തിരുവനന്തപുരം : തിരഞ്ഞെടുപ്പിന് മുമ്പ് ചില മാധ്യമങ്ങൾ യുഡിഎഫിനെ അധികാരത്തിലെത്തിക്കും. തിരഞ്ഞെടുപ്പിന് ശേഷം ജനങ്ങൾ എൽഡിഎഫിനെ അധികാരത്തിലെത്തിക്കും. അതാണ് കേരളത്തിൽ കാണുന്നതെന്ന് മന്ത്രി വി . ശിവൻ കുട്ടി.
കഴിഞ്ഞ തവണ തിരഞ്ഞെടുപ്പിന് മുമ്പ് ചിലർ യുഡിഎഫിന്റെ മുഖ്യമന്ത്രിയെയും മന്ത്രിസഭയെയും തീരുമാനിച്ചിരുന്നു. തിരഞ്ഞെടുപ്പിന് ശേഷം എൽഡിഎഫ് രണ്ടാമതും അധികാരത്തിൽ വന്നു. എൽഡിഎഫ് വേണ്ടെന്ന് ജനങ്ങൾ എങ്ങനെയാണ് പറയുക. ഏതെങ്കിലും മന്ത്രിക്കെതിരെ ഒരു രൂപയുടെ അഴിമതി ആരോപണമുണ്ടോ?’ എന്നും ശിവൻ കുട്ടി ചോദിച്ചു.
അതേസമയം എക്സൈസ് ഉദ്യോഗസ്ഥർ മന്ത്രിയ്‌ക്ക് അകമ്പടി സേവിക്കണമെന്ന എക്സൈസ് കമ്മീഷണർ എം ആർ അജിത്കുമാറിന്റെ നിർദേശത്തെയും ശിവൻ കുട്ടി തള്ളിക്കളഞ്ഞു. മുഖ്യമന്ത്രിയുടെയും മന്ത്രിമാരുടെയും പ്രോട്ടോക്കോൾ തീരുമാനിക്കേണ്ടത് ഏതെങ്കിലും ഉദ്യോഗസ്ഥനല്ല, സർക്കാരാണെന്നും ശിവൻകുട്ടി പ്രതികരിച്ചു. ‘മുഖ്യമന്ത്രിയുടെയും മന്ത്രിമാരുടെയും സുരക്ഷയ്‌ക്ക് ഒരു പ്രോട്ടോക്കോൾ ഉണ്ട്. ആ പ്രോട്ടോക്കോൾ അനുസരിച്ചാണ് കാര്യങ്ങൾ നടക്കുന്നത്‘ അദ്ദേഹം പറഞ്ഞു.
