തിരുവനന്തപുരം: കുംഭമേള നടക്കുന്ന തിരുനാവായയില് എല്ലാ നിര്മ്മാണ പ്രവര്ത്തനങ്ങളും നിരോധിച്ചുള്ള സര്ക്കാര് ഉത്തരവ് നിയമ വിരുദ്ധവും മത സ്വാതന്ത്ര്യ ധ്വംസനവുമാണെന്ന് മുതിര്ന്ന ബി ജെ പി നേതാവ് കുമ്മനം രാജശേഖരന്.
കുംഭമേള നടക്കാന് ഏതാനും ദിവസം മാത്രം അവശേഷിച്ചിരിക്കേ, യാതൊരു മുന്നറിയിപ്പും നല്കാതെ പെട്ടെന്ന് നിര്മ്മാണ ജോലികള് തടസപ്പെടുത്തിയതില് വ്യക്തമായ ഗൂഡാലോചനയുണ്ട്.കുംഭമേളയെ അട്ടിമറിച്ച് തീര്ത്ഥാടകരുടെ മനോവീര്യം കെടുത്തുകയാണ് ലക്ഷ്യമെന്ന് കുമ്മനം സാമൂഹ്യമാധ്യമ കുറിപ്പില് ചൂണ്ടിക്കാട്ടി.
പണ്ടുകാലം മുതല് തിരുനാവായ മണപ്പുറത്ത് നടന്നു വരുന്ന മക മഹോത്സവം ഭംഗിയായി നടത്താനായി വിപുലമായ തയാറെടുപ്പും ക്രമീകരണ പ്രവര്ത്തനങ്ങളും നടത്തിവരികയായിരുന്നു. ഒരു മാസമായി നിളാ നദിയുടെ തീരത്ത് തീത്ഥാടകര്ക്ക് വേണ്ട അടിസ്ഥാനസൗകര്യങ്ങള് ഏര്പ്പെടുത്താന് നിര്മ്മാണ ജോലി നടക്കുമ്പോഴൊന്നും പൊലീസോ റവന്യൂ അധികൃതരോ യാതൊരു തടസവും ഉന്നയിച്ചില്ല. ദിവസവും സര്ക്കാരുദ്യോഗസ്ഥര് കുംഭമേള സ്ഥലത്ത് എത്തി സ്ഥിതിഗതികള് വിലയിരുത്തിയിട്ടുണ്ട്. എന്തെങ്കിലും നിയമ വിരുദ്ധ പ്രവര്ത്തനം നടന്നതായി അവരാരും ചൂണ്ടിക്കാണിച്ചില്ല.
കേളപ്പജിയുടെ നേതൃത്തില് സര്വോദയ മേള നടന്നപ്പോള് മുതല് ഭാരതപ്പുഴക്ക് കുറുകെ താല്ക്കാലിക പാലം പണിയാറുണ്ട്. നദീതീരവും മണല് തിട്ടകളും സൗകര്യപ്പെടുത്താറുണ്ട്. ജനങ്ങള് തിങ്ങി കൂടുന്ന സ്ഥലങ്ങളില് പ്രാഥമികാവശ്യങ്ങള്ക്കും അടിസ്ഥാന ആവശ്യങ്ങള്ക്കും സൗകര്യമൊരുക്കേണ്ടത് സര്ക്കാരിന്റെ കടമയാണ്. സൗകര്യമൊരുക്കുകയുമില്ല സൗകര്യമൊരുക്കാന് ആരേയും അനുവദിക്കുകയുമില്ല എന്ന സര്ക്കാര് നയം തീര്ത്തും നിരുത്തരവാദപരമാണെന്ന് കുമ്മനം വിമര്ശിച്ചു.ദുരുദ്ദേശപരമായ ഈ നിലപാടിനെ ശക്തിയുക്തം എതിര്ത്ത് പരാജയപ്പെടുത്തും.സംഭവത്തില് പ്രതിഷേധിക്കാനും ആചാര സംരക്ഷണത്തിനും എല്ലാ വിഭാഗം ജനങ്ങളും രംഗത്ത് വരണമെന്നും കുമ്മനം അഭ്യര്ത്ഥിച്ചു
