ന്യൂദല്‍ഹി: തമിഴ്ന്ടന്‍മാരായ ശിവകാര്‍ത്തികേയനും രവി മോഹനും മോദിയ്‌ക്കൊപ്പം പൊങ്കല്‍ ആഘോഷിച്ചത് തമിഴ്നാട് രാഷ്‌ട്രീയത്തില്‍ വലിയ ചലനം സൃഷ്ടിക്കുന്നു. ഇരുവരും സംഘി ഗ്രൂപ്പിലാണെന്ന് കോണ്‍ഗ്രസ് നേതാവ് മാണിക്കം ടാഗോര്‍ വിമര്‍ശനമുയര്‍ത്തി രംഗത്ത് വന്ന് കഴിഞ്ഞു. കഴിഞ്ഞ ദിവസം നടന്മാരായ ശിവകാര്‍ത്തികേയനും രവി മോഹനും പ്രധാനമന്ത്രിയ്‌ക്കൊപ്പം പൊങ്കല്‍ ആഘോഷിച്ചതിനോട് ആദ്യപരസ്യപ്രതികരണം നടത്തുകയായിരുന്നു മാണിക്കം ടാഗോര്‍.
നടന്മാരായ ശിവകാര്‍ത്തികേയനും രവി മോഹനും പ്രധാനമന്ത്രിയ്‌ക്കൊപ്പം പൊങ്കല്‍ ആഘോഷിച്ചത് തമിഴ്നാട് രാഷ്‌ട്രീയത്തില്‍ വലിയ ചലനങ്ങള്‍ സൃഷ്ടിക്കുകയാണ്. ഇവര്‍ ഇരുവരും ബിജെപിയിലേക്ക് പോകുകയാണോ എന്ന ചോദ്യവും ശക്തമായി ഉയരുന്നുണ്ട്. പ്രധാനമന്ത്രിയെ ആദ്യമായാണ് താന്‍ നേരിട്ട് കാണുന്നതെന്ന് ശിവകാര്‍ത്തികേയന്‍ പറഞ്ഞു. പൊങ്കല്‍ ആശംസകള്‍ പങ്കുവെച്ച ശിവകാര്‍ത്തികേയന്‍ തന്റെ പുതിയ സിനിമയായ പരാശക്തിയ്‌ക്കെതിരെ കോണ്‍ഗ്രസ് ഉയര്‍ത്തുന്ന ആരോപണങ്ങള്‍ തള്ളി. തനിക്ക് പ്രത്യേകിച്ച് പ്രൊപ്പഗാണ്ട ഒന്നുമില്ലെന്നും സിനിമ മുഴുവനായി കണ്ടാല്‍ കോണ്‍ഗ്രസുകാര്‍ക്ക് അതിന്റെ അര്‍ത്ഥം മനസ്സിലാകുമെന്നും ശിവകാര്‍ത്തികേയന്‍ പറഞ്ഞു. തമിഴ്നാട്ടുകാരെക്കൊണ്ട് ഹിന്ദി ഇംപോസിഷന്‍ എഴുതിച്ചത് കോണ്‍ഗ്രസാണെന്നതുള്‍പ്പെടെ ഒട്ടേറെ വിമര്‍ശനങ്ങള്‍ ഈ സിനിമയില്‍ ഉണ്ട്. ഇതെല്ലാം വാസ്തവമാണുതാനും.
ശിവകാര്‍ത്തികേയന്‍ നായകനായ പരാശക്തി എന്ന സിനിമയുടെ ഭാഗമായ മുഴുവന്‍ പേരും സംവിധായിക സുധ കൊങ്കരയ്‌ക്കൊപ്പം ന്യൂദല്‍ഹിയില്‍ പോയി പ്രധാനമന്ത്രിയ്‌ക്കൊപ്പം പൊങ്കല്‍ ആഘോഷിക്കുകയായിരുന്നു. കേന്ദ്രമന്ത്രി എല്‍ മുരുകന്റെ വസതിയിലായിരുന്നു ഈ പൊങ്കല്‍ ആഘോഷം നടന്നത്.
വാസ്തവത്തില്‍ കോണ്‍ഗ്രസിനെ കഠിനമായി വിമര്‍ശിക്കുന്ന പരാശക്തി എന്ന സിനിമ തമിഴ്നാട്ടില്‍ വിതരണം ചെയ്യുന്നത് ഡിഎംകെ കുടുബത്തിന്റെ ഭാഗമായുള്ള വിതരണക്കമ്പനിയാണ്. കോണ്‍ഗ്രസിനെ മോശം രീതിയിലാണ് ഈ സിനിമയില്‍ ചിത്രീകരിച്ചിരിക്കുന്നതെന്ന് ആരോപിച്ച് സിനിമയ്‌ക്കെതിരെ യൂത്ത് കോണ്‍ഗ്രസുകാര്‍ സിനിമ തിയറ്ററുകളില്‍ പ്രതിഷേധിക്കുന്ന സാഹചര്യത്തിലാണ് ഈ വിശദീകരണം.
നടന്‍ രവി മോഹനൊപ്പം അദ്ദേഹത്തിന്റെ സുഹൃത്ത് കെനിഷ ഫ്രാന്‍സിസും സംഗീതസംവിധായകന്‍ ജി.വി. പ്രകാശ് കുമാറും പങ്കെടുത്തു. ജിവി പ്രകാശ് പ്രധാനമന്ത്രി മോദിയ്‌ക്കൊപ്പമുള്ള ഒരു ചിത്രം സമൂഹമാധ്യമങ്ങളില്‍ പങ്കവെച്ചത് വലിയ പ്രതികരണങ്ങള്‍ തമിഴ്നാട്ടില്‍ സൃഷ്ടിച്ചിരുന്നു.
ഡിഎംകെ സഖ്യകക്ഷി ചര്‍ച്ചകളില്‍ നിന്നും കോണ്‍ഗ്രസിനെ പുറന്തള്ളിയ മട്ടാണ്. ഇതോടെ രാഹുല്‍ ഗാന്ധി നടന്‍ വിജയിന്റെ പാര്‍ട്ടിയുമായി സഖ്യമുണ്ടാക്കാനുള്ള ശ്രമത്തിലാണ്. അതേ സമയം വിജയ് നായകനായ ജനനായകന്‍ എന്ന സിനിമ വിവാദപരാമര്‍ശങ്ങള്‍ ഉള്ളതിനാല്‍ ഇനിയും റിലീസ് ചെയ്യാനുള്ള പച്ചക്കൊടി കിട്ടിയില്ല.
