ചെന്നൈ: മുംബൈയെക്കുറിച്ചും തമിഴ് ഐക്കൺ കെ. കാമരാജിനെക്കുറിച്ചുമുള്ള തന്റെ പരാമർശങ്ങളിൽ മഹാരാഷ്‌ട്ര നവനിർമ്മാൺ സേന (എംഎൻഎസ്) അധ്യക്ഷൻ രാജ് താക്കറെ നടത്തിയ ഭീഷണികൾക്കും വ്യക്തിപരമായ അധിക്ഷേപങ്ങൾക്കും മറുപടിയുമായി ബിജെപി നേതാവ് കെ. അണ്ണാമലൈ. ഭീഷണിപ്പെടുത്തി തന്നെ മുംബൈ സന്ദർശിക്കുന്നതിൽ നിന്ന് തടയാനാവില്ലെന്ന് അദ്ദേഹം പറഞ്ഞു.
തന്നെ മുംബൈയിൽ പ്രവേശിക്കുന്നത് തടയാൻ രാജ് താക്കറെയെ വെല്ലുവിളിച്ച അണ്ണാമലൈ, കാലുകൾ വെട്ടുമെന്ന ഭീഷണികളെ താൻ ഭയപ്പെടുന്നില്ലെന്നും വ്യക്തമാക്കി. മുംബൈ ഒരു അന്താരാഷ്‌ട്ര നഗരമാണെന്ന അണ്ണാമലൈയുടെ പരാമർശത്തെ രാജ് താക്കറെ പരിഹസിച്ചതോടെയാണ് തർക്കം രൂക്ഷമായത്. തമിഴ്‌നാട്ടിൽ നിന്ന് ഒരു “രസമല” വന്നിരിക്കുന്നു എന്ന് അണ്ണാമലൈയെ വിശേഷിപ്പിച്ച രാജ് താക്കറെ, മുംബൈ കാര്യങ്ങളിൽ ഇടപെടാൻ അദ്ദേഹത്തിന് എന്ത് ബന്ധമാണുള്ളതെന്ന് ചോദിച്ചു. 1960കളിൽ ബാൽ താക്കറെ ഉയർത്തിയ ‘ഹട്ടാവോ ലുങ്കി, ബജാവോ പുങ്കി’ എന്ന വിവാദ മുദ്രാവാക്യവും അദ്ദേഹം പ്രസംഗത്തിൽ പരാമർശിച്ചു. ഇതിന് മറുപടിയായാണ് ചെന്നൈയിൽ അണ്ണാമലൈ വാർത്താസമ്മേളനം വിളിച്ചത്.
“എന്നെ ഭീഷണിപ്പെടുത്താൻ ആദിത്യ താക്കറെയും രാജ് താക്കറെയും ആരാണ്? ഒരു കർഷകന്റെ മകനായതിൽ ഞാൻ അഭിമാനിക്കുന്നു. എന്നെ അധിക്ഷേപിക്കാൻ മാത്രമാണ് അവർ യോഗങ്ങൾ സംഘടിപ്പിക്കുന്നത്,” അണ്ണാമലൈ പറഞ്ഞു. മുംബൈയിൽ വന്നാൽ കാലുവെട്ടുമെന്ന് ഭീഷണിപ്പെടുത്തുന്നവർ അത് പരീക്ഷിക്കട്ടെ എന്നും അത്തരം ഭീഷണികളെ ഭയപ്പെട്ടിരുന്നെങ്കിൽ താൻ ഗ്രാമത്തിൽ തന്നെ കഴിയുമായിരുന്നുവെന്നും അദ്ദേഹം കൂട്ടിച്ചേർത്തു. മുംബൈ ഒരു ലോകോത്തര നഗരമാണെന്ന് പറയുന്നത് മഹാരാഷ്‌ട്രക്കാർ അത് നിർമ്മിച്ചില്ല എന്ന അർത്ഥത്തിലല്ല. കാമരാജിനെ ഇന്ത്യയുടെ നേതാവ് എന്ന് വിളിക്കുന്നത് കൊണ്ട് അദ്ദേഹം തമിഴനല്ലാതാകുമോ എന്നും അജ്ഞത കൊണ്ടാണ് താക്കറെമാർ ഇത്തരത്തിൽ സംസാരിക്കുന്നതെന്നും അദ്ദേഹം വിമർശിച്ചു.
മഹാരാഷ്‌ട്രയിലെ തദ്ദേശ സ്വയംഭരണ തെരഞ്ഞെടുപ്പിന് മുന്നോടിയായി ഉദ്ധവ് താക്കറെയും രാജ് താക്കറെയും കൈകോർത്തതിന് പിന്നാലെയാണ് ഈ വാക്പോര് നടക്കുന്നത്. മുംബൈ, പൂനെ, പിംപ്രി-ചിഞ്ച്‌വാഡ് എന്നിവയുൾപ്പെടെ മഹാരാഷ്‌ട്രയിലെ 29 മുനിസിപ്പൽ കോർപ്പറേഷനുകളിലേക്കുള്ള വോട്ടെടുപ്പ് ജനുവരി 15-നാണ് നടക്കുന്നത്. വോട്ടെണ്ണൽ ജനുവരി 16-ന് നടക്കും.
