫോട്ടോ പുറത്ത്. ബെംഗളൂരുവില്‍ ഉപഹാരം കൈമാറുന്ന ചിത്രമാണത്. എന്നാല്‍ ആര് ആര്‍ക്കാണ് ഉപഹാരം നല്കുന്നതെന്ന് വ്യക്തമല്ല. പോറ്റിയുടെ സുഹൃത്തുക്കളായ അനന്ത സുബ്രഹ്മണ്യവും രമേശ് റാവുവുമുണ്ട്. ബെംഗളൂരു ശ്രീരാംപുരയിലെ ഉണ്ണികൃഷ്ണന്‍ പോറ്റിയുടെ ~ാറ്റിലാണ് ഇരുവരും കണ്ടുമുട്ടിയതെന്ന് കരുതുന്നു. സമീപത്താണ് ഇവരുടെയും വീടുകള്‍.
അടൂര്‍ പ്രകാശിന്റെ സന്ദര്‍ശന ലക്ഷ്യമറിയാന്‍ അദ്ദേഹത്തെ ചോദ്യം ചെയ്യണം. കടകംപള്ളി സുരേന്ദ്രനുമായി ബെംഗളൂരു വിമാനത്താവളത്തില്‍ നടന്ന കൂടിക്കാഴ്ചയില്‍ പോറ്റി ധരിച്ചിരുന്ന മഞ്ഞ ജുബ്ബാ തന്നെയാണ് ചിത്രത്തില്‍ കാണുന്നത്. അതിനാല്‍ കടകംപള്ളിയുടെയും അടൂര്‍ പ്രകാശിന്റെയും പോറ്റിയുമായുള്ള കൂടിക്കാഴ്ചയ്‌ക്ക് തമ്മില്‍ അധിക കാലത്തെ ദൈര്‍ഘ്യമില്ല. ശ്രീരാംപുരയിലെ ഫ്ലാറ്റില്‍ നടന്ന എതോ ചടങ്ങില്‍ പങ്കെടുക്കാനാണോ മന്ത്രിയും എംപിയുമെത്തിയതെന്നും സംശയിക്കുന്നു.
സ്വര്‍ണക്കൊള്ളയുമായി ബന്ധമുള്ള വ്യക്തികളാണ് ചിത്രത്തിലുള്ള അനന്ത സുബ്രഹ്മണ്യവും രമേഷ് റാവുവും. 2019 ജൂലൈ 19, 20 തീയതികളില്‍ ദ്വാരപാലക ശില്‍പ പാളികള്‍ സന്നിധാനത്തുനിന്ന് ഇളക്കി ബെംഗളൂരുവിലേക്ക് കൊണ്ടുപോയത് ഇവരാണ്. അതിനാല്‍ അടൂര്‍ പ്രകാശിന് പോറ്റിയെ മാത്രമല്ല കേസുമായി ബന്ധമുള്ള പലരെയും അറിയാമായിരുന്നെന്ന് വ്യക്തം.
കോണ്‍ഗ്രസ് നേതാവ് സോണിയയെ കാണാന്‍ പോറ്റിക്ക് സൗകര്യമൊരുക്കിയത് താനല്ലെന്നാണ് അടൂര്‍ പ്രകാശ് മാധ്യമങ്ങളോടു പറഞ്ഞത്. അടൂര്‍ പ്രകാശിന്റെ മണ്ഡലമായ ആറ്റിങ്ങലിലെ വോട്ടര്‍ എന്ന നിലയില്‍ മാത്രമാണ് പോറ്റിയെ പരിചയമുള്ളതെന്നും അതിനാലാണ് സോണിയയെ സന്ദര്‍ശിക്കാന്‍ പോറ്റിയെത്തിയപ്പോള്‍ കൂടെ നിന്ന് ഫോട്ടോയെടുത്തതെന്നും അതിലുപരി ഒന്നുമില്ലെന്നും അടൂര്‍ പ്രകാശ് പറയുന്നു.
ബോര്‍ഡ് മുന്‍ പ്രസിഡന്റ് പ്രയാര്‍ ഗോപാല കൃഷ്ണനും, പോറ്റിക്കും കുടുംബത്തിനും ഒപ്പം സോണിയയെ സന്ദര്‍ശിച്ചിട്ടുണ്ട്. ചിത്രത്തില്‍ അടൂര്‍ പ്രകാശുമുണ്ടായിരുന്നതിനാലാണ് അദ്ദേഹത്തിന്റെ സഹായത്തോടെയായിരുന്നു സോണിയ സന്ദര്‍ശനം എന്ന വാര്‍ത്ത പ്രചരിച്ചത്. ഇത് സത്യമാണെന്ന് തെളിയിക്കുകയാണ് ഫോട്ടോകള്‍.
പോറ്റിക്ക് കൃത്യമായ രാഷ്‌ട്രീയമുണ്ടെന്നും അയാള്‍ കോണ്‍ഗ്രസുകാരനാണെന്നും അയല്‍വാസിയുടെ മഹസര്‍ മൊഴിയില്‍ വ്യക്തം. ഈ ബന്ധമാണ് സോണിയയെ സന്ദര്‍ശിക്കാന്‍ പോറ്റിക്ക് പ്രേരണയായത്. ആന്റോ ആന്റണിയോടൊപ്പം സോണിയയെ കണ്ടതും ഈ രാഷ്‌ട്രീയ മമത മൂലമാണ്.
അടൂര്‍ പ്രകാശ് പോറ്റിയെ ബെംഗളൂരുവില്‍ സന്ദര്‍ശിച്ച ചിത്രം പുറത്തുവന്നതോടെ കോണ്‍ഗ്രസ് പ്രതിരോധത്തിലായിരിക്കുകയാണ. ഇതേപ്പറ്റി അടൂര്‍ പ്രകാശോ കോണ്‍ഗ്രസോ പ്രതികരിച്ചിട്ടില്ല.
