ലോകത്തിലെ ഏറ്റവും വലിയ വ്യാപാര കരാറിൽ ഇന്ത്യ ഒപ്പുവയ്‌ക്കാൻ പോകുന്നു : ട്രംപിന് ഇരട്ടി തിരിച്ചടി നേരിടേണ്ടിവരുമെന്നതിൽ സംശയമില്ല

ബ്രസ്സൽസ് : ഇന്ത്യയോടുള്ള ഡൊണാൾഡ് ട്രംപിന്റെ പിടിവാശികൾക്കിടയിൽ ലോകത്തിലെ ഏറ്റവും വലിയ വ്യാപാര കരാറിൽ ഒപ്പുവെക്കുന്നതിലേക്ക് ഇന്ത്യ അടുത്തു. ഇന്ത്യയും യൂറോപ്യൻ യൂണിയനും തമ്മിൽ ചർച്ച ചെയ്യുന്ന വ്യാപാര കരാർ അന്തിമമാകാൻ ഇനി ഏതാനും ചുവടുകൾ മാത്രമാണുള്ളത്. ഇന്ത്യയും യൂറോപ്യൻ യൂണിയനും തമ്മിലുള്ള വ്യാപാര കരാറിന്റെ 24 അധ്യായങ്ങളിൽ 20 എണ്ണത്തിലും ഒപ്പുവെച്ചതായി ഇന്ത്യയുടെ വാണിജ്യ സെക്രട്ടറി രാജേഷ് അഗർവാൾ വ്യാഴാഴ്ച പറഞ്ഞു.

ഈ മാസം അവസാനം യൂറോപ്യൻ യൂണിയൻ നേതാക്കളുടെ ഇന്ത്യാ സന്ദർശനത്തിന് മുമ്പ് കരാർ പൂർത്തിയാക്കുക എന്നതാണ് ലക്ഷ്യമെന്ന് അദ്ദേഹം പറഞ്ഞു. ഈ വർഷത്തെ ഇന്ത്യയിലെ റിപ്പബ്ലിക് ദിനാഘോഷങ്ങളിൽ യൂറോപ്യൻ കൗൺസിൽ പ്രസിഡന്റ് അന്റോണിയോ ലൂയിസ് സാന്റോസ് ഡാ കോസ്റ്റയും യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്‌നും മുഖ്യാതിഥികളായിരിക്കും. ജനുവരി 27 ന് നടക്കുന്ന 16-ാമത് ഇന്ത്യ-ഇയു ഉച്ചകോടിയിലും അവർ സഹ-അധ്യക്ഷത വഹിക്കും. വ്യാഴാഴ്ച വിദേശകാര്യ മന്ത്രാലയം ഇത് ഔദ്യോഗികമായി പ്രഖ്യാപിച്ചു.

അതേ സമയം തന്നെ ചരിത്രത്തിലെ ഏറ്റവും വലിയ വ്യാപാര കരാറാണ് ഇന്ത്യ-യൂറോപ്യൻ യൂണിയൻ കരാർ. ഡൊണാൾഡ് ട്രംപിന്റെ കാടൻ നയങ്ങൾ തന്നെയാണ് ഇന്ത്യയെയും യൂറോപ്യൻ യൂണിയനെയും എത്രയും വേഗം ഒരു വ്യാപാര കരാറിലെത്താൻ നിർബന്ധിതരാക്കിയത്. കഴിഞ്ഞ വർഷം അതായത് 2025 ഓടെ ന്യൂദൽഹി മൂന്ന് വ്യാപാര കരാറുകൾക്ക് അന്തിമരൂപം നൽകിയിരുന്നു. അതേസമയം ദക്ഷിണ അമേരിക്കൻ വ്യാപാര കൂട്ടായ്‌മയായ മെർകോസറുമായി യൂറോപ്യൻ യൂണിയൻ ദീർഘകാലമായി കാത്തിരുന്ന ഒരു കരാറിലും ഒപ്പുവച്ചു. ഇപ്പോൾ ഇന്ത്യയും യൂറോപ്യൻ യൂണിയനും തമ്മിലുള്ള വ്യാപാര കരാർ ഒപ്പുവച്ചാൽ അത് ലോകത്തിലെ ഏറ്റവും വലിയ വ്യാപാര കരാറുകളിൽ ഒന്നായിരിക്കും. മാധ്യമ   റിപ്പോർട്ട് അനുസരിച്ച് ഈ വ്യാപാര കരാർ യുഎസ് ഇന്ത്യയിൽ ചുമത്തിയ 50 ശതമാനം താരിഫിന്റെ ആഘാതം ഒരു പരിധിവരെ കുറയ്‌ക്കുമെന്നും

ലോകത്തിലെ ഏറ്റവും വലിയ വ്യാപാര കരാറായി ഇത് എങ്ങനെ മാറുന്നു ?

ഈ വ്യാപാര കരാർ യൂറോപ്യൻ യൂണിയനിലെ 450 ദശലക്ഷം ജനസംഖ്യയെയും ഇന്ത്യയിലെ ഏകദേശം 1.4 ബില്യൺ ജനസംഖ്യയെയും ബന്ധിപ്പിക്കും. ഇവർ ഒരുമിച്ച് ലോകത്തിലെ മൊത്തം ജനസംഖ്യയുടെ 25 ശതമാനമാണ്. ഇന്ത്യൻ മധ്യവർഗം അതിവേഗം വളരുകയാണ്. 2030 ആകുമ്പോഴേക്കും ഇന്ത്യ ലോകത്തിലെ ഏറ്റവും വലിയ ഉപഭോക്തൃ വിപണിയായി മാറും. ഇത് യൂറോപ്യൻ ഉൽപ്പന്നങ്ങളുടെ ഏറ്റവും വലിയ വിപണിയായി മാറും.

ലോകത്തിലെ ഏറ്റവും മികച്ച അഞ്ച് സമ്പദ്‌വ്യവസ്ഥകളിൽ രണ്ടെണ്ണത്തെ ഈ വ്യാപാര കരാർ ബന്ധിപ്പിക്കും. യൂറോപ്യൻ യൂണിയന്റെ സമ്പദ്‌വ്യവസ്ഥ 19.5 ട്രില്യൺ ഡോളറാണ്,അതേസമയം ഇന്ത്യയുടെ സമ്പദ്‌വ്യവസ്ഥ 4 ട്രില്യണിൽ കൂടുതലാണ്. ഇന്ത്യയുടെ സാമ്പത്തിക വളർച്ചാ നിരക്കും ലോകത്തിലെ ഏറ്റവും ഉയർന്നതാണ്. 1991 ലെ സാമ്പത്തിക ഉദാരവൽക്കരണത്തിനുശേഷം ഇന്ത്യയെ സംബന്ധിച്ചിടത്തോളം ഇത് ഏറ്റവും പ്രധാനപ്പെട്ട കരാറായി മാറും.