ന്യൂദല്‍ഹി: ഭൂരിപക്ഷഐക്യം കേരളത്തിലെ ഇരുമുന്നണികളുടെയും പേടിസ്വപ്‌നമാണെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍. ഭൂരിപക്ഷ സമുദായത്തിലെ എല്ലാവരും തമ്മിലടിച്ച് നശിക്കണം എന്നാണ് പലരുടെയും നിലപാട്. മുസ്ലിം സംഘടനകളും, ന്യൂനപക്ഷ സംഘടനകളും ഒന്നിക്കുന്നത് മതേതരത്വവും, ഭൂരിപക്ഷം ഒന്നിക്കുന്നത് വര്‍ഗീയതയും ആകുന്നത് എങ്ങനെയാണെന്നും കെ. സുരേന്ദ്രന്‍ ദല്‍ഹിയില്‍ മാധ്യമങ്ങളോട് ചോദിച്ചു.
എന്‍എസ്എസിന്റെ സുകുമാരന്‍ നായരും എസ്എന്‍ഡിപിയുടെ വെള്ളാപ്പള്ളി നടേശനും ചായ കുടിക്കാന്‍ ഒന്നിച്ചിരുന്നാല്‍ അത് വലിയ വര്‍ഗ്ഗീയത. ഈ പ്രചാര വേല കഴിഞ്ഞ മുപ്പത്, നാല്‍പത് വര്‍ഷമായി കേരളത്തില്‍ നടക്കുന്നു. ന്യൂനപക്ഷങ്ങള്‍ അവരുടെ താത്പര്യം സംരക്ഷിക്കാന്‍ വേണ്ടി ഏത് നിലപാട് സ്വീകരിച്ചാലും മതേതരപാര്‍ട്ടികള്‍ എന്നുവിളിക്കുന്നവര്‍ മതേതര നിലപാടായി ഉയര്‍ത്തികാണിക്കുന്നു. ഭൂരിപക്ഷ സമുദായം തമ്മിലടിച്ച് നശിക്കണം എന്നാണ് നിലപാട്. അതിന്റെ ഏറ്റവും വലിയ ഉദാഹരണമാണ് ഇപ്പോള്‍ കാണുന്നത്. വെള്ളാപ്പള്ളി നടേശനും സുകുമാരന്‍ നായരും ചില കാര്യങ്ങള്‍ പറഞ്ഞു. ആ കാര്യങ്ങളോട് യോജിക്കുന്നവര്‍ക്ക് യോജിക്കാം, വിയോജിക്കുന്നവര്‍ക്ക് വിയോജിക്കാം. പക്ഷേ ഭൂരിപക്ഷ ഐക്യം എന്നത് കേരളത്തിലെ ഇരുമുന്നണികള്‍ക്കും ഒരു പേടിസ്വപ്നമാണ്.
നായര്‍ സമുദായത്തിന്റെയോ, ഈഴവ സമുദായത്തിന്റെയോ കുത്തക ഏതെങ്കിലും സംഘടനയ്‌ക്കല്ല. അത്തരം പരാമര്‍ശങ്ങളെയൊന്നും ഞങ്ങള്‍ കാണുന്നില്ല. ബിജെപിയെ വിമര്‍ശിക്കാനുള്ള സ്വാതന്ത്ര്യം എല്ലാ സംഘടനകള്‍ക്കുമുണ്ട്. പ്രശ്നാധിഷ്ഠിതമായ നിലപാടാണ് എല്ലാകാലത്തും സമുദായിക സംഘടനകളോട് സ്വീകരിച്ചിട്ടുള്ളതെന്നും കെ. സുരേന്ദ്രന്‍ പറഞ്ഞു.
മന്ത്രി സജി ചെറിയാന്റെ പ്രസ്താവന തെരഞ്ഞെടുപ്പ് മുന്നില്‍ കണ്ടാണെന്നും കെ. സുരേന്ദ്രന്‍ പറഞ്ഞു. സജി ചെറിയാന്‍ ചെങ്ങന്നൂര്‍ മണ്ഡലത്തില്‍ ജയിക്കുന്നത് ആരുടെ പിന്തുണയിലാണെന്ന് എല്ലാവര്‍ക്കും അറിയാം. ചെങ്ങന്നൂര്‍ മണ്ഡലത്തില്‍ ഉടനീളം എസ്ഡിപിഐ സംഘങ്ങള്‍ പൂര്‍ണമായും സജി ചെറിയാന്റെ കൂടെയാണ്. ഇപ്പോള്‍ നാലു ഹിന്ദുവോട്ട് ചാക്കിലാക്കാം എന്ന ധാരണയിലാണ് സജി ചെറിയാന്‍ ഇത്തരം പ്രസ്താവനകള്‍ നടത്തുന്നതെങ്കില്‍ അത് നടക്കില്ല മോനേ എന്നാണ് തനിക്ക് പറയാനുള്ളതെന്നും കെ. സുരേന്ദ്രന്‍ കൂട്ടിച്ചേര്‍ത്തു.
